قاراعاندىلىق ەڭبەك وزاتتارى مەملەكەتتىك ناگرادالارمەن ماراپاتتالدى.

رەسپۋبليكا كۇنىنە ارنالعان سالتاناتتى جيىن س. سەيفۋللين اتىنداعى قاراعاندى وبلىستىق اكادەميالىق قازاق دراما تەاترىندا ءوتتى.

وبلىس اكىمى ەرماعانبەت بولەكپاەۆ ءوڭىر تۇرعىندارىن ۇلتتىق مەرەكەمەن قۇتتىقتاپ، قازاقستان پرەزيدەنتىنىڭ اتىنان مەملەكەتتىك ناگرادالاردى تابىس ەتتى. ەلدىڭ وركەندەۋىنە ەلەۋلى ۇلەس قوسقان ەڭبەك ارداگەرلەرى، كەنشىلەر، كاسىپكەرلەر، اۋىل شارۋاشىلىعى سالاسىنىڭ قىزمەتكەرلەرى، ۇستازدار، دارىگەرلەر، سپورتشىلار جانە وزگە دە سالا وكىلدەرى ماراپاتقا يە بولدى.

بيىلعى رەسپۋبليكا كۇنىنىڭ ورنى ەرەكشە. ۇلتتىق مەرەكە ەل تاۋەلسىزدىگىنىڭ 35 جىلدىعى اتاپ وتىلەتىن كەزەڭمەن تۇسپا-تۇس كەلىپ وتىر. بۇل ايتۋلى داتا قازاقستاننىڭ قالىپتاسۋ جولىن ايشىقتاپ، ەل دامۋىنىڭ جاڭا بەلەسىنە باستار ماڭىزدى تاريحي مەجەگە اينالدى.

قۇتتىقتاۋ سوزىندە ەرماعانبەت بولەكپاەۆ ءوڭىردىڭ الەۋمەتتىك-ەكونوميكالىق دامۋىنداعى جەتىستىكتەرگە توقتالىپ، اتقارىلىپ جاتقان جۇمىستاردىڭ باستى ماقساتى تۇرعىنداردىڭ تۇرمىس ساپاسىن ارتتىرۋ ەكەنىن اتاپ ءوتتى.

— ءوڭىر دامۋىنىڭ باستى ناتيجەسى — ادامداردىڭ لايىقتى تابىس تاۋىپ، ساپالى ءبىلىم مەن مەديتسينالىق كومەككە قول جەتكىزۋى، بالا تاربيەلەپ، تۋعان جەرىندە بولاشاعىنا سەنىممەن قاراۋى. جىل باسىنان بەرى وبلىستا توعىز مىڭنان استام جۇمىس ورنى اشىلدى. 2030 جىلعا دەيىن 17 مىڭعا جۋىق جۇمىس ورنىن قۇرۋعا مۇمكىندىك بەرەتىن 100-دەن استام ينۆەستيتسيالىق جوبانى جۇزەگە اسىرۋ جوسپارلانىپ وتىر. بۇل باستامالار سىزدەردى تۋعان جەردە ەڭبەك ەتۋگە، ءوز ءىسىڭىزدى اشىپ، بالا وسىرۋگە ىنتالاندىرادى دەپ سەنەمىن. ءوڭىرىمىزدىڭ وركەندەۋىنە ادال ەڭبەگىمەن ۇلەس قوسىپ جۇرگەن بارشاڭىزعا العىس ايتامىن، - دەدى ەرماعانبەت بولەكپاەۆ.

قازاقستان رەسپۋبليكاسى پرەزيدەنتىنىڭ جارلىعىمەن ەلدىڭ الەۋمەتتىك-ەكونوميكالىق جانە مادەني-رۋحاني دامۋىنا قوسقان ەلەۋلى ۇلەسى، حالىقتار اراسىنداعى دوستىق پەن ىنتىماقتاستىقتى نىعايتۋعا سىڭىرگەن ەڭبەگى جانە بەلسەندى قوعامدىق قىزمەتى ءۇشىن وبلىستىڭ 40 تۇرعىنى مەملەكەتتىك ناگرادالارمەن ماراپاتتالدى. ولارعا «پاراسات»، «قۇرمەت»، III دارەجەلى «ەڭبەك داڭقى» وردەندەرى، سونداي-اق «ەرەن ەڭبەگى ءۇشىن» جانە «شاپاعات» مەدالدارى تابىستالدى.

قاراعاندى وبلىسىنىڭ ەكى تۇرعىنى مەملەكەتتىك ناگرادالارىن اقوردادا مەملەكەت باسشىسى قاسىم-جومارت توقاەۆتىڭ قولىنان الدى.

«باقىت» بوبەكجاي-باقشاسىنىڭ قازاق ءتىلى ءپانىنىڭ مۇعالىمى بايان مۇقۇشەۆا «شاپاعات» مەدالىمەن ماراپاتتالسا، №3 ارنايى مەكتەپ-ينتەرناتىنىڭ دەفەكتولوگى ناتاليا سەيفۋليناعا «قازاقستاننىڭ ەڭبەك سىڭىرگەن ۇستازى» قۇرمەتتى اتاعى بەرىلدى.

قالي بايجانوۆ اتىنداعى قاراعاندى كونتسەرتتىك بىرلەستىگىنىڭ «ارقا سازى» فولكلورلىق ءانسامبلىنىڭ كوركەمدىك جەتەكشىسى بايقارا سادۋاقاسوۆ «پاراسات» وردەنىمەن ماراپاتتالدى.

— قۇرمانعازى اتىنداعى الماتى مەملەكەتتىك كونسەرۆاتورياسىن تامامداعان كەزدەن بەرى مادەنيەت سالاسىندا ەڭبەك ەتىپ كەلە جاتقانىما 40 جىل بولدى. سودان بەرى بار عۇمىرىمدى ونەرگە ارناپ، ۇلتتىق مۋزىكامىزدى ساقتاۋ مەن ونى كەڭىنەن ناسيحاتتاۋدى ومىرلىك مۇراتىم دەپ ءبىلدىم. قازاقتىڭ باي مۋزىكالىق مۇراسىن تىڭدارمانعا تانىتىپ، ءداستۇر ساباقتاستىعىن كەيىنگى ۇرپاققا جەتكىزىپ جۇرگەن «ارقا سازى» ۇجىمىنىڭ قۇرامىندا ەڭبەك ەتۋ مەن ءۇشىن زور مارتەبە. بۇل ماراپات — مەنىڭ ەڭبەگىمە عانا بەرىلگەن باعا ەمەس، ونەر جولىن ومىرىنە وزەك ەتكەن بارشا جاننىڭ قاجىرلى ەڭبەگىنە كورسەتىلگەن قۇرمەت. ەڭبەگىمىزدى جوعارى باعالاعانى ءۇشىن شىنايى العىسىمدى بىلدىرەمىن، - دەدى بايقارا سادۋاقاسوۆ.

«قۇرمەت» وردەنىنە «شاحتينسكتەپلوەنەرگو» جشس ديرەكتورى التاي ەلجاسوۆ، نۇرا اۋدانىنىڭ كىتاپحانا سالاسىنىڭ ارداگەرى سۇلەيمەن جۇمابەكوۆ، س. سەيفۋللين اتىنداعى وبلىستىق اكادەميالىق قازاق دراما تەاترىنىڭ ءارتىسى شايزا نۇكينا، كۇزeمبaەۆ اتىنداعى شاحتانىڭ ديرەكتورى سەرگەي پوتەمكين جانە ءا. ساعىنوۆ اتىنداعى قاراعاندى تەحنيكالىق ۋنيۆەرسيتەتىنىڭ پروفەسسورى ساۆەت ساعىنتاەۆ يە بولدى.

II دارەجەلى «ەڭبەك داڭقى» وردەنىمەن نۇرا اۋدانىنداعى شارۋا قوجالىعىنىڭ ديرەكتورى ءتاۋباجان ايتىلەۋوۆ پەن «اقنار پف» قۇس فابريكاسىنىڭ تەحنولوگى يگور كيۆرين ماراپاتتالدى.

— قۇس فابريكاسىندا ەڭبەك ەتىپ كەلە جاتقانىما 30 جىلعا جۋىقتادى. قازىر تەحنولوگ رەتىندە برويلەر بالاپاندارىن ءوسىرۋدىڭ بارلىق كەزەڭىن باقىلاپ، تۇتىنۋشىلارعا تەك ساپالى ءونىمنىڭ جەتكىزىلۋىن قاداعالايمىن. ۇجىمىمىز ۇيىمشىل ءارى ەڭبەكقور. بارشاڭىزعا اماندىق، بەيبىتشىلىك پەن جاقسىلىق تىلەيمىن، - دەدى يگور كيۆرين.

«ەرەن ەڭبەگى ءۇشىن» مەدالىنە يە بولعانداردىڭ قاتارىندا «بوتاقارا سۋ قوجالىعى» كمك ۋچاسكەسىنىڭ شەبەرى قانات ايماقوۆ، «Tas Komir Trade» جشس باس ينجەنەرى نادەجدا ۆيننيكوۆا، قارقارالى اۋداندىق اۋرۋحاناسىنىڭ دارىگەرى بايان جۇماگەلدينوۆا، «ۆوستوچنايا» ورتالىق بايىتۋ فابريكاسىنىڭ اپپاراتشىسى تاتيانا كرامينسكايا، شەت اۋدانىنداعى «Nova تسينك» كاسىپورنىنىڭ ەلەكتر سلەسارى بولاتبەك قوسانوۆ، ەڭبەك ارداگەرلەرى يۋري پينياەۆ پەن نادەجدا پلوتنيكوۆا جانە باسقا دا ازاماتتار بار.

ال قاراعاندى قالاسىنداعى №3 كوپبەيىندى اۋرۋحانانىڭ ءبولىم مەڭگەرۋشىسى ەرعالي شاۋەنوۆ «شاپاعات» مەدالىمەن ماراپاتتالدى.

ونىڭ ايتۋىنشا، بۇل مەديتسينا سالاسىنداعى 30 جىلعى جۇمىسىنداعى العاشقى جوعارى ماراپاتى. سونداي-اق مۇنى جالپى ونكوحيرۋرگتەر ۇجىمى ەڭبەگىنىڭ ەلەنۋى جانە جوعارى باعالانۋى دەپ بىلەتىنىن جەتكىزدى.

بۇدان بولەك، ءۇش مەملەكەتتىك قىزمەتشىگە مەملەكەتتىك قىزمەت ىستەرى اگەنتتىگىنىڭ «مەملەكەتتىك قىزمەت ارداگەرى» ۆەدومستۆولىق توسبەلگىسى تابىستالدى.

سالتاناتتى جيىن وبلىستىڭ ونەرپازدارى مەن شىعارماشىلىق ۇجىمدارى قاتىسقان مەرەكەلىك كونتسەرتپەن تۇيىندەلدى.

Abai.kz