قازاقستان پرەزيدەنتى بەلگيالىقتار كورولىمەن جانە پاتشايىمىمەن شاعىن قۇرامدا كەلىسسوز جۇرگىزدى. كەلىسسوز بارىسىندا پرەزيدەنت بەلگيالىقتار كورولى مەن پاتشايىمىنىڭ قازاقستانعا جاساعان العاشقى مەملەكەتتىك ساپارى ەكىجاقتى سەرىكتەستىكتىڭ جاڭا كەزەڭىنە جول اشاتىن تاريحي ۋاقيعا ەكەنىن اتاپ ءوتتى.

– ءسىزدى استانادا قارسى العانىما قۋانىشتىمىن. بۇل – مەن ءۇشىن زور مارتەبە. تاريحي ساپارىڭىز جۇرتشىلىقتىڭ ۇلكەن قىزىعۋشىلىعىن تۋدىردى. قازاقستانعا كەلگەن دەلەگاتسيا قۇرامىنا ۇكىمەت پەن ايماقتىق بيلىك، ىسكەرلىك توپتار، اكادەميالىق قاۋىمداستىق جانە بۇقارالىق اقپارات قۇرالدارى وكىلدەرى ەنگەن. ءسىز تاق مۇراگەرى رەتىندە قازاقستانعا ءۇش مارتە كەلگەن ەدىڭىز. ەلىمىزبەن قارىم-قاتىناستى دامىتۋ جونىندەگى نيەتىڭىزدى جوعارى باعالايمىز. ءسىزدىڭ قولداۋىڭىزدى ءاردايىم سەزىنەمىز، – دەدى قاسىم-جومارت توقاەۆ.

قاسىم-جومارت توقاەۆ بەلگيانى قازاقستاننىڭ ەۋروپاداعى ۋاقىت سىنىنان وتكەن سەنىمدى سەرىكتەسى دەپ سانايتىنىن جەتكىزدى.

– كەلەسى جىلى ەلدەرىمىزدىڭ اراسىندا ديپلوماتيالىق قارىم-قاتىناس ورناعانىنا 35 جىل تولادى. وسى جىلداردا شىنايى دوستىق پەن ءوزارا قۇرمەتكە نەگىزدەلگەن تىعىز قارىم-قاتىناستى جولعا قويدىق. ۇزدىكسىز ساياسي ديالوگ ىنتىماقتاستىعىمىزدىڭ بەرىك تۇعىرى ىسپەتتەس. ءبىز جەتىستىكتەرىڭىزدى ۇدايى قاراپ وتىرامىز. بۇل شىن مانىندە تاڭعالدىرادى. سىزدەردەن ۇلگى الىپ، تاجىريبەلەرىڭىزدى ۇيرەنۋىمىز قاجەت. بەلگياعا بەس جىل بۇرىن جاساعان ساپار بارىسىنداعى مازمۇندى كەلىسسوزدەردى ىقىلاسپەن ەسكە الامىن. بيىل ماۋسىم ايىندا بەلگياعا بارعان ساپارىمدا پرەمەر-مينيستر بارت دە ۆەۆەرمەن كەلىسسوز جۇرگىزىپ، سەرىكتەستىكتى نىعايتۋعا قوس تاراپ تا بەيىل ەكەنىن راستادىق، – دەدى مەملەكەت باسشىسى.

كورول فيليپپ پەن پاتشايىم ماتيلدا قوناقجايلىعى جانە سىي-قۇرمەتى ءۇشىن قازاقستان پرەزيدەنتىنە شىنايى ريزاشىلىعىن ءبىلدىردى ولار ەلىمىزدىڭ الەۋمەتتىك-ەكونوميكالىق تابىستارىنا جانە حالىقارالىق ارەناداعى بيىك ابىروي-بەدەلىنە ارنايى توقتالدى.

– قازاقستان – ءبىز ءۇشىن قارقىندى دامىپ كەلە جاتقان وتە ماڭىزدى ەل. جالپى، بەلگيا تۇتاس ورتالىق ازيا وڭىرىنە ايرىقشا قىزىعۋشىلىقپەن قارايدى. بۇل ءوڭىردىڭ ءمانى زور. مەنىمەن بىرگە ۇلكەن دەلەگاتسيا كەلدى. البەتتە، ءبىز ءبىر-ءبىرىمىزدى وتە جاقسى بىلەمىز. ەلدەرىمىز 35 جىل ىشىندە جاقسى قارىم-قاتىناس ورناتتى. ءبىز وسى تاريحي مەجەنى بىرگە اتاپ وتۋگە نيەتتىمىز. سونىمەن قاتار ىنتىماقتاستىعىمىزدى جاڭا ساپالى دەڭگەيگە كوتەرەتىنىمىزگە سەنىمدىمىن. مەنىمەن بىرگە كەلگەن دەلەگاتسيا قۇرامىنا كەلەشەككە باعدارلانعان ءتۇرلى سالانىڭ وكىلدەرى كىردى. پرەزيدەنت مىرزا، بىزبەن بىرگە ءجۇرۋ ءۇشىن جۇمىس كەستەڭىزدى وزگەرتكەنىڭىزدى بىلەمىن. وسى ىقىلاسىڭىزعا ءتانتىمىز. سوندىقتان التىن ۋاقىتىڭىزدى ءبولىپ، قۇرمەت كورسەتكەنىڭىزدى جوعارى باعالايمىز، – دەدى بەلگيالىقتار كورولى فيليپپ.

وسىدان سوڭ قاسىم-جومارت توقاەۆ بەلگيالىقتار كورولىمەن جانە پاتشايىمىمەن كەڭەيتىلگەن قۇرامدا كەلىسسوز جۇرگىزدى. اقوردادا وتكەن كەلىسسوز بارىسىندا پرەزيدەنت قازاقستان مەن ورتالىق ازياعا تاريحتا تۇڭعىش رەت مەملەكەتتىك ساپارمەن كەلگەن بەلگيالىقتار كورولىنە جانە پاتشايىمىنا ءىلتيپات ءبىلدىردى.

– وسى تاريحي ساتتە سىزدەرمەن جۇزدەسىپ، مەملەكەتتەرىمىز اراسىنداعى بەرىك دوستىقتى اتاپ ءوتۋ – مەن ءۇشىن زور مارتەبە. اسا مارتەبەلى كورول فيليپپ، حالقىڭىزعا قالتقىسىز قىزمەتىڭىزدى جوعارى باعالايمىز. ءCىز كورولدىك بيلىگىنە كەلگەلى ەلىڭىز وركەندەپ، الەمدىك ارەناداعى لايىقتى ورنىن بەكىتە ءتۇستى. حالقىڭىزعا ادالدىعىڭىز جانە بەلگيانى مەكەندەيتىن ءتۇرلى قاۋىمدار اراسىنداعى ءوزارا تۇسىنىستىكتى نىعايتۋ جولىنداعى تاباندى ەڭبەگىڭىز ءتاجدىڭ ەل بىرلىگىن ساقتاۋداعى ءرولىن ايقىنداي تۇسەدى. ءبىز دە «بىرلىگىمىز – ارالۋاندىقتا» دەگەن قاعيداتقا ايرىقشا ءمان بەرەمىز. ءاربىر ازاماتتىڭ كەلەشەگىمىزگە اتسالىسقانىن قالايمىز. كوپ جىلدان بەرى كاسىپكەرلىكتى، ءبىلىم مەن يننوۆاتسيانى دامىتۋعا ەرەكشە كۇش سالىپ كەلەسىز. بۇل – شىن مانىندە ۇلگى تۇتارلىق ىزگى ىستەر. كورول اۋلەتىنىڭ بەلگيا بيزنەسىنە ۇدايى قولداۋ كورسەتۋى شەكسىز قۇرمەتكە لايىق. اسا مارتەبەلى پاتشايىم ماتيلدا، ءسىز بۇل ساپاردىڭ ءمان-مازمۇنىن ارتتىرىپ، شىرايىن كەلتىردىڭىز. ءسىزدىڭ بالالاردى قورعاۋ، ءبىلىم بەرۋ، ادامنىڭ قادىر-قاسيەتىن قۇرمەتتەۋ ماسەلەلەرىنە كەلگەندە، ەرەكشە جاناشىرلىعىڭىز بەن قامقورلىعىڭىزعا ءتانتىمىز. بۇل يگى مۇراتتار ازاماتتارىمىزدى شىن مانىندە سۇيسىنتەدى، – دەدى مەملەكەت باسشىسى.

قاسىم-جومارت توقاەۆ قازاقستان بەلگيانى ەۋروپاداعى ۋاقىت تەزىنەن وتكەن سەنىمدى سەرىكتەسى رەتىندە قاراستىراتىنىن اتاپ ءوتتى.

– كەلەسى جىلى مەملەكەتتەرىمىزدىڭ اراسىندا ديپلوماتيالىق قارىم-قاتىناس ورناعانىنا 35 جىل تولادى. ساپارىڭىز وسى ايتۋلى مەجەنىڭ دايىندىعىنا تىڭ سەرپىن بەرەدى جانە ىنتىماقتاستىعىمىزدى ناقتى ناتيجەلەرمەن تولىقتىرا تۇسەدى. بەلگيا قازاقستاننىڭ جەتەكشى ساۋدا سەرىكتەستەرىنىڭ قاتارىنا كىرەدى. سونىمەن قاتار ەلىڭىز قازاقستان ەكونوميكاسىنا قارجى قۇيعان ەڭ ءىرى ون ينۆەستوردىڭ ءبىرى سانالادى. مۇنى قازاقستان ەكونوميكاسىنىڭ كەلەشەگىنە دەگەن سەنىمنىڭ ايقىن كورىنىسى دەپ باعالايمىن، – دەدى پرەزيدەنت.

مەملەكەت باسشىسى قازاقستان مەن بەلگيا اراسىندا كولىك-لوگيستيكا، اسا ماڭىزدى مينەرالدار، جاڭارتىلاتىن قۋات كوزدەرى، اۋىل شارۋاشىلىعى، دەنساۋلىق ساقتاۋ جانە جاساندى ينتەللەكت سالالارى بويىنشا ءوزارا ىقپالداستىقتى كەڭەيتۋگە مول مۇمكىندىك بار ەكەنىنە نازار اۋداردى.

– سىزبەن بىرگە كەلگەن مەملەكەتتىك ورگانداردىڭ، وڭىرلىك بيلىك پەن ىسكەر توپتاردىڭ وكىلدەرىنە، تانىمال عالىمدار مەن جۋرناليستەرگە ءىلتيپات بىلدىرەمىن. ەرتەڭ قازاقستان – بەلگيا ىسكەرلىك كەڭەسىنىڭ ءتورتىنشى وتىرىسىن وتكىزەمىز. بۇل باستامانىڭ مۇمكىندىكتەرىمىزدى ىسكە اسىرىپ، ورنىقتى ناتيجەگە قول جەتكىزەتىن ءتيىمدى الاڭعا اينالعانى قۋانتادى. سونداي-اق بەلگيامەن ەۋروپالىق وداق جانە باسقا دا كوپجاقتى قۇرىلىمدار اياسىنداعى ىقپالداستىعىمىزدى جوعارى باعالايمىز. جاھاندا تۇراقسىزدىق بەلەڭ العان كەزەڭدە سەنىم، قۇرمەت پەن ءوزارا تۇسىنىستىك قاعيداتتارىن ارقاۋ ەتكەن ىسكەرلىك بايلانىستاردىڭ ماڭىزى ارتا تۇسەدى. قارىم-قاتىناسىمىزدىڭ زور الەۋەتىنە سەنەمىن. ساپار اياسىنداعى ۋاعدالاستىقتاردى تولىق ىسكە اسىرۋعا بارىنشا كۇش سالامىن، – دەدى قاسىم-جومارت توقاەۆ.

بەلگيالىقتار كورولى فيليپپ قوناقجايلىق تانىتقانى ءۇشىن مەملەكەت باسشىسىنا العىس ايتىپ، بۇعان دەيىن تاق مۇراگەرى رەتىندە قازاقستانعا جاساعان ساپارلارىن ەسكە الدى.

– ءسىزدىڭ باسشىلىعىڭىزبەن ەلىڭىز دامۋدىڭ داڭعىل جولىنا تۇسكەنىنە ەرەكشە اسەرلەندىك. ساپار كەزىندە تانىسۋ جوسپارلانعان جاساندى ينتەللەكت، ەنەرگەتيكا، اتوم ەنەرگياسى سالالارى ەكى ەل ءۇشىن وتە ماڭىزدى. عالىمداردىڭ دوڭگەلەك ۇستەلدەگى پىكىرتالاسىنا كۋا بولامىز. بىزبەن بىرگە ۋنيۆەرسيتەتتەردىڭ رەكتورلارىنان، كومپانيا وكىلدەرىنەن تۇراتىن ۇلكەن دەلەگاتسيا كەلدى، – دەدى كورول فيليپپ.

سونداي-اق كەلىسسوز بارىسىندا ەكى ەلدىڭ رەسمي دەلەگاتسيا مۇشەلەرى ءسوز سويلەدى. تاراپتار كەزدەسۋ سوڭىندا كوپتەگەن باستاما كوتەرىلگەنىنە كوڭىل تولاتىنىن اتاپ ءوتىپ، ءىس جۇزىندەگى ىنتىماقتاستىقتى ودان ءارى وربىتۋگە دايىن ەكەنىن راستادى.

Abai.kz