25 قىركۇيەكتە Qonaev Media ەفيردەگى العاشقى جۇمىس جىلىن قورىتىندىلادى. 12 اي ىشىندە تەلەارنا ءوزىنىڭ اۋديتورياسىن قالىپتاستىرىپ، ەفير ۋاقىتىن كەڭەيتىپ، قازاقستانداعى توپ-20 تەلەارنانىڭ قاتارىنا ەندى.

تسيفرلار وزدىگىنەن-اق كوپ نارسەنى كورسەتەدى. تەلەارنانىڭ جيىنتىق قامتۋ كورسەتكىشى - 2,2 ملن بىرەگەي كورەرمەن. ورتاشا تاۋلىكتىك قامتۋ ءۇش ەسەگە، رەيتينگ سەگىز ەسەگە ءوستى. ورتاشا كورۋ ۋاقىتى 16 مينۋتتان جارتى ساعاتقا دەيىن ۇلعايدى. ياعني كورەرمەندەر تەلەارنانى ءجيى كورىپ قانا قويماي، ەفيردە ۇزاعىراق قالاتىن بولدى.

«ءبىر جىل بۇرىن تەلەارنانى ءىس جۇزىندە نولدەن باستادىق - ءوز اۋديتوريامىز ءالى قالىپتاسپاعان، ال كوماندا ەندى عانا جاساقتالىپ جاتقان ەدى. بۇگىندە تانىمال ەفيرىمىز جانە ناقتى باعدارلامالارعا قايتا ورالاتىن كورەرمەنىمىز بار. بۇل - بۇكىل كوماندانىڭ ەڭبەگىنىڭ ناتيجەسى. ءبىز ءۇشىن ونىڭ ماڭىزى كەز كەلگەن كورسەتكىشتەن جوعارى»، - دەيدى Qonaev Media ديرەكتورى قىمبات حانگەلدينا.

(سۋرەت: Qonaev Media الىندى)

قازىرگى تاڭدا Qonaev Media تاۋلىگىنە 16 ساعاتتان استام ەفيرگە شىعادى. تەلەارنانىڭ ءوز وندىرىسىندەگى 25 باعدارلاماسى بار. ولار جاڭالىقتار مەن ساراپتامادان باستاپ اۋىل شارۋاشىلىعى، مادەنيەت، الەۋمەتتىك تاقىرىپتار جانە لايفستايل باعىتتارىن قامتيدى.

ولاردىڭ قاتارىندا «اكىمگە سۇراق»، «اپتا. ماڭىزدى»، Q-start, Q-life, AGROKARTA, ETHNIC SOUNDS, «قازىنالى ولكە»، «ەلگە قىزمەت»، «تازا مەكەن» جانە «ساراپشى پىكىرى» باعدارلامالارى بار.

ەفيرلىك تور بىردەن ەكى باعىتتى ەسكەرە وتىرىپ قۇرىلدى: وڭىرلىك ەرەكشەلىك جانە جالپىۇلتتىق قامتۋ. Qonaev Media قازاقستاننىڭ بارلىق اۋماعىندا كورسەتىلەدى. سوندىقتان الماتى وبلىسىنا قاتىستى جاڭالىقتار مەن باعدارلامالاردى وڭىردەن تىس جەرلەردەگى كورەرمەندەر دە تاماشالاي الادى.

ەفير - تەلەارنانىڭ جالعىز پلاتفورماسى ەمەس. ماتەريالداردىڭ ءبىر بولىگى سايت پەن الەۋمەتتىك جەلىلەردە قايتا ۇسىنىلادى، ال كەيبىر كونتەنت باستاپقىدان وسى پلاتفورمالاردىڭ فورماتىنا بەيىمدەلىپ تۇسىرىلەدى.

تىكەلەي ەفيرلەر

جەكە باعىتتاردىڭ ءبىرى – تىكەلەي ەفيرلەر. ءبىر جىل ىشىندە ولاردىڭ سانى بەسەۋگە جەتتى. ولاردىڭ قاتارىندا ءىرى ءىس-شارالاردى اقپاراتتىق قامتۋ جانە رەسپۋبليكالىق رەفەرەندۋم كۇنى جاڭالىقتار قىزمەتىنىڭ جۇمىسى بار.

ونىڭ سىرتىندا جۇزدەگەن جاڭالىقتار ماتەريالى مەن سۇحباتتار، قازاق جانە ورىس تىلدەرىندەگى شىعارىلىمدار، ارنايى ەفيرلەر جانە جۇزدەگەن ساعاتتىق اۆتورلىق كونتەنت دايىندالدى.

العاشقى جىل ەفيرلىك توردى قالىپتاستىرۋعا جانە ءوز كورەرمەنىن تابۋعا ارنالدى. ەكىنشى جىلدا نەگىزگى ماقسات – تيىمدىلىگىن دالەلدەگەن فورماتتاردى ودان ءارى جەتىلدىرۋ.

(سۋرەت: Qonaev Media-دان الىندى)

Qonaev Media-نىڭ ءبىر جىلى: ءوءڭىر تۋرالى تەلەۆيزيا جاساۋ دەگەن نە?

وڭىرلىك تەلەارنانىڭ وزىندىك ەرەكشەلىگى بار: كوپتەگەن تاقىرىپ رەداكتسيادان ەمەس، وقيعا ورنىنان باستالادى.

بەلگىلى ءبىر ماسەلە، وقيعا نەمەسە ادام تۋرالى ماتەريال دايىنداۋ ءۇشىن جۋرناليست الدىمەن وقيعا ورنىنا بارۋى كەرەك. كەيدە بۇل وبلىستىڭ باسقا اۋدانىندا ورنالاسقان جەرگە بارۋدى، كەيىپكەرلەرمەن سويلەسۋدى، جاعدايدى زەرتتەۋدى جانە سودان كەيىن عانا تەلەۆيزيالىق ماتەريال ازىرلەۋدى تالاپ ەتەدى.

(سۋرەت:Qonaev Media-دان الىندى)

وسى ۋاقىت ارالىعىندا رەداكتسيا الماتى وبلىسىنىڭ ءارتۇرلى اۋداندارىندا تۇسىرىلىمدەر جۇرگىزىپ، ءتۇرلى ءىس-شارالاردا جۇمىس ىستەدى، ءار سالا وكىلدەرىنەن سۇحبات الىپ، قازاق جانە ورىس تىلدەرىندە جاڭالىقتار شىعاردى. ماتەريالداردىڭ ءبىر بولىگى جەكە باعدارلامالاردىڭ نەگىزىنە اينالدى.

مىسالى، «اكىمگە سۇراق» باعدارلاماسىندا رەداكتسيا ناقتى جاۋاپتى قاجەت ەتەتىن تۇرعىنداردىڭ ساۋالدارىمەن جۇمىس ىستەيدى. AGROKARTA اۋىل شارۋاشىلىعى جانە وسى سالادا ەڭبەك ەتەتىن ادامدار تۋرالى باياندايدى. «تازا مەكەن» ەكولوگيالىق جانە تۇرمىستىق ماسەلەلەرگە ارنالعان.

«قازىنالى ولكە» باعدارلاماسىندا ءوڭىردىڭ تاريحى مەن مادەني مۇراسىنا نازار اۋدارىلسا، ETHNIC SOUNDS جوباسى ونىڭ مۋزىكالىق مادەنيەتىن تانىستىرادى.

(سۋرەت: Qonaev Media-دان الىندى)

ءار فورماتتىڭ ءوز مىندەتى بار. سوندىقتان ولاردىڭ ارقايسىسىن دايىنداۋ پروتسەسى دە ەرەكشەلەنەدى. ءبىر جەردە پىكىردى جەدەل الۋ ماڭىزدى بولسا، باسقا جاعدايدا كەيىپكەردى تاۋىپ، ونىمەن مازمۇندى اڭگىمە قۇرۋ قاجەت. ال تاقىرىپتىق باعدارلامالار ءتۇسىرىلىم مەن ماتەريالدى دايىنداۋعا كوبىرەك ۋاقىتتى تالاپ ەتەدى.

سونىمەن قاتار كۇندەلىكتى ەفيردىڭ نەگىزگى بولىگىن جاڭالىقتار قۇرايدى. ءبىرىنشى جىل ىشىندە رەداكتسيا قازاق جانە ورىس تىلدەرىندە 500-دەن استام جاڭالىقتار شىعارىلىمىن، سونداي-اق 420 تەلەۆيزيالىق سيۋجەت پەن سۇحبات دايىندادى.

كەي جاعدايدا ماتەريالدى دايىنداۋعا ۋاقىت وتە از بولادى. مىسالى، تىكەلەي ەفير كەزىندە مونتاجدى كەيىنگە قالدىرۋعا نەمەسە تۇسىرىلىمنەن كەيىن كەتكەن قاتەنى تۇزەتۋگە مۇمكىندىك جوق. رەداكتور، جۋرناليستەر، رەجيسسەرلەر، تەحنيكالىق توپ جانە باسقا ماماندار ءبىر ۋاقىتتا جۇمىس ىستەپ، كەز كەلگەن وزگەرىسكە جەدەل ارەكەت ەتۋى كەرەك.

(سۋرەت: Qonaev Media-دان الىندى)

الايدا رەداكتسيانىڭ جۇمىسى ماتەريال ەفيرگە شىققاننان كەيىن اياقتالمايدى. سيۋجەت سايتتا جاريالانادى، الەۋمەتتىك جەلىلەرگە ارنالعان قىسقا ۆيدەوعا اينالۋى نەمەسە باسقا پلاتفورمادا جالعاسىن تابۋى مۇمكىن.

بۇل جۋرناليستەر ءۇشىن ءبىر ماتەريالمەن قايتا جۇمىس ىستەۋدى بىلدىرەدى: ونىڭ نەگىزگى مازمۇنىن جوعالتپاي، باسقا فورماتقا بەيىمدەۋ قاجەت.

سونىمەن بىرگە وڭىرلىك ەرەكشەلىك تەلەارنا كونتەنتىنىڭ نەگىزى بولىپ قالا بەرەدى. Qonaev Media الماتى وبلىسى تۋرالى حابار تاراتقانىمەن، ەفيرى قازاقستاننىڭ بارلىق اۋماعىن قامتيدى.

سوندىقتان ءبىر ەفيردە شاعىن ەلدى مەكەننىڭ تاريحى، اۋىل شارۋاشىلىعى تۋرالى اڭگىمە، مەملەكەتتىك ورگان وكىلىنە قويىلعان سۇراق، مادەني جوبا جانە اۋدان تۇرعىنىنىڭ قاراپايىم ءومىر تاريحى قاتار ۇسىنىلۋى مۇمكىن.

(سۋرەت: Qonaev Media-دان الىندى)

ءبىر جىل ىشىندە مۇنداي جۇمىس رەداكتسيا كومانداسىنىڭ كۇندەلىكتى تاجىريبەسىنە اينالدى.

بۇل جاعدايدا وڭىرلىك تەلەۆيدەنيە - تەك ستۋديا مەن ەفيرلىك تور عانا ەمەس. بۇل – ساپارلار، تۇسىرىلىمدەر، سۇحباتتار، مونتاج، تىكەلەي ەفيرلەر جانە رەداكتسيادان تىس جەردە بولىپ جاتقان ماڭىزدى تاقىرىپتاردى ۇنەمى ىزدەۋ.

Abai.kz