دۇيسەنبى, 16 قاراشا 2026
جاڭالىقتار 115 0 پىكىر 16 قاراشا, 2026 ساعات 13:27

وتانسۇيگىشتىك سوزبەن ەمەس، ىسپەن دالەلدەنۋى كەرەك!

سۋرەت: kisi.kz سايتىنان الىندى.

كەز كەلگەن مەملەكەتتىڭ  دامۋى مەن وركەندەۋى قوعامداعى بىرلىككە، ەل ىشىندەگى تۇراقتىلىققا، ازاماتتاردىڭ وتانسۇيگىشتىك سەزىمىنە جانە ۇلتتىق قۇندىلىقتاردى قۇرمەتتەۋىنە تىكەلەي بايلانىستى.

وسى ورايدا مەملەكەت باسشىسى قاسىم-جومارت توقاەۆتىڭ  قازاقستان حالقىنا ارناعان جولداۋىندا پاتريوتيزم، قوعامدىق كەلىسىم، ساياسي تۇراقتىلىق جانە مەملەكەتتىك رامىزدەرگە قۇرمەت كورسەتۋ ماسەلەلەرىنە ەرەكشە ءمان بەرىلگەن.

جالپى، پاتريوتيزم – تۋعان جەرگە، وتانعا دەگەن سۇيىسپەنشىلىك قانا ەمەس، سونىمەن قاتار ەلىنىڭ بولاشاعىنا جاۋاپكەرشىلىكپەن قاراۋ، ونىڭ دامۋىنا ءوز ۇلەسىن قوسۋ، ۇلتتىق مۇددەنى جوعارى قويۋ دەگەندى بىلدىرەتىن بولسا كەرەك. ناعىز پاتريوت ءوز ەلىنىڭ تاريحىن، مادەنيەتىن، ءتىلىن، سالت-ءداستۇرىن قۇرمەتتەپ، قوعام يگىلىگى ءۇشىن ادال ەڭبەك ەتەدى.

قاسىم-جومارت كەمەلۇلى ازاماتتاردىڭ بويىندا وتانسۇيگىشتىك قاسيەتتى قالىپتاستىرۋ، اسىرەسە جاس ۇرپاقتى ەلجاندىلىق رۋحىندا تاربيەلەۋ ماڭىزدى مىندەتتەردىڭ ءبىرى ەكەنىن تىنباي ايتىپ كەلەدى. ويتكەنى ەلدىڭ ەرتەڭى – بۇگىنگى جاس ۇرپاقتىڭ قولىندا. جاستاردىڭ ساپالى ءبىلىم الۋى، ەڭبەكقور بولۋى، زاڭدى قۇرمەتتەۋى جانە قوعامدىق ومىرگە بەلسەندى ارالاسۋى – ءپاتريوتيزمنىڭ ناقتى كورىنىسى.

وتانسۇيگىشتىك قاشاندا سوزبەن ەمەس، ىسپەن دالەلدەنۋى كەرەك. ءوز ماماندىعىن جەتىك مەڭگەرىپ، ادال ەڭبەك ەتۋ، مەملەكەتتىك ءتىلدى قۇرمەتتەۋ، بۇگىنگى كۇنى ۇنەمى ايتىلىپ جۇرگەن قوعامدىق ءتارتىپتى ساقتاۋ، قورشاعان ورتانى قورعاۋ جانە ەل جەتىستىكتەرىنە ۇلەس قوسۋ – ءاربىر ازاماتتىڭ وتان الدىنداعى بورىشى بولسا كەرەك. سوندىقتان پاتريوتتىق تاربيە وتباسىدان باستالىپ، ءبىلىم بەرۋ ۇيىمدارىندا، ەڭبەك ۇجىمدارىندا جانە جالپى قوعامدا جالعاسىن تابۋى ءتيىس.

مەملەكەت باسشىسى بيىلعى جولداۋىندا بىرلىك پەن تۇراقتىلىق – مەملەكەت دامۋىنىڭ كەپىلى ەكەنىن تاعى ءبىر نازارعا سالدى.تاريحي قالىپتاسۋلاردىڭ ناتيجەسىندە قازاقستان – ءتۇرلى ەتنوس پەن مادەنيەتتەر ءبىر شاڭىراق استىندا ءومىر ءسۇرىپ جاتقان كوپۇلتتى مەملەكەت اتاندى. ءبىزدىڭ باستى بايلىعىمىزدىڭ ءبىرى – حالىقتار اراسىنداعى تاتۋلىق پەن ءوزارا سىيلاستىق بولاتىنى دا سوندىقتان. قوعامداعى بىرلىك پەن كەلىسىم ەلدىڭ ساياسي، الەۋمەتتىك جانە ەكونوميكالىق دامۋىنا قولايلى جاعداي قالىپتاستىرادى.

پرەزيدەنت جولداۋىندا قوعامدىق كەلىسىمدى ساقتاۋ، ازاماتتاردىڭ قۇقىقتارى مەن بوستاندىقتارىن قورعاۋ، زاڭ ۇستەمدىگىن قامتاماسىز ەتۋ جانە تۇراقتى دامۋ ماسەلەلەرىن  باستى نازارعا الدى. سەبەبى تۇراقتىلىق بار جەردە دامۋ بولادى، ال ىنتىماق پەن بىرلىك بار جەردە ورتاق ماقساتقا جەتۋ مۇمكىندىگى ارتادى.

«بىرلىك بولماي – تىرلىك بولمايدى» دەگەن حالىق دانالىعىنىڭ ءمانى بۇگىنگى كۇنى دە وزەكتىلىگىن جوعالتقان جوق. ەل ىشىندەگى تاتۋلىقتى ساقتاۋ تەك مەملەكەتتىك ورگانداردىڭ عانا ەمەس، ءاربىر ازاماتتىڭ جاۋاپكەرشىلىگى. قوعامدا ءوزارا قۇرمەت، تۇسىنىستىك، توزىمدىلىك پەن سەنىم قالىپتاسقان جاعدايدا عانا مەملەكەت قۋاتتى ءارى باسەكەگە قابىلەتتى بولا الاتىنىن ايقىندايدى.

بىرلىك دەگەنىمىز ەڭ الدىمەن بارشا قازاقستاندىقتاردىڭ ورتاق وتانعا دەگەن قۇرمەتى مەن ەل بولاشاعىنا دەگەن جاۋاپكەرشىلىگى . سوندىقتان قوعامداعى ءارتۇرلى كوزقاراستارعا تۇسىنىستىكپەن قاراپ، ءوزارا ديالوگ پەن سىيلاستىق مادەنيەتىن دامىتۋ ماڭىزدى.

قازاقستان رەسپۋبليكاسىنىڭ مەملەكەتتىك رامىزدەرى – تۋ، ەلتاڭبا جانە ءانۇران – ەلىمىزدىڭ تاۋەلسىزدىگى مەن ەگەمەندىگىنىڭ ايقىن نىشاندارى. ولار حالقىمىزدىڭ تاريحىن، ۇلتتىق بولمىسىن، ارمان-مۇراتىن جانە جارقىن بولاشاققا دەگەن سەنىمىن بەينەلەيدى. وسى ورايدا، مەملەكەتتىك رامىزدەردى قۇرمەتتەۋ – بارشامىزدىڭ  ازاماتتىق بورىشىمىز بولماق.

پرەزيدەنت جولداۋىندا ۇلتتىق بىرەگەيلىكتى نىعايتۋ، تاريحي سانانى قالىپتاستىرۋ جانە مەملەكەتتىك قۇندىلىقتاردى دارىپتەۋ ماسەلەلەرىنىڭ كوتەرىلۋى مەملەكەتتىك رامىزدەردىڭ تاربيەلىك ماڭىزىن ارتتىرا تۇسەدى. اسىرەسە جاس ۇرپاققا رامىزدەردىڭ تاريحى مەن ماعىناسىن ءتۇسىندىرۋ، ولارعا قۇرمەتپەن قاراۋدى ۇيرەتۋ – ماڭىزدى مىندەت.

مەملەكەتتىك رامىزدەرگە قۇرمەت تەك رەسمي مەرەكەلەردە نەمەسە سالتاناتتى ءىس-شارالاردا عانا كورىنىس تاپپاۋى كەرەك. ول كۇندەلىكتى ومىردە، قوعامدىق ورىنداردا، ءبىلىم بەرۋ مەكەمەلەرىندە جانە ءاربىر ازاماتتىڭ ءىس-ارەكەتىندە بايقالۋى ءتيىس. سەبەبى، مەملەكەتتىك رامىزدەردى قۇرمەتتەۋ – ەل تاۋەلسىزدىگىن، ۇلتتىق نامىس پەن مەملەكەتتىك تۇتاستىقتى قۇرمەتتەۋ دەگەن ءسوز.

مەملەكەت باسشىسىنىڭ  جولداۋىندا ايتىلعان پاتريوتيزم، بىرلىك پەن تۇراقتىلىق، مەملەكەتتىك رامىزدەرگە قۇرمەتپەن قاراۋ قاعيداتتارى – قازاقستاننىڭ بولاشاعىن ايقىندايتىن ماڭىزدى قۇندىلىقتار. بۇل ۇستانىمدار ءبىر-بىرىمەن تىعىز بايلانىستى جانە ەل دامۋىنىڭ رۋحاني-ادامگەرشىلىك نەگىزىن قالىپتاستىرادى.

وتاندى ءسۇيۋ – تۋعان جەردى قادىرلەۋدەن، ەل تاريحىن قۇرمەتتەۋدەن، مەملەكەتتىك ءتىل مەن رامىزدەرگە جاناشىرلىق تانىتۋدان، قوعام الدىنداعى جاۋاپكەرشىلىكتى سەزىنۋدەن باستالادى. ال بىرلىك پەن تۇراقتىلىقتى ساقتاۋ – ورتاق ماقسات جولىندا جۇمىلا ەڭبەك ەتۋدىڭ ناتيجەسى.

سىرىم ءابىل، زاڭگەر

Abai.kz

0 پىكىر