كولۋمبيالىق ءانشى شاكيرا 18 قازاندا بىشكەكتەگى «بيشكەك ارەنا» ستاديونىندا ونەر كورسەتەدى. بۇل ونىڭ ورتالىق ازياداعى العاشقى كونتسەرتى.

«تۋر Las Mujeres Ya No Lloran World Tour» دەپ اتالادى، وعان بىشكەك الەمدىك كارتانىڭ تىكەلەي ايالداماسى رەتىندە ەندى. كونتسەرتتىڭ وتەتىنىن قىرعىزستان پرەزيدەنتىنىڭ ءىس باسقارۋشىسى قانىبەك تۋمانباەۆ جاريالادى. بيلەت ساتىلىمى 1 قازاندا باستالادى، نەگىزگى ساناتتاردىڭ باعاسى 12 مىڭنان 40 مىڭ سومعا دەيىن باعالانىپ وتىر.

ەسكى مودەل

ۇزاق ۋاقىت بويى ايماقتاعى ءىرى كونتسەرت نارىعى «ماسكەۋ ارقىلى» جۇمىس ىستەدى: گاسترولدىك مارشرۋت رەسەيدەن باستالدى، رەپەرتۋاردى ورىس ءتىلدى تەلەديدار مەن راديو ايقىندادى، پروديۋسەرلىك ينفراقۇرىلىم رەسەي كومپانيالارىنىڭ قولىندا بولدى. ورىس ەستراداسى تاڭداۋ ەمەس، ادەپكى نۇسقا بولىپ سانالدى.

مودەلدى وزگەرتىپ جاتقان ءۇش فاكتور

پلاتفورمالار. جاستاردىڭ تالعامىن ەندى تەلەديدار ەمەس، الگوريتم قالىپتاستىرادى. Spotify ايماققا 2021 جىلى كەلدى، YouTube پەن TikTok نەگىزگى ارناعا اينالدى. الگوريتمدە ءتىل شەكاراسى جوق: لاتىن پوپ، ك-پوپ، تۇرىك پوپ جانە جەرگىلىكتى ارتيستەر قاتار تۇر، ال ونداعى ورىس ەستراداسى باسەكەلەستەردىڭ ءبىرى عانا بولىپ تابىلادى.

ساياسي جاعداي. 2022 جىلدان كەيىن رەسەي ارتيستەرىنىڭ ايماقتاعى گاسترولى بۇرىنعىداي وڭاي بولا سالمادى. بۇل ورايدا ناقتى ستاتيستيكا كەلتىرە المايمىز، بىراق ناقتى باعىت ايقىن بايقالادى: ويتكەنى، تاۋەكەلى جوعارى باعىتتان بۇرىنعى مۇرىندارىن كوككە شۇيىرگەن باستى ويىنشىلار كەتىپ، بوس ورىنعا باسقالار كىرىپ جاتىر.

مەملەكەت پروديۋسەر رەتىندە. كونتسەرتتى شوۋ-بيزنەس كومپانياسى ەمەس، پرەزيدەنت باسقارماسى ۇيىمداستىرىپ وتىر، بيلەتتەر مەملەكەتتىك GovTicket سەرۆيسى ارقىلى ساتىلادى. دەمەك، بۇل نارىقتىڭ ستيحيالى تاڭداۋى ەمەس، ساياسي شەشىم: بيلىك جاڭا ستاديوندى الەمدىك جۇلدىزبەن اشىپ، ەلدى جاھاندىق كارتاعا ەنگىزۋدى كوزدەيدى.

نە وزگەرىپ جاتىر?

بۇل ارادا ەستە ۇستايتىن ءبىر جايت: جوعالىپ جاتقان ورىس مادەنيەتىنىڭ ءوزى ەمەس، ونىڭ مونوپوليالىق مارتەبەسى. ورىس ەستراداسى ايماقتىڭ جالعىز «ورتاق ءتىلى» بولۋدان قالىپ، جاستار ءۇشىن كوپتىڭ ءبىرى رەتىندە عانا تانىلسا، ال بيلىك ءۇشىن باسەكەلەس ويىنشىلاردىڭ بىرىنە اينالىپ بارادى. شاكيرا سياقتى پوپ-برەندپەن ەكراننان تانىس اۋديتورياعا تىكەلەي تاجىريبە ۇسىنادى، ال بۇل لويالدىكتى الگوريتمنەن دە مىقتى قالىپتاستىرادى. بيلەت باعاسى دا سيگنال: باسەكە «بارىنە ارنالعان ەسترادا» دەڭگەيىندە ەمەس، پرەميۋم تاجىريبە نارىعىندا ءجۇرىپ جاتىر.

قارسى دالەلدەر

ءبىر كونتسەرت ترەندتى دالەلدەمەيدى: شاكيرا ءبىر رەت كەلەدى، ال ورىس ءتىلدى كونتەنت كۇندەلىكتى ومىردە جۇرە بەرەدى، ورىس ءتىلى قالالىق قارىم-قاتىناستا ماڭىزدى كۇيىندە قالىپ وتىر. ەلدەر دە ءارتۇرلى: قازاقستاندا ۇلتتىق پوپتىڭ، وزبەكستاندا جەرگىلىكتى شوۋ-بيزنەستىڭ، كىرگىزستاندا قىرعىز ءتىلدى كونتەنتتىڭ ءوسۋى بار، ياعني رەسەي ەستراداسىنىڭ ورنىن كوبىنە جاھاندىق الپاۋىتتار ەمەس، جەرگىلىكتى يندۋستريالار باسىپ جاتىر. سونىمەن قاتار شاكيرا ورىس مادەنيەتىنىڭ ورنىنا كەلمەيدى، ونىڭ قاسىنا قوسىلادى، سوندىقتان «الماستىرۋ» دەگەن سوزدەن گورى «باسەكە» دالىرەك.

ءتۇيىن: شاكيرانىڭ بىشكەكتەگى كونتسەرتى ورىس پوپكەڭىستىگىنىڭ «ءولىمىن» ەمەس، ايماق مادەني باعدارىنىڭ كوپپوليارلى بولا باستاعانىن كورسەتەدى. ورتالىق ازيا دۇنيەنى ماسكەۋ ارقىلى كورۋدەن گورى، الەممەن تىكەلەي بايلانىس ورناتۋعا بەت بۇرىپ جاتىر. باستى ساۋال باسقا جەردە: جاھاندىق برەند پەن بۇرىنعى رەسەيلىك ىقپالدىڭ اراسىندا جەرگىلىكتى ءتىل مەن ۇلتتىق پوپ ءوز ورنىن قالاي تابادى؟ ناعىز قاۋىپ ورىس مادەنيەتىنىڭ ورنىن جاھاندىق برەند باسۋىندا ەمەس، جەرگىلىكتى داۋىستىڭ ەكى كۇشتىڭ اراسىندا ۇندەرى ءوشىپ، بۇتىنا جىبەرىپ قويعان بالانىڭ كۇنىن كەشىپ قالۋىندا دا بولۋى مۇمكىن.

قىرعىز، قازاق ءھام وزبەك مۋزىكاسى مەن شوۋبيزنەسى وسىلاردىڭ اراسىنان اداسپاي ءوز ورنىن تابا الا ما؟!

ءابىل-سەرىك الىاكبار

Abai.kz