8 قاراشادا كەشكە الماتىنىڭ قۇتقارۋ قىزمەتىنە كوكجايلاۋ ماڭىندا 16 جاستاعى ءۇش قىزدىڭ جوعالعانى تۋرالى حابار ءتۇستى.

تاۋعا سەرۋەندەۋگە شىققان جاسوسپىرىمدەر كەشكە دەيىن ۇيلەرىنە ورالماعان. ۇيالى تەلەفوندارى ءوشىپ قالعان. ال كەيىنگى رەت قاي جەردە بولعانىن ايقىندايتىن باعدارلاما دەرەگىنشە، قىزدار كوكجايلاۋ ماڭىندا، تەڭىز دەڭگەيىنەن شامامەن 2200 مەتر بيىكتىكتە جۇرگەن.

ولاردى ىزدەۋگە الماتى قالاسى توتەنشە جاعدايلار دەپارتامەنتىنىڭ مونيتورينگ جانە جەدەل ارەكەت ەتۋ ورتالىعىنان بەس قۇتقارۋشى اتتاندى. الايدا ساعات 20:45-تە قىزداردىڭ تاۋدان وزدەرى امان-ەسەن تۇسكەنى بەلگىلى بولدى. وسىدان كەيىن ىزدەستىرۋ جۇمىستارى توقتاتىلدى.

قىزدار امان تابىلدى. دەگەنمەن بۇل جاعداي تاۋعا شىققاندا قاۋىپسىزدىك شارالارىن ساقتاۋدىڭ قانشالىق ماڭىزدى ەكەنىن تاعى ءبىر مارتە كورسەتتى. اسىرەسە كەيىنگى جىلدارى الماتى تاۋلارىنا شىعۋشىلار كوبەيىپ، قۇتقارۋشىلاردىڭ جۇمىسى دا ارتا تۇسكەنىن ەسكەرسەك، قاۋىپسىزدىك ماسەلەسىنە باسا ءمان بەرۋ قاجەت.

سۋرەت: الماتى قالاسى اكىمدىگىنەن الىندى.

بۇل ماسەلە الماتىنىڭ تاۋلى ايماقتارىن كەشەندى دامىتۋ جوسپارلارىمەن دە تىكەلەي بايلانىستى. اتاپ ايتقاندا، كوكجايلاۋ ماڭىندا جىل ون ەكى اي تۋريست قابىلدايتىن زاماناۋي تاۋ كۋرورتىن سالۋ كوزدەلگەن. Almaty Superski دەپ اتالاتىن بۇل جوبا الماتى تاۋ كلاستەرىن دامىتۋعا باعىتتالعان.

الماتى تاۋ كلاستەرى مەن Almaty Superski جوبالارى اياسىندا تاۋلى ايماقتاردى ءوزارا بايلانىستىراتىن جولدار، اسپالى جولدار، ينجەنەرلىك جەلىلەر، تۋريستەردىڭ تاۋعا شىعۋىنا ارنالعان ارنايى ورىندار مەن دەمالۋشىلارعا قىزمەت كورسەتەتىن نىساندار سالۋ جوسپارلانىپ وتىر.

مۇنداي ينفراقۇرىلىم تاۋعا كەلۋشىلەرگە قولايلى جاعداي جاساپ قانا قويماي، ولاردىڭ قاۋىپسىزدىگىن ارتتىرۋعا دا كومەكتەسەدى. ارنايى بەلگىلەنگەن سوقپاقتار مەن تاۋعا شىعاتىن ورىندار تۋريستەردىڭ جولدان اداسپاي، باراتىن باعىتىن دۇرىس تاڭداۋىنا مۇمكىندىك بەرەدى. سونىمەن قاتار قۇتقارۋشىلاردىڭ جۇمىسىن جەڭىلدەتىپ، توتەنشە جاعداي كەزىندە كومەككە تەزىرەك جەتۋىنە جاعداي جاسايدى.

Abai.kz