«سەنىمەن بولاشاق» رەسپۋبليكالىق قوعامدىق بىرلەستىگى تامىز ايىندا وتكەن «اباي ونكۇندىگىنىڭ» جالعاسى رەتىندە قىركۇيەك ايىن «جۇسىپبەك ايلىعىنا» ارنايدى.

تامىز ايىندا رەسپۋبليكا كولەمىندە اباي قۇنانبايۇلىنىڭ «تولىق ادام» كونتسەپتسياسى، رۋحاني مۇراسى مەن ازاماتتىق ۇستانىمى كەڭىنەن ناسيحاتتالدى. ەندى بۇل اعارتۋشىلىق باعىت جۇسىپبەك ايماۋىتوۆتىڭ عىلىمي-پسيحولوگيالىق مۇراسىمەن جالعاسىن تابادى.

جۇسىپبەك ايماۋىتوۆ – قازاق قوعامىنداعى پسيحولوگيالىق ويدىڭ قالىپتاسۋىنا ۇلكەن ۇلەس قوسقان تۇلعا. ونىڭ «پسيحولوگيا» جانە «تاربيەگە جەتەكشى» ەڭبەكتەرىندە تۇلعانىڭ قالىپتاسۋى، تاربيە، مىنەز-قۇلىق جانە ادام پسيحولوگياسى ماسەلەلەرى جان-جاقتى قاراستىرىلادى.

«جۇسىپبەك ايلىعى» اياسىندا بىرلەستىكتىڭ بارلىق وڭىرلەرىندە اۆتورلىق لەكتسيالار، «جۇسىپبەك وقۋلارى»، كىتاپ تالقىلاۋلارى ۇيىمداستىرىلىپ، الەۋمەتتىك جەلىلەردە تۇلعالىق دامۋ، ەموتسيانى باسقارۋ، سىني ويلاۋ، مىنەز قالىپتاستىرۋ جانە ازاماتتىق سانا تاقىرىپتارىندا ارنايى كونتەنت جاريالانادى.

جوبانىڭ باستى ماقساتى – ۇلتتىق اعارتۋشىلىق مۇرانى زاماناۋي قوعامنىڭ سۇرانىستارىمەن ساباقتاستىرىپ، ءوزىن تانيتىن، ءوز پىكىرىن قالىپتاستىرا الاتىن، سانالى ءارى جاۋاپتى تۇلعانىڭ دامۋىنا ىقپال ەتۋ.

ابايدىڭ «تولىق ادام» يدەياسى مەن ايماۋىتوۆتىڭ پسيحولوگيالىق مۇراسى – سانالى تۇلعا مەن جاۋاپتى قوعام قالىپتاستىرۋعا باعىتتالعان ءبىرتۇتاس رۋحاني-تانىمدىق جول.

Abai.kz