ءسۇيىر ءتىلدى وقۋشىلار ساحنانى قالاي دۇبىرلەتتى؟

اباي مەن شاكارىمدى، مۇحتارداي زاڭعاردى دۇنيەگە كەلتىرىپ، ءسوز ونەرىنىڭ كيەلى بەسىگىنە اينالعان سەمەي توپىراعىندا جاس اقىنداردىڭ ءۇنى قايتادان اسقاقتادى.

جاقىندا شاھارداعى №38 مەكتەپ-ليتسەيىنىڭ شاڭىراعىندا تىلدەر ايلىعىنا ورايلاستىرىلعان «ءتىل – تاتۋلىق تىرەگى» اتتى ءداستۇرلى قالالىق وقۋشىلار ايتىسى ءوتىپ، بۇرامى سوزگە تولى، ولەڭى ونەگەلى جاس دارىندار ءوزارا ءسوز جارىستىردى.

ايتىس — جاي عانا ساحنالىق قويىلىم ەمەس، ول — قازاقتىڭ سۋىرىپسالمالىق شەشەندىك مەكتەبى، ويدىڭ شاپشاڭدىعى مەن ءتىلدىڭ ورامدىلىعىن تارازىلايتىن بىرەگەي مايدان دەسەك ارتىق ايتپايمىز.

رۋحى تەرەڭ، نيەتى اق شارا

بۇل شارانىڭ باستى مۇراتى — جاستاردىڭ بويىنداعى ءسوز ۇستاۋ شەبەرلىگىن شىڭداۋ، ۇلتتىق ونەردىڭ وتىن وشىرمەي، ونى كەلەسى ۇرپاققا اماناتتاۋ. ءسوز سايىسىنىڭ تىزگىنىن №38 مەكتەپ-ليتسەيىنىڭ «جەبە» جاس اقىندار-ادەبي ۇيىرمەسىنىڭ جەتەكشىسى مەدەت راقىمباەۆ ۇستاپ، جىر دوداسىنىڭ كورىگىن قىزدىردى.

مەكتەپ وقۋشىلارى بولسا دە، ساحناعا شىققان جاس ونەرپازداردىڭ ءسوز ساپتاسى، ۇيقاس قۋى مەن ءۋاج قايتارۋى بۇرىننان ولەڭ ولكەسىندە جۇرگەن تارلاندارداي ەپتىلىكتى تانىتتى.

باعا بەرگەن بىلىكتى قازىلار

جاس تالانتتاردىڭ اياق الىسىن باعامداۋ، ولاردىڭ ونەرىنە ءادىل تورەلىك ەتۋ جۇگى قازاق ايتىسىنىڭ مايتالماندارى مەن ساقا ۇستازدارىنا جۇكتەلدى:

• دامەش ومارباەۆا — قر مادەنيەت قايراتكەرى، «حالىقتىق اقىندار ورتالىعىنىڭ» جەتەكشى-ۇستازى;
• داۋلەت سمەتوۆ — قر مادەنيەت سالاسىنىڭ ۇزدىگى، بەلگىلى ايتىسكەر اقىن، حالىقارالىق ايتىس اقىندارى مەن جىرشى-تەرمەشىلەر وداعىنىڭ اباي وبلىستىق فيليالىنىڭ توراعاسى;
• ايبەك جەڭىسقازين — تانىمال ايتىسكەر اقىن، رەسپۋبليكالىق «Assyl Dombyra – 2023» ايتىسىنىڭ باس جۇلدە يەگەرى.

ءادىل قازىلار جاس اقىنداردىڭ ۇيقاس شەبەرلىگىنە، سۋىرىپسالمالىق تالانتىنا، ساحنادا ءوزىن-ءوزى ۇستاۋىنا جانە ءسوز سالماعىنا ەرەكشە ءمان بەردى.

ءسوز مەرگەندەرى كىمدەر؟

شارشى توپتا سۋىرىلىپ شىعىپ، وي ۇشقىرلىعى مەن ءسوز تاپقىرلىعىن كورسەتكەن ۇزدىكتەر انىقتالىپ، ماراپات تورىنەن كورىندى:

باس جۇلدە – قايىرعازينوۆ قايىرلى، №38 مەكتەپ-ليتسەيىنىڭ وقۋشىسى، وبلىستىق ايتىستاردىڭ جەڭىمپازى.

I ورىن – اسۋباەۆ نازار، «ىبىراي التىنسارين اتىنداعى №37 گيمنازيا».

II ورىن – امانكەلدينوۆ نۇرسۇلتان، №51 مەكتەپ;

II ورىن – بارلىباي مادينا، №50 مەكتەپ.

III ورىن – سەيسەن سارا، №45 مەكتەپ.

III ورىن – امانبەكوۆا سابينا، «ىبىراي التىنسارين اتىنداعى №37 گيمنازيا»;

III ورىن – ءتۇسىپوۆا اجار، №48 مەكتەپ

ءدۇبىرلى ولەڭ بايگەسىنە قاتىسقان بارلىق وقۋشىلار ارنايى ديپلومدارمەن، ال جاس دارىنداردى باپتاعان جەتەكشىلەرى العىس حاتتارمەن ماراپاتتالدى.

ولەڭ مەن ءان ەگىز ورىلگەن مازمۇندى كەش جاس تالانتتاردىڭ شىعارماشىلىق ىزدەنىسىنە سونى سەرپىن بەردى. سەمەي تورىندەگى بۇل ايتىس — انا ءتىلىمىزدىڭ مارتەبەسىن كوتەرىپ، سالت-ءداستۇرىمىزدى ارداقتاعان تاعىلىمدى شارا رەتىندە ەستە قالدى. توم-توم كىتاپتىڭ جۇگىن ءبىر اۋىز سوزگە سىيعىزعان جاس اقىنداردىڭ قادامى قۇتتى، ولەڭ ولكەسىندەگى ساپارى باياندى بولعاي!

Abai.kz