قازاقستانداعى سالىق رەفورماسىنىڭ اكەسى اتانعان، وسى كامپانياعا تاعدىرىن تىككەن سەرىك جۇمانعارين ۇكىمەتتەگى ورنىن ساقتاپ قالدى دەپ جازادى Ertenmedia.kz.

وسىعان دەيىنگى مينيسترلەر كابينەتىنىڭ ەڭ باستى دەرتى جاۋاپكەرشىلىكتەن قاشۋ، ماڭىزدى شەشىمدى سوزباققا سالۋ جانە ساياسي تاۋەكەلگە بارماۋ ەدى. ۇلكەن كىسىنىڭ داۋىرىندە شەندىلەردىڭ باسىم بولىگى ابايلاپ سويلەپ، ساتسىزدىكتىڭ سالماعىن ءوز موينىنا الماۋعا تىرىساتىن.

توقاەۆتىڭ تۇسىندا «ەكىنشى تىنىسى» اشىلعان جۇمانعارين كەرىسىنشە، قوعامنىڭ بۇكىل اشۋ-ىزاسىن وزىنە قابىلدايتىن فيگۋرا بولىپ تۇر. اقورداعا بارلىق ساياسي رەپۋتاتسيالىق سوققىنى وزىنە سورىپ الاتىن ابسوربەر شەنەۋنىك ءازىر اۋاداي قاجەت.

سالىق ساياساتى سياقتى اسا سەزىمتال سالادا اگرەسسيۆتى اۋديتوريامەن، بيزنەسپەن، ءتىپتى پارلامەنتتەگى دەپۋتاتتارمەن اشىق ءارى دورەكىلەۋ پىكىرتالاسقا تۇسۋگە ءداتى جەتەتىن ءبىر ادام بولسا، ول وسى — جۇمانعارين. بۇل ما، بۇل سىرت كوزگە كەمشىلىك كورىنگەنىمەن، شىن مانىندە كريزيس مەنەدجمەنتتە تاپتىرماس قاسيەت.

ءاسىلى، جاڭا سالىق كودەكسى ارقىلى جەڭىلدىكتەردى قىسقارتۋ پروتسەسى ءىرى بيزنەس وكىلدەرىنىڭ (قارجى-ونەركاسىپتىك توپتاردىڭ) قاتتى قارسىلىعىنا تاپ بولعانىن كوردىك

ءدال وسى كەزەڭدە كومپروميسسكە بارا سالاتىن ءيى جۇمساق مينيستر توقاەۆ تاپسىرعان رەفورمانىڭ تاس-تالقانىن شىعارار ەدى. جۇمانعاريننىڭ مىنەزىندەگى بەلگىلى ءبىر كولەمدەگى بىربەتكەيلىك ءىرى كاپيتالدىڭ قىسىمىنا توتەپ بەرە الدى.

تۇتاستاي العاندا، بەكتەنوۆتىڭ باقىلاۋ-قاداعالاۋ، جەمقورلىقپەن كۇرەس باعىتىنداعى كەيسى مەن جۇمانعاريننىڭ بيۋدجەتتىك-فيسكالدىق بلوكتى باسقارۋ داعدىسى ءبىر-بىرىمەن تىعىز استاسىپ جاتقانىن مويىنداۋ كەرەك.

سالىق كودەكسى، بيۋدجەت كودەكسى جانە ۇلتتىق قوردىڭ قاراجاتىن پايدالانۋدىڭ جاڭا ەرەجەسى، وسىنىڭ بارىندە جۇمانعاريننىڭ قولتاڭباسى جاتىر. اقوردا ءۇشىن رەفورمانىڭ ساپاسى مەن ونىڭ توڭىرەگىندەگى داۋ-دامايدان گورى، پروتسەستىڭ توقتاپ قالماۋى جانە بەلگىلەنگەن مەرزىمدە ىسكە قوسىلۋى ماڭىزدىراق بولدى ما دەپ ويلايمىز.

فيسكالدىق ساياساتتى كۇشەيتۋ، بيۋدجەت تەسىكتەرىن جاماۋ جانە كولەڭكەلى ەكونوميكامەن كۇرەس سياقتى اۋىر مىندەتى ورىنداۋدا بەكتەنوۆ-جۇمانعارين تاندەمىنە تولىق كارت-بلانش بەرىلدى دەۋگە نەگىز بار.

Abai.kz