ايتىسكەر اقىن، ءماجىلىستىڭ ەكس-دەپۋتاتى رينات زايىت قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعىنىڭ باسشىسى قىزمەتىنە كەلدى. بۇل تۋرالى ول «Adal ADAM» YouTube ارناسىنا بەرگەن سۇحباتىندا ءوزى حابارلادى.

رينات زايىتتىڭ ايتۋىنشا، ول جاڭا لاۋازىمعا قورعانىس ءمينيسترىنىڭ شاقىرتۋىمەن قازان ايىنىڭ باسىندا كىرىسكەن.

«وسى قازان ايىنىڭ باسىندا جاڭا قورعانىس ءمينيسترىنىڭ شاقىرتۋىمەن قورعانىس مينيسترلىگىنە قاراستى ۇلتتىق اسكەري-پاتريوتتىق ورتالىققا كەلدىم. بۇل ورتالىققا اسكەري انسامبل، وركەستر، پاتريوتتىق جانە مادەني ءىس-شارالاردى ۇيىمداستىرۋ جۇمىستارى كىرەدى. جالپى، اسكەردەگى جانە اسكەرگە دەيىنگى جاستاردىڭ پاتريوتتىق ساناسىن، وتانعا دەگەن سۇيىسپەنشىلىگىن ارتتىرۋمەن اينالىسادى»، – دەدى ول.

اقىن بۇل قىزمەتكە كەلۋىنە ماڭعىستاۋدا ورىن العان قايعىلى جاعدايدان كەيىن قورعانىس سالاسىندا باستالعان اۋقىمدى رەفورمالار تۇرتكى بولعانىن اتاپ ءوتتى. مەملەكەت باسشىسى قاسىم-جومارت توقاەۆتىڭ سالانى تۇبەگەيلى قايتا قاراۋ جونىندەگى تاپسىرماسى ونىڭ وڭ شەشىم قابىلداۋىنا ىقپال ەتكەن.

«مەن ءوزىم جاڭا وزگەرىستەرگە قاتىسقاندى جاقسى كورەتىن اداممىن. سوندىقتان بۇل قىزمەتكە قۋانا-قۋانا كەلدىم. سول رەفورمانىڭ كىشكەنتاي بولسا دا ءبىر بولشەگىنە اتسالىسسام دەگەن ارمانمەن كەلدىم»، – دەپ قوسا كەتتى رينات زايىت.

انتىمدى بۇزسام قارا تاس باسسىن!

جاڭا قىزمەتكە كىرىسۋىن «بيلىككە ساتىلۋ» دەپ باعالاعاندارعا جاۋاپ بەرگەن ول الداعى ءبىر جىل ىشىندە كوزبەن كورەتىندەي وزگەرىس جاساي الماسا، مەملەكەتتىك قىزمەتتەن تۇپكىلىكتى كەتەتىنىن مالىمدەدى.

«ۋادەم – ۋادە. ءبىر جىلدا، وسىدان 12-14 ايدا ناتيجە شىعارا الماسام، انتىمدى بۇزسام قارا تاس باسسىن! ناقتى ەسەبىمدى بەرەيىن. ەگەر ىسكە اسىرا الماسام، بەتىمە ايتىڭىزدار. وندا مەن كەشىرىم سۇرايمىن دا، بۇدان بىلاي مۇنداي قىزمەتكە ءوزىم دە جولامايمىن. مەنى دە جولاتپاڭىزدار دەپ ايتۋعا ەرىك-جىگەرىم جەتەدى»، – دەدى رينات زايىت Adal Adam-عا بەرگەن سۇحباتىندا.

ونىڭ پىكىرىنشە، بۇل سالاداعى قازىرگى جاعداي كەڭەستىك ەسكى قالىپتان ارىلا الماي، توقىراۋعا ۇشىراعان. قوعامداعى سارباز بەينەسىنىڭ السىرەۋىنە توقتالعان ورتالىق باسشىسى اسكەري ورتاداعى سانانى وزگەرتۋ باستى مىندەت ەكەنىن باسا ايتتى.

«كوشەدە جاۋىنگەر كورسەك، وعان مۇسىركەپ قارايمىز. «جاۋلاپ الدى ماحاببات» دەپ ءان ايتىپ كەلە جاتادى. ونداي اسكەردەن جاۋ قورقا ما؟ اسكەر دەگەن – سەنىڭ قورعانىڭ، باتىرىڭ ەمەس پە؟ كەزىندە باتىرلاردىڭ اتىن بىلەتىن ەدىك. قازىر بالالار قازاق جاۋىنگەرىنىڭ ءتۇرى قانداي بولاتىنىن دا بىلمەيدى. ولار «ماشا مەن ايۋدى»، «فيكسيكتەردى» تانيدى. اسكەردىڭ كيىم ۇلگىسىن وزگەرتكەننەن ەشتەڭە شىقپايدى، ەڭ باستىسى سانانى وزگەرتۋىمىز كەرەك»، – دەدى رينات زايىت.

ۇلتتىق اسكەري-پاتريوتتىق ورتالىق جەتەكشىسى اسكەري انتتاعى كەيبىر قيسىنسىز تىركەستەر مەن ساپتىق اۋەندەردى وزگەرتۋ بويىنشا جۇمىس باستالىپ كەتكەنىن جەتكىزدى. ول انتتاعى «قاتارعا كىرە وتىرىپ» دەگەن ءسوز تىركەسىن سىنعا الىپ: «ادام تۇرمەگە وتىرادى، ال سارباز ساپقا تۇرادى», – دەدى.

سونىمەن قاتار ساپتا ليريكالىق نەمەسە پاتريوتتىق رۋحقا ساي كەلمەيتىن جەڭىل اندەردى ايتۋ توقتاتىلادى. ونىڭ ورنىنا بابالار جىرى مەن تاريحي داستاندى مارشتىق اۋەنگە سالىپ، ساربازداردىڭ رۋحىن كوتەرەتىن تۋىندىلاردى ەنگىزۋ تاپسىرىلدى.

مينيسترلەر مەن شەنەۋنىكتەردىڭ دە بالالارى ءاسكەرگە بارۋى ءتيىس!

سونداي-اق رينات زايىت دەپۋتاتتىق قىزمەتتە جۇرگەندە كوتەرگەن باستاماسىنان تانبايتىنىن ەسكەرتتى. ول ادىلەتتى قوعام قۇرۋ ءۇشىن مەملەكەتتىك قىزمەتشىلەردىڭ بالالارى دا ازاماتتىق بورىشىن وتەۋى كەرەك دەپ ەسەپتەيدى.

«ءمينيستردىڭ، پرەزيدەنت اكىمشىلىگى قىزمەتكەرلەرىنىڭ دە بالاسى اسكەرگە بارىپ كەلسىن. ەكى ايعا، ءۇش ايعا، ءتىپتى ءبىر جىلعا بارسىن. مەملەكەتتىك قىزمەتشى بولعىڭ كەلە مە، اكىم نەمەسە دەپۋتات بولعىڭ كەلە مە – وندا بالاڭدى اسكەرگە جىبەر. قويشىنىڭ بالاسىن جىبەرىپ قويىپ، «مەنىڭ بالام بارمايدى» دەۋ – ادىلەتتى قوعام قاعيداسىنا مۇلدە قايشى»، – دەپ تۇيىندەدى ول.

ايتا كەتەيىك، ۇلتتىق اسكەري-پاتريوتتىق ورتالىق اسكەري-مادەني شارالاردى ۇيىمداستىرۋمەن قاتار، جاستار اراسىندا وتانسۇيگىشتىك قاسيەتتەردى قالىپتاستىرۋ بويىنشا كەشەندى جۇمىستاردى جۇزەگە اسىرادى.

Abai.kz