باتىس باق-تارىنىڭ جازۋىنشا، بىرىككەن ۇلتتار ۇيىمىنىڭ (بۇۇ) كەزەكتى باس حاتشىسىن سايلاۋ ناۋقانى كۇردەلى ساياسي تىعىرىققا تىرەلگەن. 

باس حاتشىلىققا ۇمىتكەرلەردى ىرىكتەۋدىڭ العاشقى كەزەڭدەرى ناتيجەسىز اياقتالعاننان كەيىن، حالىقارالىق ساراپشىلار مەن باسىلىمدار وزدەرىنشە بولجام جاساپ، جاڭا كانديداتتاردىڭ ەسىمدەرىن تالقىلاي باستاعان. سولاردىڭ اراسىندا قازاقستان پرەزيدەنتى قاسىم-جومارت توقاەۆتىڭ دا اتى-ءجونى اتالىپ وتىر.

ۇلىبريتانيالىق Guardian نە جازدى؟

بريتاندىق بەدەلدى Guardian باسىلىمىنىڭ 21 قىركۇيەكتەگى ماقالاسىندا جازىلعان بويىنشا: بۇۇ قاۋىپسىزدىك كەڭەسىندە وتكەن ءۇش جابىق داۋىس بەرۋدىڭ ناتيجەسىندە ايقىن جەڭىمپاز انىقتالماعان. باستاپقى ءۇش بىردەي كانديداتتا دا تەڭدەي مۇمكىندىك بولعانىمەن، ۇيىم ىشىندەگى تەكەتىرەس بالاما تۇلعالاردى ىزدەۋگە ماجبۇرلەگەن...

سۋرەت: سايت سكرينى.

ال بەيرەسمي تىزىمدەردە قازاقستان پرەزيدەنتى قاسىم-جومارت توقاەۆپەن قاتار، بىرىككەن اراب امىرلىكتەرىنىڭ سىرتقى ىستەر ءمينيسترى لانا نۋسەيبەنىڭ جانە ۆەنگريانىڭ بۇرىنعى پرەمەر-ءمينيسترى ۆيكتور ورباننىڭ دا ەسىمدەرى اتالا باستاعان. دەگەنمەن، بۇل تۇلعالاردىڭ ەشقايسىسى رەسمي تۇردە كانديدات رەتىندە ءوتىنىش بەرمەگەن.

سۋرەت: سايت سكرينى.

كۇردەلى پروتسەدۋرا جانە گەوساياسي قايشىلىقتار

بۇۇ باس حاتشىسىن سايلاۋ ەرەجەسى وتە قاتاڭ:

1) ۇمىتكەردى قاۋىپسىزدىك كەڭەسىنە مۇشە 15 ەلدىڭ كەمىندە 9-ى قولداۋى ءتيىس.

2) تۇراقتى بەس مۇشە - اقش، ۇلىبريتانيا، فرانتسيا، رەسەي جانە قىتايدىڭ تاراپىنان بىردە-ءبىر ۆەتو (قارسىلىق) بولماۋى كەرەك.

«قازىرگى تاڭدا الەمدەگى گەوساياسي تەكەتىرەستىڭ ۋشىعۋىنا بايلانىستى وسى ۋاعدالاسۋشى بەس ەلدىڭ ورتاق ىمىراعا كەلۋى بۇرىن-سوڭدى بولماعان دەڭگەيدە قيىنداپ وتىر»، - دەيدى باتىس باسىلىمدارى.

ەل ىشىندە دە «توقاەۆ بۇۇ باس حاتشىلىعىنا كانديدات بولۋى مۇمكىن» دەگەن گۋ-گۋ اڭگىمەنىڭ تاراپ جۇرگەنىنە دە ءبىراز بولدى. بۇدان بولەك، 13 ناۋرىزدا Reuters اگەنتتىگى ديپلوماتيالىق ورتاداعى دەرەككوزدەرگە سۇيەنىپ، قاسىم-جومارت توقاەۆتىڭ بۇل لاۋازىمعا ءوز كانديداتۋراسىن ۇسىنۋ مۇمكىندىگىن قاراستىرىپ جاتقانىن حابارلاعان بولاتىن.

توقاەۆتىڭ ءوز ۇستانىمى قانداي؟

قازاقستان پرەزيدەنتى حالىقارالىق جانە وتاندىق باسىلىمداردىڭ بۇل بولجامدارىن بىرنەشە رەت جوققا شىعاردى:

«ۇسىنىستارعا قاراماستان، بىرىككەن ۇلتتار ۇيىمىنداعى جۇمىسقا قايتا ورالاتىن نيەتىم جوق»، - دەگەن قاسىم-جومارت توقاەۆ («تۇركىستان» گازەتىنە بەرگەن سۇحباتىندا)

سونداي-اق، 2025 جىلعى 3 قاڭتاردا «انا ءتىلى» گازەتىنە بەرگەن جاۋابىندا دا مەملەكەت باسشىسى: «جەنەۆاداعى تاجىريبەم ماعان جەتەدى», - دەپ قىسقا قايىرعان بولاتىن. ال بيىلعى تامىز ايىندا توقاەۆ الداعى پرەزيدەنت سايلاۋىنا قاتىسۋ-قاتىسپاۋ ماسەلەسىنە قاتىستى ناقتى شەشىمىن 2027 جىلى اشىق ايتاتىنىن مالىمدەدى.

قالاي بولعاندا دا، بۇۇ ىشىندەگى داعدارىس الەمدىك ساياساتتا بەيتاراپ ءارى ديپلوماتيالىق سالماعى بار تۇلعالارعا دەگەن سۇرانىستىڭ جوعارى ەكەنىن كورسەتىپ وتىر. الايدا، بۇل بولجامداردىڭ قانشالىقتى شىندىققا اينالاتىنى الداعى ۋاقىتتا قاۋىپسىزدىك كەڭەسىنىڭ كەلىسسوزدەرىنە بايلانىستى بولماق.

Abai.kz