اقتوبە قالاسىندا قازاقستان مۇسىلماندارى ءدىني باسقارماسىنىڭ ۇيىمداستىرۋىمەن وتكەن رەسپۋبليكالىق قۇران جارىسى مارەسىنە جەتتى.

«بۇل بايقاۋدا تەك جۇلدە العاندار عانا جەڭىسكە جەتكەن جوق. قۇران ءۇشىن جول ءجۇرىپ كەلگەن ءاربىر قاتىسۋشى – جەڭىمپاز. كۇن سايىن قۇران جاتتاۋعا ۋاقىت بولگەن شاكىرت – جەڭىمپاز. بالاسىنا قۇران ۇيرەتۋگە جاعداي جاساعان اتا-انا – جەڭىمپاز. شاكىرتىنىڭ ءاربىر ءارپىن تۇزەپ، ءاربىر سۇرەسىن تىڭداعان ۇستاز – جەڭىمپاز. سەبەبى قۇران جولىنداعى ەڭ ۇلكەن جەڭىس – اللانىڭ رازىلىعىنا ۇمتىلۋ. قاسيەتتى قۇراننىڭ شاراپاتى بارشامىزعا جاۋسىن!» دەدى قاريلاردى ماراپاتتاۋ راسىمىندە باس ءمۇفتي ناۋرىزباي قاجى تاعانۇلى.

ەكى كۇنگە جالعاسقان جارىستا 1-ورىندى ماڭعىستاۋلىق قاري راحىمجان ەرجانۇلى يەلەنىپ، جاڭا اۆتوكولىكتى قانجىعاسىنا بايلادى.
2-ورىن (5 000 000 تگ.) ۇلىتاۋ وبلىسىنان كەلگەن احماد ماحمادرادجابۇلىنا بۇيىردى. 3-ورىنعا (4 000 000 تگ.) نۇرتىلەۋ سەرىكۇلى (قىزىلوردا وبلىسى) لايىق دەپ تانىلدى. 4-ورىندى (2 000 000 تگ.) بەكزات دۋلاتۇلى (اقتوبە وبلىسى) يەلەندى. ال جۇلدەلى 5-ورىن (1 500 000 تگ.) مانسۇرحان سارۆارحانۇلىنا (قاراعاندى وبلىسى) بۇيىردى. سونىمەن قاتار قۇراندى مانەرلەپ وقۋ جانە قۇراننىڭ 20, 10 پاراسىن جاتقا وقۋ بويىنشا سايىسقا تۇسكەن قاريلارعا دا قارجىلاي سىيلىق بەرىلدى.

سونداي-اق سايىسقا تۇسكەن ەڭ جاس قاريلار – احمەت نۇرلانۇلى (شقو، 9 جاستا) مەن ءابدىلازيز ءابدۋلباسيت (قاراعاندى وبلىسى، 9 جاستا) «كورەرمەن كوزايىمى» نوميناتسياسى بويىنشا قارجىلاي (300 000 تەڭگە) سىيلىققا يە بولدى. سايىسقا ەلىمىز بويىنشا 80 قاري قاتىستى.

قۇران كارىمدى جاتقا جانە مانەرلەپ وقۋدان حV رەسپۋبليكالىق بايقاۋىنىڭ باس دەمەۋشىسى – بەلگىلى مەتسەنات، ءدىن جاناشىرى ابلازيموۆ باحاريدين نۇعمانۇلى.

Abai.kz