17-18 قازان كۇندەرى استانادا «Creative Aimaq» رەسپۋبليكالىق جوباسى اياسىندا قاراعاندى وبلىسىنىڭ كرەاتيۆتى يندۋستريا وكىلدەرىنىڭ جارمەڭكەسى وتەدى، دەپ حابارلايدى ەلوردا اكىمدىگىنىڭ رەسمي سايتى.

Qazaq Creative Hub الاڭىندا ۇيىمداستىرىلاتىن ەكى كۇندىك ءىس-شارادا ءوڭىردىڭ مادەني مۇراسى، ءداستۇرلى قولونەرى، زاماناۋي ءسانى، ادەبيەتى مەن مۋزىكا ونەرى كەڭىنەن تانىستىرىلادى.

جارمەڭكەدە سۋرەتشى كارىپبەك كۇيىكوۆتىڭ كىتاپتارى، ديزاينەر گۇلنۇر جارىلحانوۆانىڭ ءسان توپتامالارى مەن قاراعاندىلىق قولونەرشىلەردىڭ اۆتورلىق تۋىندىلارى كوپشىلىك نازارىنا ۇسىنىلادى.

ءىس-شارا اياسىندا «التىن ءجىپ» ءسان كورسەتىلىمى ۇيىمداستىرىلىپ، قالي بايجانوۆ اتىنداعى كونتسەرتتىك بىرلەستىكتىڭ ونەرپازدارى ونەر كورسەتەدى. سونداي-اق دجاز كونتسەرتتەرى مەن شىعارماشىلىق شەبەرلىك ساباقتارى وتكىزىلەدى.

اتالعان جارمەڭكە استانانىڭ مادەني ءومىرىن جاڭا مازمۇنمەن تولىقتىرىپ، ەلوردانىڭ وڭىرلىك شىعارماشىلىق باستامالاردى بىرىكتىرەتىن ورتالىق رەتىندەگى ءرولىن نىعايتۋعا ىقپال ەتەدى. قالا تۇرعىندارى مەن قوناقتارى ەلىمىزدىڭ ءتۇرلى وڭىرلەرىندە قالىپتاسقان ونەر داستۇرلەرىمەن تانىسىپ، وتاندىق ديزاينەرلەر مەن قولونەرشىلەردىڭ تۋىندىلارىن تاماشالاۋعا مۇمكىندىك الادى.

سونىمەن قاتار جوبا ەلوردانىڭ كرەاتيۆتى ەكونوميكاسىن دامىتۋعا، وڭىرلىك كاسىپكەرلەردىڭ استانا نارىعىنا شىعۋىنا جانە شىعارماشىلىق قاۋىمداستىقتار اراسىنداعى ىسكەرلىك بايلانىستى كەڭەيتۋگە باعىتتالعان. مۇنداي الاڭدار وتاندىق برەندتەردىڭ تانىمالدىعىن ارتتىرۋعا، جەرگىلىكتى شىعارماشىلىق كاسىپكەرلەر مەن وڭىرلىك وندىرۋشىلەردىڭ ىنتىماقتاستىعىن دامىتۋعا مۇمكىندىك بەرەدى.

«Creative Aimaq» رەسپۋبليكالىق جوباسىن كرەاتيۆتى يندۋستريالاردى دامىتۋ قورى جۇزەگە اسىرادى. باستاما ەلىمىزدىڭ وڭىرلەرىندەگى شىعارماشىلىق الەۋەتتى تانىتۋعا، كرەاتورلاردىڭ كاسىبي دامۋىنا قولداۋ كورسەتۋگە جانە كرەاتيۆتى كاسىپكەرلىكتىڭ دامۋىنا جاعداي جاساۋعا باعىتتالعان.

Abai.kz