الماتىدا ۆەنگر حالىقتىق كيىز باسۋ ونەرىنىڭ شەبەرى كاروي مارتون-سيونەگيدىڭ شەبەرلىك ءدارىسى ءوتتى. ءىس-شارانى ۆەنگريانىڭ الماتىداعى باس كونسۋلدىعى Qazaq-Oner ۇلتتىق قاۋىمداستىعىمەن بىرلەسىپ، الماتى قالاسى اكىمدىگىنىڭ قولداۋىمەن ۇيىمداستىردى.

كاروي مارتون-سيونەگي – Junior Prima سىيلىعىنىڭ لاۋرەاتى جانە «حالىق ونەرىنىڭ جاس شەبەرى» قۇرمەتتى اتاعىنىڭ يەگەرى. ول شىعارماشىلىعىندا ۆەنگر حالقىنىڭ ءداستۇرلى قولونەر ادىستەرىن قولدانا وتىرىپ، تاريحي مۇرانى زاماناۋي كوركەمدىك شەشىمدەرمەن ۇشتاستىرادى.

شەبەردىڭ ساباعى بارىسىندا قاتىسۋشىلار ۆەنگر حالقىنىڭ كيىز باسۋ ونەرىنىڭ ەرەكشەلىكتەرىمەن، تابيعي ءجۇندى وڭدەۋدىڭ ءداستۇرلى تاسىلدەرىمەن جانە ولاردى زاماناۋي ونەردە قولدانۋ جولدارىمەن تانىستى. سونىمەن قاتار قازاقستان مەن ۆەنگريا اراسىنداعى مادەني بايلانىسقا ەرەكشە نازار اۋدارىلدى. ويتكەنى ەكى ەلدە دە كيىز باسۋ ونەرى تاريحي جانە كوركەمدىك مۇرانىڭ اجىراماس بولىگى سانالادى.

مۇنداي باستامالار حالىقارالىق مادەنيەت الماسۋ مۇمكىندىكتەرىن كەڭەيتىپ، كاسىبي تاجىريبە الماسۋعا جول اشادى. سونداي-اق ءداستۇرلى قولونەر تۇرلەرىن ساقتاۋعا جانە ولاردىڭ جاڭا باعىتتا دامۋىنا ىقپال ەتەدى.

الماتىنىڭ تۋريزم باسقارماسى كرەاتيۆتى يندۋستريانى دامىتۋعا، مادەني مۇرانى دارىپتەۋگە جانە حالىقارالىق بايلانىستى نىعايتۋعا باعىتتالعان جوبالاردى قولدايدى. وسىنداي ءىس-شارالاردىڭ وتكىزىلۋى الماتىنىڭ حالىقارالىق مادەني ديالوگ الاڭى رەتىندەگى بەدەلىن ارتتىرۋعا دا سەپتىگىن تيگىزەدى.

Abai.kz