مەملەكەت باسشىسى قاسىم-جومارت توقاەۆ رەسپۋبليكا كۇنىنە ارنالعان سالتاناتتى جيىندا ءسوز سويلەدى...

مەملەكەت باسشىسى: «ۇلىق مەرەكەمىز – رەسپۋبليكا كۇنى بارشاڭىزعا قۇتتى بولسىن!

بۇل – بۇكىل حالقىمىز ءۇشىن ءمان-ماعىناسى ەرەكشە جانە قاستەرلى مەيرام! 25 قازاندا اقجولتاي قۇجات – قازاقستاننىڭ ەگەمەندىگى تۋرالى دەكلاراتسيا قابىلداندى.

ءدال سول كۇنى ۇلت جىلناماسىنىڭ جاڭا كەزەڭى باستالدى. كوپ ۇزاماي ءوز الدىنا دەربەس ەل اتاندىق. تاريحي ادىلدىك ورناپ، قاسيەتتى قازاق جەرىنە تاۋەلسىزدىكتىڭ التىن قازىعى قاعىلدى. سوندىقتان بۇل كۇندى ۇلى دالاداعى مەملەكەتتىلىك ءداستۇرى قايتا جاڭعىرعان كۇن دەپ ايتساق، ارتىق ەمەس. بيىل ءبىز ۇلتتىق مەرەكەنى ەل تاۋەلسىزدىگىنىڭ 35 جىلدىعى  قارساڭىندا اتاپ ءوتىپ جاتىرمىز. قازاقستان وسى مەملەكەت تاريحىنىڭ مەرەيلى مەجەسىنە قارقىندى دامىپ كەلە جاتقان، الەم قاۋىمداستىعىنىڭ قۇرمەتىنە يە بولعان ەل رەتىندە جەتىپ وتىر.

حالقىمىز ەگەمەندىك جىلدارىندا كوپتەگەن بەلەستى ابىرويمەن ەڭسەردى. ۇلتتىق بولمىسىمىزدىڭ مىزعىماس نىشاندارى – مەملەكەتتىك رامىزدەرىمىز بەكىتىلدى. كوك تۋىمىز بىرىككەن ۇلتتار ۇيىمىنىڭ تورىندە جەلبىرەدى.

ۇلتتىق قارجى جۇيەسى قۇرىلدى. مەملەكەتتىك شەكارامىز شەگەندەلدى. قاسيەتتى سارىارقانىڭ تورىندە، بۇرىنعى ەسكى قالانىڭ ورنىندا بۇكىل دۇنيە ءجۇزىن تاڭعالدىرعان، الەم مويىنداعان جاڭا ەلوردامىز – استانانىڭ ىرگەسى قالاندى. ءبىز بىرلىگىمىزدى بەكەمدەپ، جەر جۇزىنە بەيبىتشىلىك بەسىگى رەتىندە تانىلدىق»، - دەدى.

قاسىم-جومارت توقاەۆ: «ءبىز ءبارىمىز ءبىرتۇتاس قوعام بولىپ ادىلەتتى قازاقستاندى قۇرۋ ءىسىن قولعا الدىق. ادىلەتتىلىك قاعيداتتارىن حالقىمىز اراسىندا دارىپتەپ جاتىرمىز. شىن مانىندە، ادىلەتتىلىك ەڭ جوعارى رۋحاني قۇندىلىق دەسەك دۇرىس بولادى. جاڭا پارتياعا «ادىلەت» اتاۋىن بەردىك.

ءبىز تاريحي ۇردىستەرگە ادىلەتتى كوزبەن قاراپ، ءادىل باعا بەرۋىمىز كەرەك. سوندىقتان ەگەمەن قازاقستاننىڭ نەگىزىن قالاۋعا، ونىڭ وتە كۇردەلى ەكونوميكالىق جاعدايدا دامۋىنا، ەلىمىزدىڭ كوپتەگەن تاريحي جەتىستىككە قول جەتكىزۋىنە زور ۇلەس قوسقان تۇڭعىش پرەزيدەنت نۇرسۇلتان ءابىشۇلى نازارباەۆتىڭ ەسىمى ەشقاشان ۇمىتىلمايدى دەپ ويلايمىن. سەبەبى، بۇل – ادىلەتتىلىككە ساي كەلەتىن ماسەلە»، - دەدى.

مەملەكەت باسشىسى: «قازاقتا «ىنتىماق – مىزعىماس قورعان» دەگەن ءسوز بار. ءبىز – بولاشاققا ۇلكەن ۇمىتپەن، زور سەنىممەن قارايتىن ۇلتپىز. شىن مانىندە، ءبىز تاتۋلىق پەن تۇراقتىلىقتىڭ ارقاسىندا سان ءتۇرلى سىناقتان سۇرىنبەي وتتىك.

ەل يگىلىگىن ەسەلەپ، وركەنيەتىمىزدىڭ ءورىسىن كەڭەيتتىك. ءبىرتۇتاس ۇلت رەتىندە تۇبەگەيلى وزگەرىستەردى تابىستى جۇزەگە اسىردىق. ەڭ باستىسى، حالقىمىزعا اينىماس باعدار بولاتىن قاستەرلى قۇجات – كونستيتۋتسيامىزدى ءبىرتۇتاس ەل بولىپ قابىلدادىق. تۇعىرعا قونعان كونستيتۋتسيا كوپۇلتتى جۇرتىمىزدىڭ جاڭا جارعىسىنا اينالدى. كونستيتۋتسيانىڭ ءار قاعيداتى، ءار تارماعى ەل مۇددەسىنە قىزمەت ەتۋگە باعىتتالعان. ەلىمىزدىڭ ەگەمەندىگى، جەرىمىزدىڭ تۇتاستىعى، ازاماتتاردىڭ زاڭدى قۇقىقتارى مەن بوستاندىقتارى كونستيتۋتسيامىزعا سايكەس باستى قۇندىلىقتار دەپ تانىلدى.

زاڭ مەن ءتارتىپتى قامتاماسىز ەتۋ، جالپىۇلتتىق بىرلىكتى بەكەمدەۋ مىزعىماس قاعيدات رەتىندە بەكىتىلدى. ءبىلىم مەن عىلىمدى، يننوۆاتسيانى، جوعارى تەحنولوگيالاردى دامىتۋ مەملەكەتتىڭ ستراتەگيالىق مىندەتى دەپ كورسەتىلدى. كونستيتۋتسيادا قازاقستاننىڭ وتكەنى مەن بۇگىنى، سونداي-اق بولاشاقتاعى بەينەسى ايقىندالدى»، - دەدى.

پرەزيدەنت: «ەل كونستيتۋتسياسى تۇبەگەيلى وزگەرىستەردىڭ جاڭا كەزەڭىنە جول اشتى. سونىڭ ناتيجەسىندە مەملەكەتتىك بيلىك جۇيەسى تولىعىمەن جاڭعىردى. ءبىر پالاتالى قۇرىلتاي پايدا بولدى. وسىلايشا، ءبىز «كۇشتى پرەزيدەنت – ىقپالدى پارلامەنت، ياعني قۇرىلتاي – ەسەپ بەرەتىن ۇكىمەت» تۇجىرىمداماسىن ناقتى ىسكە اسىردىق. ۆيتسە-پرەزيدەنت ينستيتۋتى قۇرىلدى. قاۋىپسىزدىك كەڭەسىنىڭ قۇرىلىمىنا قاجەتتى وزگەرىستەر ەنگىزىلدى. ەلىمىزدىڭ جوعارى كونسۋلتاتيۆتىك مەكەمەسى – قازاقستان حالىق كەڭەسى ءوز جۇمىسىن باستادى. ەلىمىز دۇنيە جۇزىندە ەرىكتىلەر، ياعني ۆولونتەرلەر قوزعالىسىنا كونستيتۋتسيالىق مارتەبە بەرگەن ساناۋلى مەملەكەتتىڭ ءبىرى اتاندى.

بارشاڭىزعا بەلگىلى، قازىرگى دۇنيە جۇزىندە، وسىنداي كۇردەلى، تۇراقسىز، بولجامسىز، بۇلىڭعىر زاماندا بيلىك جۇيەسىندە مۇنداي اۋقىمدى وزگەرىس مۇلدە جوق. بۇل – مەملەكەتىمىز ءۇشىن العا قاراي ۇلكەن ساياسي قادام»، - دەدى.

مەملەكەت باسشىسى: «قوعامنىڭ بارلىق سالاسىن قامتىعان رەفورمالار ەلىمىزدىڭ دامۋىنا تىڭ سەرپىن بەردى. 2019 جىلدان بەرى ەكونوميكامىز 30 پايىزعا جۋىق ءوستى. جان باسىنا شاققاندا ىشكى جالپى ءونىم كولەمى 15 مىڭ دوللاردان استى. «ۇلتتىق قور – بالالارعا» جوباسى اياسىندا 7 ميلليون بالانىڭ ەسەپشوتىنا 2,5 ميلليارد دوللار قارجى اۋدارىلدى. بىلتىر 20 ميلليوننان استام شارشى مەتر تۇرعىن ءۇي سالىندى. بۇل – بۇرىن-سوڭدى بولماعان كورسەتكىش. ازاماتتاردىڭ ورتاشا ءومىر ءسۇرۋ ۇزاقتىعى 76 جاسقا جاقىندادى. دۇنيەجۇزىلىك بانكتىڭ مالىمەتىنە سايكەس، قازاقستان بۇل كورسەتكىش بويىنشا ءبىزدىڭ ايماقتا كوش باستاپ تۇر.

ءبىز ۇلتتىق ەكونوميكانىڭ الەۋەتىن كۇشەيتۋگە باسىمدىق بەرىپ، باسا نازار اۋدارىپ وتىرمىز. الەمدەگى ەڭ ىقپالدى ەلدەردىڭ قاتارىنا قوسىلىپ، 34-ورىندا تۇرمىز. ەلىمىزدىڭ جالپى ىشكى ءونىم كولەمى 350 ميلليارد دوللارعا جەتىپ كەلە جاتىر. بۇل – تاۋەلسىز مەملەكەتتەر دوستاستىعى شەڭبەرىندەگى ەكىنشى ورىن دەگەن ءسوز.

شاعىن جانە ورتا بيزنەستىڭ جالپى ىشكى ونىمدەگى ۇلەسى ايتارلىقتاي ارتتى، ياعني 40 پايىزعا جەتتى. كاسىپكەرلەرىمىز وتاندىق تاۋار ءوندىرىسىن ۇلعايتىپ، جاڭا ىسكەرلىك مادەنيەتى قالىپتاسۋدا. بۇگىندە وسى سالادا ەلىمىزدەگى ەڭبەككە جارامدى ازاماتتاردىڭ جارتىسىنا جۋىعى جۇمىس ىستەپ ءجۇر»، - دەدى.

پرەزيدەنت: «سونداي-اق ءبىز وزىق تەحنولوگياعا نەگىزدەلگەن ءوندىرىستى دامىتۋعا جول اشتىق. سوڭعى بەس جىلدىڭ ىشىندە وڭدەۋ ونەركاسىبىندەگى ەكسپورت كولەمى 45 پايىزدان استى. وسىلايشا، قازاقستان يندۋسترياسى دامۋدىڭ جاڭا ساپالىق دەڭگەيىنە كوتەرىلىپ جاتىر. كەيىنگى جىلدارى تەمىرجول سالاسىن دامىتۋدا سونى سەرپىلىس جاسادىق. رەلستەر مەن شپالداردان باستاپ ۆاگوندار مەن ەلەكتروۆوزدارعا دەيىنگى قاجەتتىنىڭ ءبارىن ءوزىمىز وندىرە باستادىق.

اۆتوكولىك شىعارۋ ءىسى دە قارقىن الدى. جىل سايىن كونۆەيەردەن 150 مىڭنان اسا جەڭىل جانە جۇك كولىگى شىعادى. ەكونوميكاداعى بارلىق ستراتەگيالىق سالاعا قان جۇگىردى دەپ ايتۋعا بولادى. ەلىمىزدىڭ وركەندەۋىنە اۋقىمدى شەتەلدىك ينۆەستيتسيا سەپتىگىن تيگىزىپ وتىر. سوڭعى جەتى جىلدىڭ ىشىندە تارتىلعان قاراجات كولەمى 155 ميلليارد دوللارعا جەتتى. ءتۇرلى ەلدەرگە بارىپ، جوعارى دەڭگەيدەگى حالىقارالىق ءىس-شارالارعا قاتىسۋ قازاقستاننىڭ ساياسي بەدەلىن نىعايتىپ قانا قويماي، زور پايداسىن دا تيگىزۋدە. جىل باسىنان بەرى جالپى سوماسى 60 ميلليارد دوللار بولاتىن 355 كوممەرتسيالىق كەلىسىمگە قول قويىلدى. وسىنىڭ ءوزى كوپ نارسەنى اڭعارتادى. ەلىمىز ەۋرازيانىڭ جەتەكشى كولىك-لوگيستيكا حابى رەتىندە پوزيتسياسىن نىعايتا ءتۇستى. اۋەجايلار، ۆوكزالدار، كوپىرلەر، تەڭىز ايلاقتارى سالىنىپ، جوندەۋدەن ءوتتى. شەكارا ماڭىنداعى ينفراقۇرىلىم جاڭعىرتىلۋدا. بۇل ماڭىزدى جۇمىس ارى قاراي جالعاسادى»، - دەدى.

قاسىم-جومارت توقاەۆ: «جەتى جىل ىشىندە ون مىڭداعان شاقىرىم اۆتوكولىك جولى مەن تەمىرجولدار سالىنىپ، جوندەلدى. ەۋروپا مەن ازيانىڭ اراسىن جالعاپ تۇرعان كولىك، ەنەرگەتيكا جانە تسيفرلىق توراپتار قازاقستان ارقىلى ءوتىپ جاتىر.

قازاقستان ورتا دەرجاۆا رەتىندە الەمدىك ءتارتىپتىڭ نىعايۋىنا ەلەۋلى قوسىپ كەلە جاتقان، دامىعان، تۇراقتى ءارى زايىرلى مەملەكەت بولىپ تانىلدى. سىندارلى جانە جاۋاپتى سىرتقى ساياساتتىڭ ارقاسىندا ەلىمىزدىڭ الەمدىك ابىروي-بەدەلى ارتۋدا. قازاقستان تولقۇجاتىنىڭ مارتەبەسى جوعارى. ەلىمىزدىڭ ازاماتتارى مەن بيزنەس وكىلدەرى ءۇشىن بارلىق ەلدىڭ ەسىگى اشىق.

سونىمەن قاتار قازاقستان دۇنيە جۇزىندە بولىپ جاتقان تۇبەگەيلى تسيفرلىق وزگەرىستەرگە بەلسەنە قاتىسۋدا.ەلوردامىزدا Alem.ai حالىقارالىق جاساندى ينتەللەكت ورتالىعى مەن زاماناۋي Astana Hub تەحنوپاركى جۇمىس ىستەيدى. ءىت قىزمەتتەردىڭ ەكسپورتى 1 ميلليارد دوللاردان استى. ەكى سۋپەركومپيۋتەر ىسكە قوسىلدى. ونىڭ يگىلىگىن وتاندىق كومپانيالار مەن عالىمدار كورىپ جاتىر. جاقىندا اسا قۋاتتى تاعى ءبىر سۋپەركومپيۋتەر پايدالانۋعا بەرىلەدى. جاڭادان سالىنىپ جاتقان داتا ورتالىقتار كلاستەرى – دەرەكتەردى وڭدەۋ ورتالىعىنىڭ القابى تسيفرلىق ەكونوميكانىڭ بەرىك نەگىزىن قالايدى. ءبىز Digital Qazaqstan جالپىۇلتتىق ستراتەگياسىن جۇزەگە اسىرۋدى قولعا الدىق، جاساندى ينتەللەكت تەحنولوگياسى قوعامنىڭ بارلىق سالاسىنا ەنگىزىلەدى. مۇنىڭ ءبارى – تسيفرلىق، باسقاشا ايتقاندا، حالقىمىزدىڭ يگىلىگىنە قىزمەت ەتەتىن وركەندەگەن مەملەكەت قۇرۋعا باعىتتالعان قادام»، - دەدى.

مەملەكەت باسشىسى: «سوڭعى جەتى جىلدا الەۋمەتتىك سالانى دامىتۋعا 88 تريلليون تەڭگە قارجى ءبولىندى. مۇنى حالىقتىڭ ءال-اۋقاتىن جاقسارتۋ ءۇشىن سالىنعان ينۆەستيتسيا دەپ قابىلداعان ءجون. قازىر بارلىق ايماقتا، اسىرەسە، اۋىلدىق جەرلەر مەن شالعاي ەلدى مەكەندەردە مەديتسينالىق قىزمەتتىڭ ساپاسى ارتىپ كەلە جاتىر. 2019 جىلدان بەرى ەلىمىز بويىنشا 1259 دەنساۋلىق ساقتاۋ مەكەمەسى سالىندى.

كونستيتۋتسيامىزدا اقىسىز مەديتسينالىق كومەكتىڭ كەپىلدى كولەمى تۋرالى ايقىن جازىلدى. ەلىمىزدىڭ ازاماتتارى مەديتسينالىق قىزمەتتىڭ 1 مىڭنان استام ءتۇرىن اقىسىز الۋعا قۇقىلى. بۇل، تۇپتەپ كەلگەندە، بىرەگەي الەۋمەتتىك كومەك دەسەك، ارتىق بولماس. سونىمەن قاتار ەلىمىزدىڭ ءاربىر مەكتەبىندە بارلىق باستاۋىش سىنىپ وقۋشىلارى جانە الەۋمەتتىك جاعىنان وسال توپتاعى بالالار، ياعني، ءبىر ميلليون جەتى ءجۇز مىڭنان استام وقۋشى اقىسىز ىستىق تاماق الۋدا. ەلىمىزدە نەشە ءتۇرلى الەۋمەتتىك جەڭىلدىكتەر بار، ءتىپتى، ولاردىڭ كەيبىرى جىمقىرۋ نەگىزىندە بەرىلىپ جاتىر. سوندىقتان قازىر ۇكىمەت بۇل ماسەلەنى جان-جاقتى زەرتتەپ، وسى جۇمىسپەن اينالىسۋدا»، - دەدى.

قاسىم-جومارت توقاەۆ: «تاعى ءبىر ماڭىزدى مىندەت – ءبىلىم بەرۋ سالاسىن جان-جاقتى دامىتۋ. بۇل، ەڭ الدىمەن، جاس ۇرپاقتىڭ جارقىن بولاشاعى ءۇشىن قاجەت. وسى ۋاقىت ارالىعىندا ەلىمىز بويىنشا 1483 بالاباقشا اشىلدى. 1342 زاماناۋي مەكتەپ بوي كوتەردى. كەيىنگى جەتى جىل ىشىندە جاستاردىڭ جوعارى ءبىلىم الۋى ءۇشىن جالپى قۇنى 1,5 تريلليون تەڭگە بولاتىن 655 مىڭنان استام وقۋ گرانتى ءبولىندى. بۇل شارالار جاس بۋىننىڭ قالاعان كاسىپتى مەڭگەرۋىنە، قابىلەتىن ۇشتاۋىنا مۇمكىندىك بەرەدى.

«ەگەمەن ەلدىڭ ەڭسەسى – بيىك» دەگەن ءسوز بار. ءبىز قاسيەتتى تاۋەلسىزدىگىمىزدىڭ ارقاسىندا ءتۇرلى سالادا تولايىم تابىسقا جەتىپ كەلەمىز. سوندىقتان بەيبىت كۇننىڭ قادىرىن ءبىلىپ، مەملەكەتتىگىمىزدى كۇشەيتە ءتۇسۋ ءۇشىن تاباندى ەڭبەك ەتۋىمىز كەرەك. مەن بۇگىن ەلىمىزدىڭ بىرقاتار جەتىستىگىنە توقتالىپ ءوتتىم.

بىراق قازىرگىدەي قۇبىلمالى ءارى باسەكەگە تولى زاماندا بەي-جاي، بەيقام وتىرۋعا مۇلدەم بولمايدى. ءالى كوپ جۇمىس ىستەۋىمىز قاجەت، كەمشىلىكتەر مەن ولقىلىقتار بار ەكەنىن مويىندايمىز، ولاردى جويۋ جانە تۇزەتۋ ءۇشىن ۇكىمەت پەن دەپۋتاتتار جانە بارلىق مەملەكەتتىك قىزمەتشىلەر كۇش سالۋى كەرەك. مەملەكەتىمىزدىڭ الدىندا تۇرعان ناقتى مىندەتتەر مەن جوسپارلار جونىندە كەلەسى اپتادا قازاقستان حالقىنا جولداۋىمدا تولىعىراق ايتامىن»، - دەدى.

مەملەكەت باسشىسى: «وزدەرىڭىز بىلەسىزدەر، قازىر الەم اسا جوعارى قارقىنمەن وزگەرۋدە. وركەنيەت كوشىنەن قالىپ قويماۋ ءۇشىن زامان تالابىنا ساي ارەكەت ەتۋ ۇدايى ماڭىزدى. ادام كاپيتالىن دامىتۋ – ەلىمىزدىڭ كونستيتۋتسيالىق مىندەتى. ءبىز سانالى، جاۋاپكەرشىلىگى مول، ويى ۇشقىر، باسەكەگە قابىلەتتى، وتانشىل جانە ادال ازاماتتاردى تاربيەلەۋىمىز كەرەك. بۇل – ەلىمىزدىڭ ءوسىپ-وركەندەۋىنىڭ كەپىلى. وتانشىلدىق، ەڭبەكقورلىق، جاسامپازدىق، ءوزارا سىيلاستىق، جاناشىرلىق قۇندىلىقتارىن كەڭ اۋقىمدا دارىپتەپ، قوعامىمىزدا جاڭارعان ەتيكا قالىپتاستىرۋىمىز قاجەت.

حالىقارالىق احۋالدى، سونىڭ ىشىندە دامىعان ەلدەردە بولىپ جاتقان سوڭعى وقيعالاردى كورىپ-ءبىلىپ وتىرسىزدار. راسىندا زاڭ مەن ءتارتىپ ساقتالماسا، تاتۋلىق پەن ىنتىماق بولماسا، ەشقانداي دامۋ، قىسقاسى، ءتورت قۇبىلامىز تۇگەل بولمايتىنى ايدان انىق. ءبىز اۋىزبىرشىلىگىمىزدى ساقتاپ، ورتاق مۇددە جولىندا ءبىرتۇتاس قوعام بولىپ ەڭبەك ەتسەك، كەز كەلگەن بەلەستى باعىندىرامىز، بارلىق ماقسات-مۇراتىمىزعا جەتەمىز. مەن بۇعان كامىل سەنەمىن»، - دەدى.

پرەزيدەنت: «رەسپۋبليكا كۇنى – كۇللى حالقىمىزدىڭ باسىن قوساتىن، جالپىۇلتتىق سيپاتى بار بىرەگەي مەرەكە. ەگەمەندىك پەن تاۋەلسىزدىك – بارىنەن قىمبات قازىنامىز، ەڭ اسىل قۇندىلىعىمىز!

سوندىقتان مەملەكەتتىگىمىزدى كۇشەيتىپ، ەلىمىزدىڭ ىرگەسىن بەكىتە ءتۇسۋ – بارشامىزدىڭ قاسيەتتى بورىشىمىز. ءبىز ەگەمەندىككە اتا-بابالارىمىزدىڭ بويىنداعى مىقتى ەرىك-جىگەر مەن وشپەس رۋحتىڭ ارقاسىندا قول جەتكىزدىك. حالقىمىز تاۋەلسىزدىك جولىندا قۇربان بولعان ەرلەردىڭ، بوستاندىق ءۇشىن جانقيارلىقپەن كۇرەسكەن تۇلعالاردىڭ ەسىمىن ارقاشان جادىندا ساقتايدى. اعا بۋىن تار جول، تايعاق كەشۋدەن وتسە دە، بارلىق سىن-قاتەردى ەڭسەرىپ، ەل ءۇشىن قاجىرلى قىزمەت ەتتى. حالقىمىز، اسىرەسە جاستارىمىز ءتول شەجىرەمىزدى تەرەڭ تانىپ، وعان قۇرمەتپەن قاراي باستادى. بۇل – وتە جاقسى ءۇردىس.

شىن مانىندە، تاريحقا تەك بىرجاقتى كوزقاراسپەن قاراۋعا بولمايدى. ءبىزدىڭ تاريحىمىز – ۇلى جەڭىستەردىڭ، ماڭگىلىك مۇرالار مەن تەڭدەسسىز داستۇرلەردىڭ شەجىرەسى. ءبىزدىڭ تاريحي دەرەكتەرگە تولى داڭقتى جولىمىزدى جىگەرلى، تاباندى، جاسامپاز تۇلعالار جازدى. ولاردىڭ ءومىرى مەن ۇستانىمى – جاس ۇرپاققا ۇلگى-ونەگە. تۇپتەپ كەلگەندە، ەلدىگىمىزدىڭ تۇعىرىن مەملەكەتشىل، وتانشىل، پاراساتتى، ادال، ەڭبەكقور ادامدار نىعايتادى»، - دەدى.

جيىن سوڭىندا مەملەكەت باسشىسى ەڭبەگىمەن ەلەنگەن ەل ازاماتتارىنىڭ كەۋدەسىنە مەملەكەتتىك ناگرادالار تاقتى.

40 جىلدان استام ۋاقىت مەتاللۋرگيا سالاسىندا ابىرويلى جۇمىس ىستەگەن «ەڭبەك داڭقى» ناگراداسىنىڭ تولىق كاۆالەرى – ءابدىراشيت قويشىبەكۇلى دوسپانوۆقا «قازاقستاننىڭ ەڭبەك ەرى» اتاعى بەرىلدى.

ءتول مادەنيەتىمىزدىڭ كورنەكتى وكىلى، بەلگىلى سازگەر، ۇستاز التىنبەك قورازباەۆ «وتان» وردەنىمەن ماراپاتتالدى.

داڭقتى الپينيست قازبەك ۋاليەۆكە ءىى دارەجەلى «بارىس» وردەنى بەرىلدى.

ءبىلىم بەرۋ سالاسىن دامىتۋعا قوسقان ەلەۋلى ۇلەسى ءۇشىن ناتاليا سافيۋليناعا «قازاقستاننىڭ ەڭبەك سىڭىرگەن ۇستازى» اتاعى بەرىلەدى.

تانىمال وپەرا ءانشىسى تالعات مۇساباەۆقا «قازاقستاننىڭ حالىق ءارتىسى» اتاعى بەرىلەدى.

بەلگىلى ولكەتانۋشى باۋىرجان جانىبەكوۆكە «قازاقستاننىڭ ەڭبەك سىڭىرگەن قايراتكەرى» اتاعى بەرىلەدى.

ۇلاعاتتى ۇستاز، ونەرتانۋشى عالىم ەلميرا سۇلتانعاليەۆاعا «قۇرمەت» وردەنى تابىستالادى.

Abai.kz