دۇيسەنبى, 16 قاراشا 2026
ادەبيەت 142 0 پىكىر 16 قاراشا, 2026 ساعات 14:22

كەبىس

سۋرەت: tilalemi.kz سايتىنان الىندى.

كەيدە ادام ءوزى قاتىسىپ وتىرعان وقيعانى قيالىندا باسقاشا ەتىپ قۇرىپ وتىرادى. ياعني، ول وقيعانى مۇلدە باسقا قىرىنان ەلەستەتىپ كورەدى.

بۇل ءوزىڭدى الدەبىر ارتىقشىلىقتا ەلەستەتىپ قاناعاتتانۋ سەزىمىنە مۇلدە قاراماقايشى. بۇل ءدال بالانىڭ «نە بار ەكەن» الدە «نە بولار ەكەن» دەپ ساۋ تۇرعان نارسەنى بۇلدىرەتىنى سياقتى. بۇندا دا قالىپتى ءوتىپ جاتقان وقيعا قاراپ وتىراسىڭ دا ويشا ەشكىم كۇتپەگەن، ءتىپتى اقىلعا سىيمايتىن وتە توسىن ءبىر ارەكەتتى جۇرتتىڭ كوزىنشە جاسايسىڭ، سوسىن ونىڭ اسەرى مەن سالدارىن ويشا كوز الدىڭا اكەلەسىڭ. بۇل ءوزى ءارى قورقىنىشتى ءارى قىزىقتى ويىن. مۇمكىن، قورقىنىش تەرەپياسى دا شىعار.

ماراپاتتاۋ جينالىسىندامىز. مينيستر سويلەپ تۇر. جۇرتپەن بىرگە مەن دە ول كىسىگە قاراپ وتىرمىن. بىراق، ادەتتەگىدەي، ءوز قيالىمنان تۋعان ەسسىز ارەكەتىمنەن كەيىنگى زالداعى ادامداردىڭ رەاكتسيالالارىن كوز الدىما اكەلەم. بۇكىل زال ءدۇر ەتە قالدى. ايەل ادامدارىڭ وقىس شىڭعىرعان داۋىستارى ەستىلدى. جاڭا عانا مەن اياق كيىمىمدى شەشىپ الىپ مينيسترگە لاقتىرىپ قالدىم. مەنىڭ ويىمدا ول كىسى جالت بەرىپ دارىتپاي كەتەدى، نە مەنىكى ونسىز دا باسىنان جوعارى اسىپ لاعىپ كەتەدى. بۋشقا اياق كيىم لاقتىرىلعان كەزدەگى ونىڭ بەينەسى ەسىڭىزدە بولار؟! وسى الگىندە عانا بۇگىنگى ەڭ جوعارى ماراپاتتى الىپ مەنىڭ جانىمداعى ورنىنا كەپ جايعاسقان اعامىز سەلك ەتە ءتۇستى. الاساپىراندا مەن ونىڭ كوزىنە قاراپ ۇلگەردىم. جينالىس الدىندا مەنىمەن امانداسىپ، ءوزىن تانىستىرعانىنا قاتتى وكىنگەنى بايقالادى. مەن ورنىما وتىرماعان كۇيى: «كەشىرىڭىز، بايقاماي قالدىم»، نە «ءازىلىم ەدى، قۇداي اقى» دەيمىن. ارينە، ەشكىم سەنبەيدى. وققاعارلار بولماسا دا، وسىندا وتىرعان مينيسترلىك قىزمەتكەرلەرى ءسوزىمدى اياقتاپ بىتپەي مەنى تارپا باس سالادى. سىرتتان كۇزەت تە شاقىرىپ ۇلگەرەر. باستىسى بۇدان ارعى جاعدايىم نە بولادى؟ مەنى ماراپاتقا ۇسىنعان ءبولىم باستىعىنىڭ كوڭىلى قاتتى قالارى داۋسىز. عيمارات تولى قىزمەتكەلەر مەن ارىپتەستەرىم الدىندا ماسقارام شىعادى. مەنىڭ قولىمدى قايىرىپ وتە ىڭعايسىز جاعدايدا زالدان اكەتۋگە اينالعان. ارتىما قاراپ ەم، مەن جاققا قاراپ تۇرعان ءتورايىمدى كوردىم. ونىڭ جۇزىندەگى اياقاستىنان بولعان وقيعادان كەيىنگى تاڭعالىستىڭ ورنىن ەندى رەنىش پەن جيىركەنۋ سەزىمى باسقان. مەن ۇياتتان قىپ-قىزىل بوپ بارام. نەگە مۇنداي اقىماقتىققا باردىم، نەگە؟ جۇرگىزۋشى جىگىت مەنىڭ اتىمدى اتادى. سوعىلعان قولداردىڭ بىكەلكى داۋىسى قۇلاعىما كەلدى. ورنىمنان تۇردىم. ساحنانىڭ ءبىر بۇرىشىنان مانادان بەرى ماراپاتتالۋشىلاردىڭ سىيلىعىن مينيسترگە جەتكىزىپ تۇرعان قىز مەنىڭ اتىما جازىلعان ماراپپاتى مينيسترگە قاراي جەتكىزدى. ساحاناعا بەتتەدىم. الدىمداعى سىپايى جىميعان جۇزگە تەزدەتە باسىپ كەلەم. سوسىن، تاعى دا ويلادىم... جوووق، كەرەك ەمەس!

ءامىر قابشىقباي

Abai.kz

0 پىكىر