اقتاۋدا جولاۋشىلار تاسىمالىن جۇيەلەۋگە جانە ءوڭىر تۇرعىندارى مەن قوناقتارىنا كورسەتىلەتىن كولىك قىزمەتىنىڭ ساپاسىن ارتتىرۋعا مۇمكىندىك بەرەتىن جاڭا اۆتوۆوكزالدىڭ قۇرىلىسى جالعاسۋدا.

جوبانىڭ جالپى قۇنى – 2,5 ملرد تەڭگە. اۆتوۆوكزال 36-شاعىناۋدانداعى №8 وندىرىستىك ايماقتا، 15 گەكتار اۋماقتا ورنالاسقان. جوبالىق قۋاتى نىساننىڭ تاۋلىگىنە 10 مىڭعا دەيىن، ال ساعاتىنا 550 جولاۋشىعا دەيىن قىزمەت كورسەتۋىنە مۇمكىندىك بەرەدى.

بۇگىندە نىساننىڭ قۇرىلىس جۇمىستارىنىڭ ورىندالۋ دەڭگەيى 72%-دى قۇرايدى. سىرتقى جۇمىستار 95%-عا اياقتالعان. قازىرگى ۋاقىتتا قۇرىلىسشىلار ىشكى ارلەۋ جۇمىستارىن جۇرگىزىپ، ينجەنەرلىك جۇيەلەردى مونتاجداۋدا جانە ىرگەلەس اۋماقتى اباتتاندىرۋ جۇمىستارىن اتقارۋدا.

نىسان پايدالانۋعا بەرىلگەننەن كەيىن جاڭا اۆتوۆوكزالعا 29 باعىتتى، ونىڭ ىشىندە 18 اۋدانارالىق جانە 11 قالالىق مارشرۋتتى كوشىرۋ جوسپارلانۋدا. بۇل باعىتتارعا بارلىعى 243 اۆتوبۋس تارتىلعان. بۇل جولاۋشىلار تاسىمالىن ورتالىقتاندىرۋعا جانە اقتاۋ مەن وبلىس اۋداندارى اراسىنداعى كولىك قاتىناسىن رەتكە كەلتىرۋگە مۇمكىندىك بەرەدى.

عيماراتتىڭ جالپى اۋدانى – 7,5 مىڭ شارشى مەتر. ءۇش قاباتتى كەشەندە كۇتۋ زالى، كاسسالار، باگاج ساقتاۋ كامەراسى، انا مەن بالا بولمەسى، بالالار الاڭى، مەديتسينالىق پۋنكت، اسحانا، قوناقۇي، نامازحانا جانە ۋچاسكەلىك پوليتسيا پۋنكتى قاراستىرىلعان.

قازىرگى ۋاقىتتا نىساندا ءورت قاۋىپسىزدىگى، جەلدەتۋ جانە سالقىنداتۋ جۇيەلەرى دە ورناتىلۋدا. قۇرىلىس الاڭىندا 80 ادام جانە 8 تەحنيكا جۇمىس ىستەپ جاتىر.

اۆتوۆوكزالدى پايدالانۋعا بەرۋ 2026 جىلدىڭ ءتورتىنشى توقسانىنا جوسپارلانعان. جاڭا نىسان جولاۋشىلاردىڭ جايلىلىعى مەن قاۋىپسىزدىگىن ارتتىرۋعا، كولىك قىزمەتتەرىنىڭ ساپاسىن جاقسارتۋعا جانە وڭىردەگى جولاۋشىلار تاسىمالىنىڭ نەعۇرلىم قولايلى جۇيەسىن قالىپتاستىرۋعا مۇمكىندىك بەرەدى.

Abai.kz