قاراعاندىدا وڭتۇستىك-شىعىس پەن كوگىلدىر توعاندار ىقشاماۋداندارىنىڭ ارالىعىندا جاڭا قالالىق اۋدان قالىپتاسىپ كەلەدى. مۇندا تۇرعىن ۇيلەرمەن قاتار الەۋمەتتىك، سپورتتىق جانە كولىك ينفراقۇرىلىمى دامىپ، اۋماعى شامامەن 200 گەكتاردى قۇرايتىن ەكوپارك قۇرىلىپ جاتىر.

قازىردىڭ وزىندە جاڭا اۋدان اۋماعىندا 26 كوپقاباتتى ءۇي بوي كوتەردى. الداعى ۋاقىتتا مۇندا 55-كە دەيىن تۇرعىن ءۇي كەشەنىن سالۋ جوسپارلانعان. جاڭا نىساندار 7 مىڭنان استام پاتەردى پايدالانۋعا بەرۋگە مۇمكىندىك بەرەدى.

بۇدان بولەك، بەس مەكتەپ، جەتى بالاباقشا جانە اۋرۋحانا كەشەنىن سالۋ كوزدەلگەن.

جوبانىڭ ماڭىزدى باعىتتارىنىڭ ءبىرى – سپورت ينفراقۇرىلىمىن قالىپتاستىرۋ. سپورت كلاستەرىنە 74 گەكتار اۋماق بولىنگەن. مۇندا جالپى سانى توعىز نىسان ورنالاسادى. قازىردىڭ وزىندە «شاحتەر» فۋتبول اكادەمياسىنىڭ قۇرىلىسى باستالدى. نىساندى Freedom Holding Corp قاراعاندى وبلىسىنىڭ اكىمدىگىمەن جاسالعان مەموراندۋم اياسىندا سالىپ جاتىر.

كلاستەر اۋماعىندا ۋەفا-نىڭ ءتورتىنشى سانات تالاپتارىنا ساي كەلەتىن ستاديون دا بوي كوتەرەدى.

سونىمەن قاتار سپورت كلاستەرىنىڭ قۇرامىنا وننان استام وليمپيادالىق سپورت تۇرىنە ارنالعان امبەباپ سپورت ارەناسى، جەڭىل اتلەتيكا مانەجى جانە ۇزىندىعى 400 مەترلىك جۇگىرۋ جولى، ەكى حوككەي كورتى مەن ءۇش ويىن زالى بار مۇز ارەناسى كىرەدى.

مۇندا سپورت مەكتەبى، ينتەرنات جانە كوللەدج دە ورنالاسادى. كلاستەردە ءبىر مەزگىلدە 500-دەن استام سپورتشى ءبىلىم الىپ، جاتتىعىپ، تۇرا الادى.

جوبانىڭ تاعى ءبىر اۋقىمدى بولىگى – جاسىل ايماق.

شامامەن 200 گەكتار اۋماقتا ەكوپارك جاساقتالىپ جاتىر.

سالىستىرۋ ءۇشىن ايتار بولساق، قاراعاندىنىڭ ورتالىق پاركىنىڭ اۋماعى شامامەن 50 گەكتار.

بۇگىندە مۇندا 4 مىڭعا جۋىق اعاش وتىرعىزىلدى. جاس كوشەتتەردى سۋارۋ ءۇشىن تامشىلاتىپ سۋارۋ جۇيەسى ورناتىلعان. كوگالداندىرۋ جۇمىستارى الداعى ۋاقىتتا دا جالعاسادى.

— جاڭا اۋدان ءۇشىن تۇرعىن ءۇي قۇرىلىسىنىڭ اۋقىمدى جاسىل ايماقپەن ۇيلەسىم تابۋىنىڭ ماڭىزى زور. الداعى ءۇش-بەس جىلدا بۇل اۋماق تولىققاندى ەكولوگيالىق كەڭىستىككە اينالادى، – دەدى قاراعاندى قالاسىنىڭ اكىمى مەيرام كوجۋحوۆ.

كولىك ينفراقۇرىلىمىن دامىتۋعا دا باسىمدىق بەرىلىپ وتىر. قازىر وڭتۇستىك-شىعىس پەن مايقۇدىقتى جالعايتىن، ۇزىندىعى شامامەن 6 شاقىرىم بولاتىن جاڭا ءتورت جولاقتى ماگيسترالدىڭ قۇرىلىسى باستالدى. جول بويىنا جارىقتاندىرۋ جەلىسى تارتىلىپ، تروتۋارلار، اۆتوتۇراقتار مەن ۆەلوجولدار قاراستىرىلادى.

جاڭا ماگيسترال قالانىڭ ەكى ءىرى تۇرعىن اۋدانى اراسىنداعى كولىك قاتىناسىن جاقسارتىپ، ولاردىڭ اراسىنداعى بايلانىستى كۇشەيتەدى. مايقۇدىقتا شامامەن 176 مىڭ ادام تۇرسا، وڭتۇستىك-شىعىستاعى تۇرعىندار سانى 120 مىڭعا جۋىقتايدى.

— جاڭا ماگيسترال ەكى اۋدان اراسىنداعى بايلانىستى نىعايتىپ قانا قويماي، وعان ىرگەلەس اۋماقتاردىڭ دامۋىنا تىڭ سەرپىن بەرەدى، – دەدى مەيرام كوجۋحوۆ.

قوسىمشا ءبىلىم بەرۋ ينفراقۇرىلىمى دا كەڭەيىپ كەلەدى. مايقۇدىقتا ەكى كورپۋستان تۇراتىن وقۋشىلار سارايى سالىنىپ جاتىر. ونىڭ ءبىر كورپۋسىندا روبوتوتەحنيكانى قوسا العاندا، تەحنيكالىق باعىتتاعى ۇيىرمەلەر، ەكىنشىسىندە سپورت سەكتسيالارى ورنالاسادى.

وڭتۇستىك-شىعىستا، بايكەن ءاشىموۆ كوشەسى اۋدانىندا تاعى ءبىر جاڭا قوعامدىق كەڭىستىك اشىلدى. ونىڭ اۋماعى 50 مىڭ شارشى مەتردەن اسادى. مۇندا جارىقتاندىرۋ جۇيەسى ورناتىلىپ، جاڭبىر سۋىن اعىزاتىن جۇيە جاسالدى جانە اسفالت توسەلدى.

Abai.kz