ءانشى ديماش قۇدايبەرگەن قازاق تازىسى كۇنىنە وراي Instagram پاراقشاسىندا مەملەكەت باسشىسىنىڭ سايگۇلىگىمەن جانە تازىلارىمەن تۇسكەن سيرەك فوتوسۋرەتتەرىن جاريالادى. ونەر يەسى قاسىم-جومارت توقاەۆتىڭ وزىنە تازى سىيلاعانىن جانە وعان «عارىشكەر» دەپ ات قويعانىن ايتتى.

العاشقى فوتودا ءانشى قازاقستاندىقتارعا جاقسى تانىس پرەزيدەنتتىڭ «اقجان» اتتى تۇلپارىمەن بەينەلەنگەن. ديماش مەملەكەت باسشىسىنىڭ اتىمەن سەرۋەندەۋدى «ۇلكەن مارتەبە» دەپ باعالادى. ەكىنشى سۋرەتتە ءارتيستىڭ جانىندا پرەزيدەنتتىڭ نەنسي جانە ناۋرىز ەسىمدى تازىلارى بار. ديماش وسىنداي بىرەگەي كادرلار ءۇشىن پرەزيدەنت ترك-نا العىس ءبىلدىردى.

3 قىركۇيەكتە قازاقستان العاش رەت قازاق تازىسى مەن توبەتى كۇنىن اتاپ وتۋدە. بۇل مەرەكە اتاۋلى كۇندەر كۇنتىزبەسىنە 2026 جىلى ەنگىزىلدى.

تازى مەن توبەت عاسىرلار بويى قازاق حالقىنىڭ تۋرمىس-تىرشىلىگىنىڭ اجىراماس بولىگى بولعان. جۇيرىك تازىلاردى اڭشىلىققا سالسا، الىپ ءارى قايراتتى توبەتتەردى ءتورت تۇلىكتى قورىپ، كۇزەتۋگە پايدالانعان. تازىعا ۇقساس يتتەردىڭ بەينەلەرى كونە پەتروگليفتەردە دە كەزدەسەدى.

XX عاسىردا ەكى تۇقىمنىڭ دا سانى كۇرت ازايا باستادى. ولاردى جويىلىپ كەتۋدەن ساقتاۋ ماقساتىندا 2023 جىلى ارنايى زاڭ قابىلداندى. قازىرگى ۋاقىتتا اسىل تۇقىمدى جۇيەدە 4 مىڭعا جۋىق تازى تىركەلگەن. ال توبەتتەردىڭ ناقتى سانى ءالى ەسەپتەلىپ جاتىر — بۇل ءۇشىن ماماندار 2026–2027 جىلدارى وڭىرلەرگە ارنايى ەكسپەديتسيالار ۇيىمداستىرۋدا.

Abai.kz