بۇۇ قازاقستاننىڭ باستاماسىمەن 22 ءساۋىردى حالىقارالىق عالامشاردى كوگالداندىرۋ كۇنى دەپ جاريالادى...

بىرىككەن ۇلتتار ۇيىمى (بۇۇ) قازاقستان رەسپۋبليكاسىنىڭ باستاماسىمەن 22 ءساۋىردى حالىقارالىق عالامشاردى كوگالداندىرۋ كۇنى دەپ جاريالادى. بۇل تۋرالى قر سىرتقى ىستەر مينيسترلىگىنىڭ ءباسپاسوز قىزمەتى حابارلادى.

«بۇۇ باس اسسامبلەياسى قازاقستان رەسپۋبليكاسى ۇسىنعان «حالىقارالىق عالامشاردى كوگالداندىرۋ كۇنى» قارارىن قابىلداپ، 22 ءساۋىردى حالىقارالىق عالامشاردى كوگالداندىرۋ كۇنى رەتىندە بەكىتتى. بۇل باستامانى مەملەكەت باسشىسى قاسىم-جومارت توقاەۆ 2025 جىلدىڭ قىركۇيەگىندە بۇۇ باس اسسامبلەياسىنىڭ 80-ءشى سەسسياسىنىڭ جالپى دەباتتارىندا كوتەرگەن بولاتىن»، — دەلىنگەن سەيسەنبىدەگى حابارلامادا.

قارارعا الەمنىڭ ءتۇرلى ايماقتارىنان 32 مەملەكەت قوسالقى اۆتور رەتىندە قولداۋ ءبىلدىردى. بۇل حالىقارالىق قوعامداستىق ءۇشىن اتالعان باستامانىڭ قانشالىقتى وزەكتى ءارى ماڭىزدى ەكەنىن كورسەتەدى.

«قۇجاتتىڭ قابىلدانۋى — قازاقستاننىڭ جاھاندىق ەكولوگيالىق كۇن ءتارتىبىن يلگەرىلەتۋگە، قورشاعان ورتانى قورعاۋعا، ەكوجۇيەلەردى قالپىنا كەلتىرۋگە، جاسىل جەلەك مايدانىن كەڭەيتۋگە جانە ەكولوگيالىق مادەنيەتتى قالىپتاستىرۋعا قوسقان جۇيەلى ۇلەسىنىڭ ايعاعى. قارار الەمدىك قاۋىمداستىقتىڭ تابيعي ەكوجۇيەلەردى كوگالداندىرۋ مەن قالپىنا كەلتىرۋدىڭ ماڭىزى تۋرالى حاباردارلىعىن ارتتىرۋعا، سونداي-اق مەملەكەتتەردى، بۇۇ جۇيەسىن، حالىقارالىق جانە وڭىرلىك ۇيىمداردى، ازاماتتىق قوعامدى ءتيىستى ءىس-شارالار مەن باستامالاردى جۇزەگە اسىرۋعا ىنتالاندىرۋعا باعىتتالعان»، — دەپ اتاپ ءوتىلدى حابارلامادا.

حالىقارالىق كۇننىڭ بەكىتىلۋى قازاقستاندا ءوتىپ جاتقان، قورشاعان ورتاعا جاۋاپكەرشىلىكپەن قاراۋدى، اۋماقتاردى اباتتاندىرۋدى جانە قوعامنىڭ ەكولوگيالىق مادەنيەتىن كوتەرۋدى كوزدەيتىن «تازا قازاقستان» جالپىۇلتتىق ەكولوگيالىق اكتسياسىمەن ۇندەسەدى.

«وسى قاراردىڭ قابىلدانۋى پرەزيدەنتتىڭ كەزەكتى حالىقارالىق باستاماسىنىڭ پراكتيكالىق جۇزەگە اسۋى بولدى. سونداي-اق ول ورنىقتى دامۋ مەن كەلەشەك ۇرپاق ءۇشىن قورشاعان ورتانى ساقتاۋ جولىنداعى قازاقستاننىڭ كوپجاقتى ىنتىماقتاستىقتى نىعايتۋعا باعىتتالعان ۇستانىمىنىڭ سۇرانىسقا يە ەكەنىن راستايدى»، — دەپ تولىقتىردى ءسىم وكىلدەرى.

Abai.kz