قاراعاندىدا عىلىم، ءبىلىم، مادەنيەت، مەديا جانە قوعامدىق ورتادا جۇرگەن بەلسەندى جاستاردىڭ قاتىسۋىمەن قازاقستان رەسپۋبليكاسى پرەزيدەنتى قاسىم-جومارت توقاەۆتىڭ «ادىلەتتى قوعامعا – شىنشىل ءسوز» جيناعىن تالقىلاۋعا ارنالعان جيىن ءوتتى.

باسقوسۋدا مەملەكەت باسشىسىنىڭ ءار كەزەڭدە ايتقان وي-تۇجىرىمدارىنىڭ بۇگىنگى رەفورمالارمەن ساباقتاستىعى ءسوز بولدى. قاتىسۋشىلار جيناقتا قامتىلعان قۇندىلىقتاردىڭ قازىرگى قوعامداعى ورنىن تالقىلاپ، ولاردىڭ جاس بۋىنعا بەرەر تاعىلىمىنا توقتالدى.

جيناققا پرەزيدەنتتىڭ وتكەن عاسىردىڭ 90-جىلدارىنان باستاپ ءار جىلدارى ايتقان وي-پىكىرلەرى ەنگىزىلگەن. ماسەلەن، 1995 جىلى «پاراسات» جۋرنالىنا بەرگەن سۇحباتىندا قاسىم-جومارت توقاەۆ «كەز كەلگەن پروبلەمانىڭ شەشىمى – ادامداردا» دەگەن پىكىر بىلدىرگەن. بۇگىندە ادام كاپيتالى مەملەكەتتىك ساياساتتىڭ ستراتەگيالىق باسىمدىقتارىنىڭ بىرىنە اينالىپ وتىر.

«كەزىندە مەملەكەت باسشىسى: «ادىلەت جولى – اۋىر جول، بىراق اۋىر بولسا دا، ودان تۋرا جول جوق»، – دەگەن ەدى. بۇگىندە ادىلەت ۇعىمى ساياسي، ەكونوميكالىق جانە الەۋمەتتىك رەفورمالاردىڭ وزەگىنە اينالدى. بۇل مىسال جىلدار بويى قالىپتاسقان ۇستانىمنىڭ  اۋقىمدى ساياسي رەفورمالارعا ۇلاسقانىن ايشىقتايدى. 90-شى جىلدارى ادام، ادىلەت، جاۋاپكەرشىلىك، ءبىلىم، كاسىبيلىك، مەملەكەت مۇددەسى تۋرالى كوزقاراسىن اشىق ايتقان پرەزيدەنتتىڭ بۇل ويلارى ۋاقىت سىنىنان ءوتىپ، بۇگىندە مەملەكەتتىك ساياساتتىڭ وزەگىنە اينالدى»، - دەدى قاراعاندى وبلىسى اكىمىنىڭ ورىنباسارى الىبەك الدەنەي.

جيىندا ادەبيەتتىڭ قوعامدىق ويعا ىقپالى، تاريحتان تاعىلىم الۋ، ەل بىرلىگى مەن ورتاق قۇندىلىقتار، كونستيتۋتسيا جانە ازاماتتىق جاۋاپكەرشىلىك، عىلىم مەن ءبىلىمنىڭ ەل دامۋىنداعى ءرولى كەڭىنەن تالقىلاندى. سونداي-اق قازاق ءتىلىن جاڭا ءبىلىم مەن تەحنولوگيانىڭ تىلىنە اينالدىرۋ، جاساندى ينتەللەكتىنى قوعام يگىلىگىنە پايدالانۋ، جاستاردىڭ ءبىلىمى مەن ەڭبەگى، ازاماتتىق ۇستانىمى جانە اقپارات كەڭىستىگىندەگى شىنشىلدىق ماسەلەلەرى كوتەرىلدى.

قاتىسۋشىلاردىڭ پىكىرىنشە، ادىلەتتى قوعام قالىپتاستىرۋ – تەك مەملەكەتتىڭ ەمەس، ءار ازاماتتىڭ ورتاق مىندەتى. ادال ەڭبەك، ءبىلىم مەن بىلىك، ازاماتتىق جاۋاپكەرشىلىك جانە ەل مەن جەرگە دەگەن جاناشىرلىق قوعام دامۋىنىڭ ماڭىزدى نەگىزدەرى بولىپ قالا بەرەدى.

جيىن سوڭىندا جاستارعا ارنالعان جاڭا كىتاپحانا اشىلدى. ورتالىقتا قازاق ادەبيەتى مەن الەم ادەبيەتىنىڭ شىعارمالارى جيناقتالعان. كىتاپحانا وقىرمانداردىڭ كىتاپ وقىپ، ءبىلىمىن تولىقتىرۋىنا مۇمكىندىك بەرۋمەن قاتار، ەركىن پىكىر الماسىپ، جاڭا يدەيالاردى تالقىلايتىن كوۆوركينگ الاڭى رەتىندە دە قىزمەت اتقارادى.

Abai.kz