ەسىم-سويى ەلگە بەلگىلى جازۋشى، Abai.kz اقپاراتتىق پورتالىنىڭ جەتەكشىسى داۋرەن قۋات رەسەيدەگى سوڭعى وقيعالارعا قاتىستى وسىلاي دەپ پىكىر ءبىلدىردى.

«وتكەندى ۇمىت»، «كەۋدەڭدى باس»، «كوكىرەكتەنە بەرمە» دەگەن ءسوزدى ايتسا، ورىس بيلىگى ورىستارعا ايتسا بولاتىن ەدى. ايتپادى. كرەمل بيلىگىنە انەبىر اۋمەسەر كەلدى دە بايقۇس، مۇجىق ورىستىڭ جۇرەگىندە شالاسى بىقسىپ جاتقان يمپەرشىلدىك پيعىلدىڭ وتىن كوسەپ جىبەرىپ ەدى، نە بولدى - ورىس شابالانىپ شىعا كەلەدى. سودان نە ۇتتى؟ ۇتىلدى. كۇيرەدى. رەسەي فەدەراتسياسى قازىر ىدىراۋدىڭ الدىندا تۇر. قيىر شىعىسىن قىتاي الىپ بولدى. قحر-دىڭ قازىرگى توراعاسى شي جىپىڭ ءساۋسالىم ءپۋتيننىڭ ارقاسىنان قاعىپ قويىپ، «سوعىسا بەر» دەپ وتىر. باتىسقا دا پۋتين كەرەك. انىعى: پۋتيندەي كەم اقىل، جىندىسۇرەي، ۇركەۋدە كەرەك. نەگە كەرەك؟ ونى ءسىز جاقسى بىلەسىز.

جىندىسۇرەي اتىسىپ-شابىسىپ ءجۇرىپ تيتىقتايدى، ءسويتىپ، رەسەيدى قۇرتادى. كرەمل قۇلايدى»، - دەپ جازدى داۋرەن قۋات.

كەشەلى-بەرى رەسەيدىڭ ءىرىلى-ۇساقتى قالالارىندا رۇقسات ەتىلگەن ميتينگتەردىڭ ارتى جاپپاي قاماپ-ۇستاۋعا ۇلاسىپ، بۇل شىنايى نارازىلىقتاردى قايتا وياتتى. ەل ءىشى دۇرلىگە باستادى. بۇل جايلى جازۋشى بىلاي دەيدى:

«وسى سۇمدىقتىڭ اقىرىن ورەكەڭدەر ەندى ءتۇسىنىپ جاتقان سياقتى - رەسەيدە كەشەدەن بەرى ەرەۋىل. سول ەرەۋىلدەر تولقىنىن كورىپ وتىرىپ، «وسىلار وسىدان بەس جىل بۇرىن نە ويلاعان؟» دەپ قويامىن ىشىمنەن.

ۆيدەولاردان كورگەنىم: ميليتسيا مەن ومون جاساقتارى جاستاردى جەلكەلەپ اۆتوبۋستارعا تىعىپ جاتىر. سوعىسقا اكەتپەك. جاستارى قارسى. قۇداي-اۋ، سەنىڭ قانداسىڭدى «قىسپاققا الىپ، ءتىلىن كەمسىتكەن» ەلگە بارىپ ادىلدىك تالاپ ەتپەيسىڭ بە؟ سوعىسپايسىڭ با؟ جوق، بۇل جاس بالالاردىڭ ونداي سوعىسقا بارعىسى كەلمەيدى ەكەن. سەبەبى، ورىس جاستارى ونداي سوعىستىڭ ماعىناسىزدىعىن بىلەدى ءارى وقتان قورقادى. ولىمنەن قورقادى.

ءبىر تارعىل داۋىستى قاتىندار ءجۇر باجىلداپ بالالاردى سوعىسقا جىبەرمەيمىز دەپ. ولاردىڭ باجىلىنا قاراپ جاتقان ومون جوق - ميتينگىلەتىپ الاڭعا شىققان «جەلوكپەلەردى» جەلكەدەن الىپ اسكەري ماشينالاردىڭ قورابىنا اتىپ جاتىر.

ال، سوعىستان قاشقان ورىس باياعى جالاڭ اياق، كۇس تابان بابالارىنىڭ ىزىمەن كەڭ قۇشاق قازاق جەرىنە كەلىپ جان ساۋعالاۋدا. ءبىزدىڭ بيلىك بولسا، ولاردى بوسقىنداردان ارمەن كۇتىپ قارسى الىپ، الدارىنا ءتۇسىپ قۇراق ۇشىپ ءجۇر. نەگە ويتەدى؟ بىلمەيمىن...»، - دەپ جازدى داۋرەن قۋات.

Abai.kz