جەتىسۋ وبلىسىندا قازاقستان رەسپۋبليكاسى تاۋەلسىزدىگىنىڭ 35 جىلدىعىن اتاپ وتۋگە اۋقىمدى دايىندىق جۇمىستارى باستالدى.

ءوڭىردىڭ قالالارى مەن اۋداندارىندا تاريحي داتانىڭ ماڭىزدىلىعىن ايشىقتاپ، ۇلتتىق بىرلىك پەن مەرەكەلىك كوڭىل كۇي قالىپتاستىرۋعا باعىتتالعان اقپاراتتىق-بەزەندىرۋ ناۋقانى قولعا الىندى.

مەرەيتويعا دايىندىق اياسىندا وبلىس اۋماعىنداعى حالىق كوپ شوعىرلاناتىن قوعامدىق ورىنداردا، اتاپ ايتقاندا، مەديتسينالىق مەكەمەلەردىڭ، ساۋدا ۇيلەرى مەن ساۋدا-ويىن-ساۋىق ورتالىقتارىنىڭ ماڭىندا جانە كەلۋشىلەر كوپ بولاتىن وزگە دە ورىنداردا 21 LED-ەكران ىسكە قوسىلدى.

تسيفرلىق ەكرانداردا ەلىمىزدىڭ تاۋەلسىزدىگىنىڭ 35 جىلدىعىنا ارنالعان تاقىرىپتىق بەينەلەر، پاتريوتتىق بەينەروليكتەر مەن مەرەكەلىك قۇتتىقتاۋلار كورسەتىلۋدە. بۇل رەتتە ەگەمەن قازاقستاننىڭ جەتىستىكتەرىن، ۇلتتىق قۇندىلىقتار مەن وتانسۇيگىشتىك رۋحتى دارىپتەيتىن كورنەكى ماتەريالدارعا ەرەكشە ءمان بەرىلگەن.

مەرەكەىك اقپاراتتىق ناۋقان تالدىقورعان قالاسىن، سونداي-اق سارقان، اقسۋ، ەسكەلدى، پانفيلوۆ، كەربۇلاق جانە كوكسۋ اۋداندارىن قامتىدى. وسىلايشا، مەرەيتويلىق رامىزدەر مەن مەرەكەلىك بەزەندىرۋ ەلەمەنتتەرى وبلىس ورتالىعىندا عانا ەمەس، ءوڭىردىڭ اۋداندارىندا دا تۇرعىنداردىڭ كۇندەلىكتى ءومىرىنىڭ ءبىر بولىگىنە اينالۋدا.

«تاۋەلسىزدىكتىڭ 35 جىلدىعى – ەلىمىزدىڭ ءجۇرىپ وتكەن تاريحي جولىن، قول جەتكىزگەن جەتىستىكتەرىن جانە بولاشاققا نىق قادام باسقانىن ايشىقتايتىن ماڭىزدى داتا. قوعامدىق كەڭىستىكتەردى مەرەكەلىك بەزەندىرۋدىڭ ماقساتى – سالتاناتتى كوڭىل كۇي قالىپتاستىرۋمەن قاتار، ءاربىر تۇرعىنعا تاۋەلسىزدىكتىڭ قۇندىلىعىن، حالىق بىرلىگىنىڭ ماڭىزىن جانە قازاقستاننىڭ بولاشاعى ءۇشىن ورتاق جاۋاپكەرشىلىكتى ەسكە سالۋ»، – دەپ اتاپ ءوتتى ۇيىمداستىرۋشىلار.

جەتىسۋ وڭىرىندە قولعا الىنعان اۋقىمدى مەرەكەلىك ناۋقان ايتۋلى مەرەيتويعا دايىندىقتىڭ جارقىن كورىنىستەرىنىڭ بىرىنە اينالىپ، وبلىستىڭ قالالارى مەن اۋداندارىن مەملەكەتىمىزدىڭ ەڭ باستى قۇندىلىعى – قازاقستان رەسپۋبليكاسىنىڭ تاۋەلسىزدىگى توڭىرەگىندە بىرىكتىرۋگە باعىتتالعان.

Abai.kz