ۇلتتىق قاۋىپسىزدىك كوميتەتى پوليتسيا ورگاندارىمەن بىرلەسىپ، پروكۋراتۋرانىڭ ۇيلەستىرۋىمەن ەل اۋماعىندا اۋقىمدى ارنايى وپەراتسيالار توپتاماسىن وتكىزدى. جىل باسىنان بەرگى جەدەل-ىزدەستىرۋ شارالارىنىڭ ناتيجەسىندە 24 قىلمىستىق توپتىڭ زاڭسىز ارەكەتىنە توسقاۋىل قويىلدى. بۇل تۋرالى ۇقك ءباسپاسوز قىزمەتى حابارلادى.

ارنايى وپەراتسيالار بارىسىندا بوپسالاۋ، ادام ۇرلاۋ، قارۋدى زاڭسىز ساقتاۋ جانە باسقا دا اسا اۋىر قىلمىستارعا قاتىسى بار دەگەن كۇدىكپەن 169-دان استام ادام قۇرىقتالدى. ۇستالعانداردىڭ اراسىندا قىلمىستىق توپتاردىڭ جەتەكشىلەرى دە بار.

ءتارتىپ ساقشىلارى شەكارا ماڭىنداعى ايماقتاردا، سونداي-اق ونەركاسىپ جانە قورشاعان ورتانى قورعاۋ سالالارىندا قىلمىستىق سحەمالار ارقىلى ۇيىمداستىرىلعان زاڭسىز كىرىس كوزدەرىن انىقتاپ، ولاردىڭ كوزىن جويدى.

قازىرگى ۋاقىتتا اتالعان فاكتىلەر بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. قىلمىستىق-پروتسەستىك كودەكستىڭ 201-بابىنىڭ تالاپتارىنا سايكەس، تەرگەۋ مۇددەسىنە بايلانىستى وزگە اقپارات جاريا ەتۋگە جاتپايدى.

ەسكە سالا كەتەيىك، بۇعان دەيىن شەكارادا جالپى قۇنى 645 ميلليون تەڭگەدەن اساتىن دەكلاراتسيالانباعان شەتەل ۆاليۋتاسى تاسىمالىنىڭ جولى كەسىلگەن بولاتىن.

Abai.kz