مەملەكەت باسشىسىنىڭ جولداۋىن ىسكە اسىرۋ: قازاقستاندا بەس جىلدا 1 مىڭنان استام جاڭا مەديتسينالىق نىسان اشىلىپ، كادر تاپشىلىعى 20,4%-عا قىسقاردى.

قازاقستاندا مەملەكەت باسشىسى قاسىم-جومارت توقاەۆتىڭ دارىگەرلەردىڭ مارتەبەسىن ارتتىرۋ، مەديتسينالىق ءبىلىم بەرۋ ساپاسىن جاقسارتۋ جانە دەنساۋلىق ساقتاۋ سالاسىنا زاماناۋي تەحنولوگيالاردى ەنگىزۋ جونىندەگى تاپسىرمالارى جۇزەگە اسىرىلۋدا. ۇكىمەت دارىگەرلەردى قولداۋ شارالارىن كەڭەيتىپ، كادر دايارلاۋ جۇيەسىن جەتىلدىرۋمەن قاتار، مەديتسينالىق ينفراقۇرىلىمدى جاڭعىرتۋدا.

بەس جىلدا 1 003 جاڭا مەديتسينالىق نىسان اشىلدى

ەلىمىزدە 10 اۋرۋحانا، 14 ەمحانا، 967 دارىگەرلىك امبۋلاتوريا مەن مەديتسينالىق پۋنكت، 3 عىلىمي مەديتسينالىق ورتالىق جانە قان ورتالىعى مەن وڭالتۋ ورتالىقتارىن قوسا العاندا، وزگە دە 9 ۇيىم اشىلدى. ونىڭ 655-ءى «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا پايدالانۋعا بەرىلدى.

دارىگەر تاپشىلىعى 20,4%-عا قىسقاردى

بۇگىندە دەنساۋلىق ساقتاۋ جۇيەسىندە 280 مىڭنان استام مەديتسينا قىزمەتكەرى، ونىڭ ىشىندە 84 مىڭعا جۋىق دارىگەر ەڭبەك ەتەدى. 2025 جىلدىڭ قورىتىندىسى بويىنشا دارىگەر تاپشىلىعى 2023 جىلمەن سالىستىرعاندا 20,4%-عا، ال اۋىلدىق جەرلەردە 28,3%-عا ازايدى.

الەۋمەتتىك قولداۋ شارالارىمەن قامتىلعان دارىگەرلەر سانى 2,2 ەسە ءوستى

2025 جىلى 1 760 دارىگەر الەۋمەتتىك قولداۋ شارالارىمەن قامتىلدى. تۇرعىن ۇيمەن قامتاماسىز ەتىلگەن دارىگەرلەر سانى 3,3 ەسە ءوسىپ، 727 ادامعا جەتتى. سونداي-اق اۋىلدىق جەرلەردە تاپشى ماماندىقتار بويىنشا جۇمىس ىستەيتىن 529 مامانعا 8,5 ملن تەڭگە كولەمىندە بىرجولعى تولەم بەرىلدى.

72 مىڭنان استام ادام مەديتسينالىق ماماندىقتار بويىنشا ءبىلىم الۋدا

دارىگەر مامانداردى 8 مەديتسينالىق ۋنيۆەرسيتەت، كوپسالالى جوعارى وقۋ ورىندارىنىڭ 7 فاكۋلتەتى جانە 17 عىلىمي ۇيىم دايارلايدى. مەديتسينالىق ءبىلىم الۋشىلار جالپى سانى 72 مىڭنان اسادى. ونىڭ 61 مىڭنان استامى جوعارى ءبىلىمنىڭ نەگىزگى دەڭگەيىندە، 11 مىڭنان استامى جوعارى وقۋ ورنىنان كەيىنگى دەڭگەيدە وقيدى. بۇدان بولەك، مەديتسينالىق كوللەدجدەردە 110 مىڭعا جۋىق ادام ءبىلىم الۋدا.

قازاقستاندا 760 مەديتسينالىق ءبىلىم بەرۋ باعدارلاماسى تىركەلگەن

ونىڭ تورتەۋى يننوۆاتسيالىق باعىتتاردى قامتيدى: «كينەزيتەراپيا»، «IT-مەديتسينا»، «فارماتسيا جانە يممۋنوبيولوگيالىق پرەپاراتتار بيوتەحنولوگياسى» جانە «مەيىرگەر ءىسى عىلىمى». سونىمەن قاتار تاجىريبەلىك دايارلىقتى كۇشەيتۋ ءۇشىن سيمۋلياتسيالىق ورتالىقتار جەلىسى دامىپ، كلينيكالىق تالىمگەرلىك ينستيتۋتى ەنگىزىلۋدە.

دارىگەرلەردى دايارلاۋ وڭىرلەردىڭ قاجەتتىلىگىنە بەيىمدەلۋدە

ءبىلىم بەرۋ گرانتتارىن ءبولۋ كەزىندە وڭىرلەردەگى اۋرۋشاڭدىق دەڭگەيى، كادر تاپشىلىعى، دەموگرافيالىق كورسەتكىشتەر جانە ماماندارعا دەگەن بولجامدى سۇرانىس ەسكەرىلەدى. مەملەكەتتىك ءبىلىم بەرۋ تاپسىرىسى بويىنشا وقىعان تۇلەكتەردى جۇمىسقا ورنالاستىرۋ ماسەلەسىندە جەرگىلىكتى اتقارۋشى ورگانداردىڭ جاۋاپكەرشىلىگى كۇشەيتىلۋدە.

مەديتسينالىق ءبىلىم مەن عىلىمعا جاساندى ينتەللەكت ەنگىزىلۋدە

ءبىلىم بەرۋ باعدارلامالارىنا جاساندى ينتەللەكتىنى قولدانۋعا ارنالعان پاندەر ەنگىزىلۋدە. ءال-فارابي اتىنداعى قازاق ۇلتتىق ۋنيۆەرسيتەتىندە مەديتسيناداعى جاساندى ينتەللەكت باعىتى بويىنشا ورتالىق اشىلدى. سونىمەن قاتار قالالىق دەڭگەيدەگى مەديتسينالىق دەرەكتەردى تالداپ، تاۋەكەلدەردى بولجاۋعا جانە باسقارۋشىلىق شەشىمدەر قابىلداۋعا كومەكتەسەتىن جۇيە ازىرلەنۋدە.

دەنساۋلىق ساقتاۋ سالاسىن دامىتۋ مەديتسينالىق ينفراقۇرىلىمدى جاڭعىرتۋدى، دارىگەرلەردى قولداۋدى، كادر دايارلاۋدى جانە زاماناۋي تەحنولوگيالاردى ەنگىزۋدى قامتيدى. نەگىزگى مىندەت – كادر تاپشىلىعىن ازايتىپ، مامانداردى وڭىرلەردە تۇراقتاندىرۋ جانە مەديتسينالىق كومەكتىڭ ساپاسىن ارتتىرۋ.

Abai.kz