ارمان ورازبايۇلى قىرىقباەۆ قازاقستان رەسپۋبليكاسىنىڭ مادەنيەت جانە اقپارات ءمينيسترى بولىپ تاعايىندالدى دەگەن حابار جەتتى استانادان.

مەملەكەت باسشىسى قاسىم-جومارت توقاەۆ ءتيىستى جارلىققا 2026 جىلعى 3 قىركۇيەكتە قول قويدى. ونىڭ كانديداتۋراسى وسىنىڭ الدىندا قۇرىلتايدىڭ الەۋمەتتىك-مادەني دامۋ كوميتەتىندە ماقۇلداعان بولاتىن.

بۇعان دەيىن بۇل مينيسترلىكتى ءبىراز جىلدار بويى ايدا بالاەۆا باسقارىپ كەلگەنى بەلگىلى. ارينە، بۇل جەردە ونىڭ جۇمىسىنا باعا بەرۋدەن اۋلاقپىز. دەگەنمەن، ول مينيستر بولعان جىلدارى ەلىمىزدە گەندەرلىك ساياساتتى نىعايتقان زاڭ قابىلدانعانىن ايتپاي كەتۋگە بولمايدى. ياعني، ول قاۋىپسىزدىك كەڭەسى توراعاسى ورىنباسارى قىزمەتىنە كەتكەنگە دەيىن انالار مەن بالالار قۇقىن قورعاۋ، ولارعا قامقور بولۋ مادەنيەتىنە باسىمدىق بەردى دەسەك بولادى. مۇمكىن، ءوزى دە انا بولعان سوڭ ‑ سولاي بولۋى زاڭدى شىعار...

ەندى، قر مادەنيەت جانە اقپارات ءمينسترى بولىپ ەر ازامات تاعايىندالدى...

جالپى، ءبىزدىڭ ويىمىزشا وسى سالانى ۇنەمى دە ەر ازاماتتاردىڭ باسقارعانى دۇرىس سياقتى. بۇل ايەل زاتىن كەمسىتۋ ەمەس، بۇل – جالپى قازاق بولمىسىنا، داستۇرىنە ساي قۇبىلىس. سەبەبى، مادەنيەت دەگەنىمىز – ۇلتتىڭ ءبۇتىن بولمىسىن، ونىڭ ءدىلىن، پسيحولوگيالىق كەلبەتىن، ونەرىن، ادەبيەتىن، عىلىمىن، فيلوسوفياسىن ايقىندايتىن رۋحاني الەم.

بۇگىنگى زاماندا الەم ەلدەرى اراسىندا تەك ەكونوميكالىق قانا ەمەس، رۋحاني تۇرعىداعى قاقتىعىستار، استىرتىن مايداندار ءورشىپ بارادى. وسى كەزدە بىزدەگى رۋحاني تۇتقا دا جاۋىنگەرلىك سيپاتقا يە بولۋى ءتيىس. ەڭ الدىمەن، ەلى مەن جەرىن قورعايتىن ەر ازاماتتاردى تاربيەلەۋ – ەر ازاماتتىڭ قولىنان كەلەر ءىس بولسا كەرەك. قازاق ايتادى: «اكە كورگەن وق جونار، شەشە كورگەن تون پىشەر»، - دەپ. بۇل ماقال دا ءدال وسى – جاۋىنگەر ۇرپاق تاربيەلەۋ ماقساتىنان تۋعان با دەيمىز.

جۋىردا عانا پرەزيدەنتىمىز «قازاقتىڭ مۇڭى» تۋرالى ايتتى. ونىڭ دا ماعىناسى وسىعان سايادى، ياعني، ءبىز وتكەن تاريحپەن مۇڭايىپ قانا ەمەس، استارلىپ ايتقاندا، بۇگىنگى كۇننىڭ شىندىعىنا ساي جاستارىمىزدى كوزىندە وتى بار، كەز كەلگەن سالادا قيىپ تۇسەر قابىلەتتى، وتكىر، ءبىلىمدى، كوكىرەگىندە ساۋلەسى شوقتاي جانعان باعىتتا تاربيەلەۋىمىز كەرەك دەگەن ەدى. ۇلتتىق مادەنيەت دامۋىنان حالىق وسى ءۇردىستى كۇتۋدە.

ەندەشە، ۇزاق جىلدار بويى ىشكى ساياساتتا حالىقپەن ەتەنە ارالاسىپ، قوعام تىنىسى مەن حالىق بولمىسىن، ويى مەن تۇسىنىگىن، پسيحولوگياسىن، مادەني‑ۇلتتىق ەرەكشەلىگىن ابدەن مەڭگەرگەن، جالپى قازاق مادەنيەتىنىڭ شوعىرلانعان قالاسى – الماتىدا ىسىلىپ تاربيەلەنگەن، ال، بالا كەزىنەن اۋىل تاربيەسىن العان، ۇل‑قىزدىڭ قازاقى جولىن قانىنا سىڭىرگەن ارمان ورازبايۇلى قىرىقباەۆتىڭ مادەنيەت پەن اقپارات سالاسى تۇتقاسىن قولىنا العانى – ەلگە تەك جاقسىلىق اكەلەدى دەپ ۇمىتتەنەتىنىمىزدى اشىپ ايتار ەدىك.

رەداكتسيا اتىنان ارمان ورازبايۇلىن جاڭا قىزمەتىمەن قۇتتىقتاي وتىرىپ، ەلىمىزدىڭ رۋحاني بولمىسى مەن اقپاراتتىق قاۋىپسىزدىگىن نىعايتۋدا ونىڭ ءار قادامى ءساتتى بولسىن دەگەن تىلەك ايتامىز!

Abai.kz