قازاقستاندا مەكتەپ وقۋشىلارىن تەگىن تاماقپەن قامتۋعا 210 ملرد تەڭگە ءبولىندى.

قازاقستاندا 1–4 سىنىپتىڭ 1,4 ملن وقۋشىسى جانە الەۋمەتتىك وسال ساناتتاعى 5–11 سىنىپتاردىڭ 230 مىڭنان استام بالاسى مەكتەپتە تەگىن ىستىق تاماقپەن قامتىلدى. بۇل ماقساتقا 2026 جىلى 210 ملرد تەڭگە قاراستىرىلعان. بۇل تۋرالى ۇكىمەتتە وتكەن كەڭەستە ايتىلدى.

بالالارعا ارنالعان قولدانىستاعى الەۋمەتتىك كەپىلدىكتەر تۋرالى وقۋ-اعارتۋ ءمينيسترى جۇلدىز سۇلەيمەنوۆا باياندادى. بولىنگەن قارجىنىڭ اشىقتىعىن ارتتىرۋ ءۇشىن تاماقتانۋ ەسەبى «الەۋمەتتىك ءاميان» جۇيەسىمەن بىرىكتىرىلگەن: اۆتوماتتاندىرىلعان بۇل جۇيە ءار وقۋشىنىڭ تاماقتانۋ فاكتىسىن، كۇنىن جانە ءدال ۋاقىتىن تىركەپ وتىرادى.

بۇعان دەيىن مەملەكەت باسشىسى وقۋشىلاردى تەگىن ىستىق تاماقپەن قامتاماسىز ەتۋ تۋرالى ايتا كەلە: «گۇلدەنگەن سوتسياليزم» تۇسىندا دا مۇنداي قامقورلىق بولماعان», — دەپ اتاپ وتكەن ەدى.

مەكتەپتەردەگى ەكولوگيالىق ءبىلىم مەن اعارتۋ»

وقۋ-اعارتۋ مينيسترلىگىنىڭ مالىمەتىنشە، ەكولوگيا تاقىرىبى جاراتىلىستانۋ، گەوگرافيا، بيولوگيا، حيميا، فيزيكا جانە تەحنولوگيا پاندەرىنىڭ باعدارلامالارىنا بىرىكتىرىلگەن.

• «جاسىل كلۋبتار»: ەلىمىزدىڭ مەكتەپتەرىندە 4 مىڭنان استام «جاسىل كلۋب» بىرلەستىگى جۇمىس ىستەيدى، ولارعا 125 مىڭنان استام بالا قاتىسادى.

• ProEko جوباسى: «ProEko» رەسپۋبليكالىق ەكولوگيالىق جوبالار كونكۋرسىنا 38,7 مىڭ وقۋشى قاتىستى.

• بىرىڭعاي ستاندارت: وسى جىلدىڭ سوڭىنا دەيىن ءبىلىم بەرۋ ۇيىمدارىندا ەكولوگيالىق اعارتۋدىڭ بىرىڭعاي ستاندارتىن قابىلداۋ جوسپارلانىپ وتىر.

ەكولوگيالىق ءبىلىم بەرۋدى ەنگىزۋدىڭ نەگىزگى تەتىگى — «جاسىل مەكتەپ» ۇلتتىق مودەلى بولماق. قازىرگى ۋاقىتتا بۇل مودەل 85 مەكتەپتە پيلوتتىق رەجيمدە سىنالۋدا، ال بولاشاقتا ونى 1 مىڭ مەكتەپكە دەيىن كەڭەيتۋ جوسپارلانعان.

پرەمەر-مينيستر وقۋ ورىندارىندا ەكولوگيالىق اعارتۋ بويىنشا جۇيەلى شارالار جۇرگىزۋدىڭ ماڭىزدىلىعىن اتاپ ءوتتى. وسىعان بايلانىستى وقۋ-اعارتۋ، عىلىم جانە جوعارى ءبىلىم مينيسترلىكتەرىنە بۇل جۇمىستى وقۋشىلار مەن ستۋدەنتتەر اراسىندا ودان ءارى كۇشەيتۋ تاپسىرىلدى.

Abai.kz