وسى فودا حالىققا نەسيە بەرۋ كولەمى ءوسۋىن توقتاتار ەمەس، ال شىلدە ايىندا تۇتىنۋشىلىق زاەمدار بويىنشا ورتاشا سىياقى ستاۆكاسى 22,5%-عا دەيىن كوتەرىلدى.

2026 جىلدىڭ باسىنان بەرى قازاقستاننىڭ ەكىنشى دەڭگەيلى بانكتەرى 1,396 ترلن تەڭگە تازا پايدا تاپتى. بۇل وتكەن جىلدىڭ ۇقساس كەزەڭىمەن سالىستىرعاندا 14,9%-عا از. سونىمەن بىرگە، قر قارجى نارىعىن رەتتەۋ جانە دامىتۋ اگەنتتىگىنىڭ (قنردا) مالىمەتىنشە، 1 تامىزداعى جاعداي بويىنشا بانك سەكتورىنىڭ اكتيۆتەرى 75,6 ترلن تەڭگەگە دەيىن وسكەن.

جەكە تۇلعالارعا بەرىلەتىن نەسيەلەر وسۋدە بانكتەردىڭ جالپى نەسيە پورتفەلى 42,1 ترلن تەڭگەگە جەتتى. تەك شىلدە ايىندا بۇل كورسەتكىش 0,4%-عا، ال جىل باسىنان بەرى 4,8%-عا ۇلعايدى. ءوسىمنىڭ باستى درايۆەرى — حالىققا بەرىلگەن زاەمدار.

• جەكە تۇلعالار نەسيەسى: ءبىر ايدا 1,2%-عا ءوسىپ، 26,1 ترلن تەڭگەنى قۇرادى.

• تۇتىنۋشىلىق زاەمدار: نەگىزىنەن كەپىلسىز نەسيەلەندىرۋ ەسەبىنەن 0,7%-عا ارتىپ، 17,4 ترلن تەڭگەگە جەتتى.

• يپوتەكا پورتفەلى: 2,4%-عا ۇلعايىپ، 7,6 ترلن تەڭگە بولدى.

بۇعان قوسا، حالىق ءۇشىن نەسيە قىمباتتاي ءتۇستى. تەڭگەلىك زاەمدار بويىنشا ورتاشا سارالانعان ستاۆكا شىلدەدە 20,3%-عا دەيىن (ماۋسىمدا 19,5% بولعان) ءوستى. ال تۇتىنۋشىلىق نەسيەلەر بويىنشا ستاۆكا بىردەن 1,5 پايىزدىق تارماققا ءوسىپ، 22,5%-دى قۇرادى.

بيزنەس قارىزىنىڭ ءبىر بولىگىن وتەدى بيزنەسكە بەرىلگەن نەسيەلەر پورتفەلى شىلدەدە 0,7%-عا تومەندەپ، 16 ترلن تەڭگە بولدى. ءىرى بيزنەسكە ارنالعان زاەمدار 1,6%-عا (4,9 ترلن تەڭگەگە دەيىن), ال شاعىن جانە ورتا بيزنەسكە ارنالعان نەسيەلەر 1%-عا (7,7 ترلن تەڭگەگە دەيىن) ازايعان.

قنردا بۇل تومەندەۋدى تەڭگەنىڭ نىعايۋى اياسىندا ۆاليۋتالىق نەسيەلەردىڭ قايتا باعالانۋىمەن جانە ءىرى مەرزىمنەن بۇرىن وتەۋلەرمەن بايلانىستىرادى. سونىمەن بىرگە، شىلدەدە بيزنەسكە 2,1 ترلن تەڭگە كولەمىندە جاڭا نەسيە بەرىلدى، بۇل وتكەن جىلعى كورسەتكىشتەن 23,6%-عا ارتىق ء(ىرى كومپانيالارعا بەرىلگەن زاەمدار 40,8%-عا وسكەن).

مەرزىمى وتكەن قارىزدار ۇلەسى 4,1% دەڭگەيىندە ساقتالدى بانك سەكتورى بويىنشا 90 كۇننەن استام مەرزىمى وتكەن نەسيەلەردىڭ (NPL) ۇلەسى وزگەرىسسىز قالىپ، 4,1%-دى (1,9 ترلن تەڭگە) قۇرادى.

• حالىق اراسىندا: كورسەتكىش 4,8%-دان 4,7%-عا دەيىن تومەندەدى (1,2 ترلن تەڭگە).

• بيزنەس اراسىندا: كەرىسىنشە، 0,1 پايىزدىق تارماققا ءوسىپ، 3,9%-عا جەتتى (625 ملرد تەڭگە).

قازاقستاندىقتار بانكتەردە 28,4 ترلن تەڭگە ساقتاۋدا جەكە تۇلعالاردىڭ دەپوزيتتەرى شىلدەدە 1,3%-عا ءوسىپ، 28,4 ترلن تەڭگەگە جەتتى. كومپانيالاردىڭ سالىمدارى 1,8%-عا ارتىپ، 22,5 ترلن تەڭگەنى قۇرادى.

رەزيدەنتتەردىڭ جالپى دەپوزيتتەرى 50,9 ترلن تەڭگەگە جەتتى. بۇل رەتتە ۆاليۋتالىق سالىمداردىڭ ۇلەسى (دوللارلانۋ دەڭگەيى) ماۋسىمداعى 19,7%-دان 1 تامىزدا 19,1%-عا دەيىن تومەندەدى.

بانك سەكتورىنىڭ جالپى جاعدايى 1 تامىزداعى مالىمەت بويىنشا قازاقستاندا 23 ەكىنشى دەڭگەيلى بانك جۇمىس ىستەيدى (ونىڭ ىشىندە 10 ەنشىلەس بانك جانە مەملەكەتتىڭ 100% قاتىسۋى بار 1 بانك).

سەكتور اكتيۆتەرى شىلدەدە 1,9%-عا ءوسىپ، 75,6 ترلن تەڭگەگە جەتتى. جوعارى ءوتىمدى اكتيۆتەر 23,2 ترلن تەڭگەنى نەمەسە بارلىق اكتيۆتەردىڭ 30,7%-ىن قۇرادى. بانك اكتيۆتەرىنىڭ رەنتابەلدىلىگى (ROA) 3,7%-دان 3,5%-عا، ال كاپيتال رەنتابەلدىلىگى (ROE) 24,1%-دان 23,2%-عا تومەندەدى.

Abai.kz