ازيادا-2026: ياسمينا توقسانباەۆانىڭ جارىستاعى ناتيجەسىنە قاتىستى اقپارات

27 قىركۇيەكتە قازاقستاندىق سپورتشى ياسمينا توقسانباەۆا ايچي-ناگويا-2026 ازيا ويىندارىنداعى سپورتتىق ءجۇرىس جارىسىندا قىتاي سپورتشىلارىن باسىپ وزىپ، مارەگە ءبىرىنشى بولىپ جەتتى.

جارىس اياقتالعاننان كەيىن World Athletics ەرەجەلەرىنە سايكەس ايەلدەر مەن ەرلەر اراسىندا جۇلدەلى ورىندارعا يە بولعان ءۇش سپورتشىنىڭ اياقكيىمى مىندەتتى تەكسەرۋدەن ءوتتى. تەكسەرۋ بارىسىندا تەحنيكالىق دەلەگاتتار قازاقستان وكىلى ياسمينا توقسانباەۆا پايدالانعان اياقكيىم ۇلگىسىنىڭ World Athletics ماقۇلداعان مودەلدەر تىزىمىندە جوق ەكەنىن انىقتادى.

ماسەلەنى ودان ءارى قاراۋ ءۇشىن قازاقستاندىق سپورتشىنىڭ اياقكيىمى سۋرەتكە ءتۇسىرىلىپ، ءتيىستى مالىمەتتەرمەن بىرگە رەسمي قورىتىندى الۋ ءۇشىن World Athletics-كە جولداندى. حالىقارالىق فەدەراتسيانىڭ جاۋابى كەلگەنگە دەيىن ماراپاتتاۋ ءراسىمى كەيىنگە شەگەرىلدى.

World Athletics-ءتىڭ سپورتتىق اياقكيىمگە قويىلاتىن تالاپتارى حالىقارالىق فەدەراتسيا كەڭەسىنىڭ 2026 جىلدىڭ 19 ناۋرىزىنداعى شەشىمىمەن جاڭارتىلىپ، 20 ساۋىردەن باستاپ كۇشىنە ەندى. بۇل جونىندە World Athletics-كە مۇشە بارلىق ۇلتتىق فەدەراتسياعا ءتيىستى اقپارات جولداندى. اتالعان ەرەجەلەر كۇشىنە ەنگەن ساتتەن باستاپ جارىسقا قاتىسۋشىلاردىڭ بارلىعى ءۇشىن مىندەتتى بولىپ سانالادى. ولاردى ساقتاماۋ سپورتشى ناتيجەسىنىڭ جويىلۋىنا اكەلۋى مۇمكىن.

World Athletics سپورتشى پايدالانعان اياقكيىم ۇلگىسىنىڭ جارىستاردا قولدانۋعا رۇقسات ەتىلگەن مودەلدەر قاتارىنا كىرمەيتىنىن رەسمي تۇردە راستادى. حالىقارالىق فەدەراتسيانىڭ قولدانىستاعى ەرەجەلەرىنە سايكەس مۇنداي جاعدايدا سپورتشىنىڭ ناتيجەسى جارامسىز دەپ تانىلىپ، جارىستىڭ قورىتىندى حاتتاماسىنا ءتيىستى وزگەرىس ەنگىزىلەدى.

وسى ازيا ويىندارىندا مۇنداي جاعداي بۇعان دەيىن جەتىسايىستا ونەر كورسەتكەن يراندىق سپورتشى موحيتزادەگە قاتىستى دا بولعان. تەكسەرۋ بارىسىندا ونىڭ پايدالانعان اياقكيىم ۇلگىسى دە World Athletics ماقۇلداعان مودەلدەر تىزىمىندە جوق ەكەنى انىقتالدى. ەرەجەگە سايكەس ونىڭ ناتيجەسى جويىلدى. قورىتىندى حاتتاماعا وزگەرىس ەنگىزىلگەننەن كەيىن بۇعان دەيىن ءتورتىنشى ورىندا تۇرعان قازاقستاندىق الينا چيستياكوۆا ءۇشىنشى ورىنعا كوتەرىلىپ، قولا مەدال يەلەندى.

ماسەلە تۋىنداعان ساتتەن باستاپ قازاقستان ۇوك قازاقستاندىق سپورتشىعا قاجەتتى قولداۋ كورسەتۋ جانە اپەللياتسيا بەرۋ مۇمكىندىگىن قاراستىرۋ ماقساتىندا World Athletics, Asian Athletics Association, ازيا وليمپيادالىق كەڭەسى (اوك) جانە قازاقستان رەسپۋبليكاسىنىڭ جەڭىل اتلەتيكا فەدەراتسياسىمەن بىرلەسىپ جۇمىس ىستەپ جاتىر.

قر ۇلتتىق وليمپيادا كوميتەتى

Abai.kz