جەتىسۋ وبلىسىندا تورتەم دۇنيەگە كەلگەن وتباسىعا ءۇش بولمەلى پاتەر سىيعا تارتىلدى.

سابيلەرىن الماتى قالاسىنداعى ۇلتتىق اكۋشەرلىك، گينەكولوگيا جانە پەريناتولوگيا عىلىمي ورتالىعىندا ومىرگە اكەلىپ، تۋعان ۇيىنە ورالعان جاس انانى بۇگىن جەرلەستەرى سالتاناتپەن قارسى الىپ، جاڭا پاتەردىڭ كىلتىن تاپسىردى.

ءوڭىر باسشىسىنىڭ اتىنان اتا-اناسى مەن سابيلەردى وبلىس اكىمىنىڭ ورىنباسارى مارلەن كولباەۆ قۇتتىقتادى.

– سارىوزەك اۋىلىندا وتباسىنا جاڭا كوپقاباتتى تۇرعىن ءۇيدىڭ ەكىنشى قاباتىنان ءۇش بولمەلى پاتەر بەرىپ وتىرمىز. پاتەردە جايلى تۇرمىسقا قاجەتتى بارلىق جاعداي جاسالعان. الميرا الماتى قالاسىندا بولعان كەزدە وبلىس اكىمى كۇن سايىن بالالاردىڭ جاعدايىن سۇراپ-ءبىلىپ وتىردى. ءبىز ۇلتتىق اكۋشەرلىك، گينەكولوگيا جانە پەريناتولوگيا عىلىمي ورتالىعىنىڭ ماماندارىمەن تۇراقتى بايلانىستا بولىپ، انا مەن بالالاردىڭ جاعدايىن بىرگە باقىلادىق. ءتورت ءسابيدى بىردەي كۇتىپ-باعۋ وڭاي ەمەس. سوندىقتان الميراعا بالالاردىڭ كۇتىمىنە كومەكتەسەتىن ارنايى كومەكشى بەرىلەدى. جالپى، بۇلدىرشىندەردىڭ دەنى ساۋ بولىپ ءوسىپ، امان-ەسەن جەتىلۋى ءۇشىن ءوز تاراپىمىزدان بارلىق قاجەتتى كومەكتى كورسەتەمىز، – دەدى م. كولباەۆ وتباسىعا جاڭا پاتەردىڭ كىلتىن تابىستاۋ كەزىندە.

كەربۇلاق اۋدانىنىڭ تالدىبۇلاق اۋىلىندا تۇراتىن وتباسىندا تورتەمنەن بولەك ءۇش بالاسى بار. ەندى ءتورت ۇلدىڭ دۇنيەگە كەلگەن وتباسى بىردەن كوپ بالالى اتاندى.

تورتەمنىڭ اناسى الميرا بەكەەۆا 31 جاستا. ول ى. التىنسارين اتىنداعى ورتا مەكتەپتە پەداگوگ بولىپ جۇمىس ىستەيدى. ال جۇبايى ولجاس بەكەەۆ - جۇك كولىگىنىڭ جۇرگىزۋشىسى. اسىرەسە، وتباسىنا بىردەن ءتورت ۇلدىڭ قوسىلعانىنا اكەسى ەرەكشە قۋانىشتى.

جاس انانىڭ قۇرساعىندا بىردەن ءتورت ءسابيدىڭ بىتكەنىن انىقتالعان بويدا پاتسيەنت الماتىداعى ۇلتتىق اكۋشەرلىك، گينەكولوگيا جانە پەريناتولوگيا عىلىمي ورتالىعىندا مامانداردىڭ باقىلاۋىنا الىندى. 24 قىركۇيەكتە دارىگەرلەر وپەراتسيالىق جولمەن بوساندىرىپ، ارلان، ارسىلان، ءاليحان، ءامىرحان ەسىمدى ءتورت ۇل دۇنيە ەسىگىن اشتى.

– ەڭ العاش قۇرساعىمدا تورتەم بار ەكەنىن ۋزي-دەن بىلگەندە، قاتتى قۋاندىق. ارينە، ولاردى كوتەرىپ ءجۇرۋ وڭاي بولعان جوق. بالالار ءۇشىن ىشتەي قورقىنىش تا، ۋايىم دا بولدى. كەسار تىلىگى ارقىلى وتىز اپتا التى كۇن دەگەندە ۇلدارىمىز دۇنيەگە كەلدى. وتانى عىلىمي ورتالىقتىڭ ديرەكتورى جاسادى. بالالار شالا تۋعاندىقتان، العاشقى ساتتەن باستاپ دارىگەرلەردىڭ قاراۋىندا بولدى. قازىر جاقسى سالماق جيناپ، بارلىق قيىندىقتاردى ارتقا تاستاپ، ۇيگە ورالدىق، – دەيدى جاس انا.

تورتەمنىڭ اتاسى دا قۋانىشىن جاسىرعان جوق:

- بۇل – بىزگە قۇدايدىڭ بەرگەن ۇلكەن سىيى. تورتەمنىڭ ومىرگە كەلگەنىنە ءبىزدىڭ وتباسىمىز عانا ەمەس، بۇكىل جەتىسۋ قۋانىپ جاتىر. ءوزىم اتاسى رەتىندە كەرەمەت سەزىمدە تۇرمىن. الماتىدان كەلىنىم مەن نەمەرەلەرىمدى قۇرمەتپەن شىعارىپ سالىپ، اۋىلىمىز دا سالتاناتپەن قارسى الىپ جاتىر. بىزبەن بىرگە قۋانعان بارشا جۇرتشىلىققا راحمەت ايتامىن، - دەدى قايرات بەكەەۆ.

Abai.kz