ۇقشۇ وقۋ-جاتتىعۋلارى: قازاقستاننان رەسەيگە اسكەري تەحنيكا تەمىرجول ارقىلى تاسىمالدانادى.

2026 جىلعى 24 قىركۇيەك پەن 3 قازان ارالىعىندا رەسەي فەدەراتسياسىنىڭ اۋماعىندا ۇجىمدىق قاۋىپسىزدىك تۋرالى شارت ۇيىمىنىڭ (ۇقشۇ) «ءوزارا ءىس-قيمىل — 2026», «ىزدەۋ-2026» جانە «ەشەلون-2026» وقۋ-جاتتىعۋلارىن وتكىزۋ جوسپارلانعان.

وقۋ-جاتتىعۋلارعا دايىندىق جانە ونى وتكىزۋ كەزەڭىندە، ياعني 21 قىركۇيەك مەن 5 قازان ارالىعىندا, قازاقستان رەسپۋبليكاسىنىڭ اۋماعىنان چەليابى وبلىسىنداعى (رەسەي) ميسياش ستانتسياسىنا دەيىن جانە كەرى باعىتتا تەمىرجول كولىگىمەن اسكەري تەحنيكا مەن جەكە قۇرامنىڭ جوسپارلى قوزعالىسى جۇزەگە اسىرىلادى.

وقۋ-جاتتىعۋ بارىسىندا دالالىق ساباقتار بولىپ، وندا:

• شەرۋگە دايىندىق;

• بولىمشەلەردى باسقارۋ;

• قويىلعان جاۋىنگەرلىك مىندەتتەردى ورىنداۋ ءىس-شارالارى پىسىقتالادى.

بۇل شارالار ۇقشۇ-عا مۇشە مەملەكەتتەردىڭ جاۋىنگەرلىك دايارلىق بويىنشا بەكىتىلگەن جوسپارلارىنا سايكەس ۇيىمداستىرىلۋدا. «ءوزارا ءىس-قيمىل»، «ىزدەۋ» جانە «ەشەلون» وقۋ-جاتتىعۋلارى تۇراقتى نەگىزدە ۇيىمعا مۇشە مەملەكەتتەردىڭ اۋماعىندا كەزەكپەن وتكىزىلىپ تۇرادى.

قورعانىس مينيسترلىگىنىڭ حابارلاماسىنان:

«ازاماتتاردان، بۇقارالىق اقپارات قۇرالدارىنىڭ وكىلدەرىنەن جانە الەۋمەتتىك جەلى پايدالانۋشىلارىنان تەكسەرىلمەگەن اقپاراتتى تاراتپاۋدى، تەك رەسمي دەرەككوزدەردە جاريالانعان مالىمەتتەرگە سۇيەنۋدى سۇرايمىز. جالعان اقپارات تاراتۋ جانە شىندىققا جاناسپايتىن مالىمەتتەردى جاريالاۋ قازاقستان رەسپۋبليكاسىنىڭ زاڭناماسىنا سايكەس جاۋاپكەرشىلىككە اكەپ سوعاتىنىن ەسكە سالامىز».

ايتا كەتەيىك، بۇعان دەيىن ۇقشۇ-عا مۇشە ەلدەردىڭ سىرتقى ىستەر مينيسترلەرى قازان قالاسىندا باس قوساتىنى تۋرالى حابارلانعان بولاتىن.

Abai.kz