ءومىرىنىڭ 86 جاسىندا دۇنيەدەن كوشكەن نادەجدا اپا ورىس قىزى بولسا دا، قازاق ايتىسىندا ەسەنقۇل، ءاسيا، اسەلقاندارمەن تەڭ شاپتى. قازاقتىڭ قارا دومبىراسىن قولىنان تاستامادى. ءومىرىن قازاققا ارنادى. ءومىرىن ايتىسقا ارنادى. اسىرەسە، جامبىل مەن ۇمبەتالىدەي جىر الىپتارىنىڭ مۇراسىن دارىپتەۋگە سىڭىرگەن ەڭبەگى ۇشان-تەڭىز.

نادەجدا اپانى ورىس دەپ ايتۋدىڭ ءوزى قيىن. ونىڭ قازاققا دەگەن ماحابباتى، ۇلت رۋحانياتىنا سىڭىرگەن ەڭبەگى ولشەۋسىز…

ول شىنىندا قازاقتىڭ نادەجداسى ەدى. قازاقتىڭ اياۋلى اپاسى ەدى…

جامبىلدان باتا العان، اۋەزوۆ تاڭداي قاققان نادەجدا اپا

«كىشكەنتاي كەزىمدە انامنىڭ قۇربىسىنىڭ ۇيىنە ەرىپ بارىپ، اق كيىم كيگەن اقساقالدى كوردىم. ول مەنىڭ باسىمنان سيپاپ، ۇلكەن قىزىل اپورت الما بەردى. بىرنەشە جىلدان كەيىن عانا ونىڭ جامبىل جاباەۆ ەكەنىن ءبىلدىم. بۇل وقيعانى بولاشاق شىعارماشىلىعىمنىڭ باستاۋىنا ارنالعان باتا رەتىندە قابىلدادىم»، – دەيدى نادەجدا اپا ءبىر سۇحباتىندا.

ايگىلى اقىن اسقار توقماعامبەتوۆ: «ناديا، ەگەر ءسىز ولەڭ جازۋدى جالعاستىرساڭىز، تاماشا اقىن بولاسىز»، - دەپ باتا بەرەدى.

1961 جىلدىڭ ساۋىرىندە جازۋشىلار وداعىنداعى پلەنۋمدا نادەجدا لۋشنيكوۆا العاشقى ولەڭدەرىن وقىدى.

مۇحتار اۋەزوۆ ونىڭ شىعارمالارىن تىڭداپ: «ءپالى، قارلىعاشتاي قۇيتتاي ورىس جۇرەگىڭە قازاق ولەڭىنەن قانداي ادەمى ۇيا سالعانسىڭ»، - دەپ ءسۇيسىنىپتى.

سوندا نادەجدا «مەن قازاق حالقىنىڭ دا قىزىمىن»، – دەپ جاۋاپ بەرەدى.

اتاقتى باۋىرجان مومىشۇلى 1964 جىلى ايتىستا جەڭىسكە جەتكەن نادەجداعا «پوەزيالىق شەبەرلىگى ءۇشىن» دەگەن جازۋى بار التىن ساعات سىيلاعان.

Abai.kz