داۋرەن اباەۆ قازاقستانداعى ورىس ءتىلىنىڭ ءرولى مەن رەسەيمەن مادەني بايلانىستار تۋرالى ايتتى...

قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى داۋرەن اباەۆ ەلىمىزدەگى ورىس ءتىلىنىڭ ورنى مەن ەكى مەملەكەت اراسىنداعى مادەني-گۋمانيتارلىق ىنتىماقتاستىقتىڭ كەلەشەگىنە قاتىستى ءوز پىكىرىن ءبىلدىردى. بۇل تۋرالى ديپلومات «رەسەي حالىقتارى» حالىقارالىق اپتالىعى اياسىندا وتكەن «حالىقارالىق مادەني-گۋمانيتارلىق ىنتىماقتاستىقتىڭ فورماتتارى، قاتىسۋشىلارى جانە بولاشاعى» اتتى پانەلدىك وتىرىستا باياندادى.

ءوز سوزىندە ەلشى قازاقستاننىڭ زاماناۋي دامۋ تەندەنتسيالارى مەن ۇلتتىق قۇندىلىقتار اراسىنداعى تەپە-تەڭدىكتى شەبەر ساقتاپ وتىرعانىن اتاپ ءوتتى.

«قازاقستاندا ءبارى وزگەردى، سونىمەن بىرگە ەشتەڭە وزگەرگەن جوق. وزگەرتكىمىز كەلگەننىڭ ءبارىن وزگەرتتىك، ال جاقسى نارسەلەردىڭ ءبارىن ساقتاپ قالدىق. سوندىقتان قازاقستانعا كەلسەڭىزدەر، ەلىمىز سىزدەردى جاعىمدى جاعىنان تاڭعالدىرادى. ويتكەنى ءبىز وسى دۇرىس تەپە-تەڭدىكتى ساقتاۋعا تىرىسىپ كەلەمىز»، – دەدى داۋرەن اباەۆ.

ديپلومات ەلىمىزدەگى مادەني ارتۇرلىلىك پەن جۇرگىزىلىپ جاتقان ءتىل ساياساتىنا جەكە توقتالدى. ونىڭ ايتۋىنشا، قازاقستاندا مادەنيەتتەردىڭ الۋان تۇرلىلىگى مەن ورىس ءتىلىنىڭ ءرولى جوعارى باعالانادى. ورىس ءتىلى مەملەكەتتىك قازاق تىلىمەن قاتار قولدانىلاتىنى جانە بۇل مارتەبەنىڭ ەل كونستيتۋتسياسىندا ناقتى بەكىتىلگەنى ايتىلدى.

سونداي-اق ەلشى تىلدىك ورتانىڭ ءبىلىم سالاسىنداعى سەرىكتەستىكتى نىعايتۋعا ىقپال ەتىپ وتىرعانىن جەتكىزدى. بۇگىنگى تاڭدا رەسەيدىڭ جوعارى وقۋ ورىندارىندا 60 مىڭعا جۋىق قازاقستاندىق ستۋدەنت ءبىلىم الۋدا. سونىمەن قاتار قازاقستاندا رەسەيلىك جەتەكشى جوو-لاردىڭ فيليالدارى اشىلىپ، ولاردا تەحنيكالىق جانە گۋمانيتارلىق باعىتتار بويىنشا بىلىكتى ماماندار دايارلانۋدا.

ءسوز سوڭىندا داۋرەن اباەۆ ەكى ەل اراسىنداعى مادەني بايلانىستاردى تەك رەسمي ءىس-شارالارمەن شەكتەمەي، جاڭا دەڭگەيگە كوتەرۋدى ۇسىندى. ديپلوماتتىڭ پىكىرىنشە، تەاتر پرەمەرالارى مەن كورمەلەر الماسۋدان بولەك، شىعارماشىلىق ۇجىمدارعا ەركىندىك بەرىپ، ورتاق جوبالار مەن جاڭا تۋىندىلاردى بىرىگىپ جۇزەگە اسىرۋ قاجەت.

Abai.kz