گەرات قالاسىندا قازاقستان مەن اۋعانستان كاسىپكەرلەرىنىڭ قاتىسۋىمەن بيزنەس-فورۋم ءوتتى. قر ساۋدا جانە ينتەگراتسيا ۆيتسە-ءمينيسترى اسەت ءنۇسىپوۆ باستاعان قازاقستاندىق دەلەگاتسيا قۇرامىندا اۋعان نارىعىنا شىعۋعا مۇددەلى 12-گە جۋىق وتاندىق كومپانيا بولدى.

B2B فورماتىنداعى كەزدەسۋلەر ناتيجەسىندە بىرنەشە ماڭىزدى كەلىسىمگە قول قويىلدى:

• قازاقستاندىق «WAYSTAR» جانە «Kim Rail International» كومپانيالارى اۋعاندىق «OSMAN KHALID» سەرىكتەستىگىمەن جالپى قۇنى $11 ملن بولاتىن بيداي جەتكىزۋ كەلىسىمشارتىن جاساستى.

• مايلى داقىلداردى وڭدەۋشىلەر ۇلتتىق قاۋىمداستىعىنىڭ قاتىسۋىمەن قۇنى شامامەن $10 ملن بولاتىن كۇنباعىس مايىن ەكسپورتتاۋ تۋرالى كەلىسىمگە قول جەتكىزىلدى.

ساپار اياسىندا قازاقستاندىق «Integra Construction KZ» جشس قاتىسۋىمەن سالىنعان «حاف – گەرات» تەمىرجولىنىڭ ءۇشىنشى ۋچاسكەسى سالتاناتتى تۇردە اشىلدى. سونىمەن قاتار وتاندىق بيزنەس وكىلدەرى گەرات پروۆينتسياسىنداعى يندۋستريالىق ايماقتى ارالاپ، ءمارمار وڭدەۋ، مەتالل پروكاتى، فارماتسەۆتيكا جانە سۋسىندار ءوندىرىسىنىڭ الەۋەتىمەن تانىستى.

ەكى ەل اراسىنداعى ساۋدا اينالىمى قارقىندى ءوسىپ كەلەدى. 2026 جىلدىڭ قاڭتار–شىلدە ايلارىندا تاۋار اينالىمى $581,1 ملن جەتىپ، 2025 جىلدىڭ بۇكىل قورىتىندى كورسەتكىشىنەن ($541,6 ملن) اسىپ ءتۇستى. وتاندىق ەكسپورتتىڭ نەگىزىن ۇن، بيداي، كۇنباعىس مايى، مەتالل ونىمدەرى مەن مينەرالدى تىڭايتقىشتار قۇرايدى.

كابۋل مەن گەراتتاعى قازاقستان ساۋدا ۇيلەرى، تۇراقتى ۇيىمداستىرىلاتىن بيزنەس-فورۋمدار مەن ساۋدا ميسسيالارى ەكى ەل كاسىپكەرلەرىنىڭ تىكەلەي بايلانىس ورناتىپ، ەكسپورتتى ارتتىرۋىنا كەڭ جول اشۋدا.

Abai.kz