رەسەيدىڭ باسىنا دەموكراتتار كەلەدى، مىنە ناعىز توڭكەرىس سول بولادى. رەسەي توتاليتاريزمنەن، ديكتاتۋرادان، بيۋروكارتيادان، شوۆينيزمنەن، ۇلىلىق ساندىراعى (مانيا ۆەليچيا) دەگەن اۋرۋدان، جەمقورلىق پەن كوررۋپتسيادان، سوسىن ارتتا قالعان مەشەۋلىك سانادان ارىلادى، عاسىرلار بويى قورلىق پەن مازاقتان كوزى اشىلماي كەلە جاتقان سورلى ورىس حالقى ەندى ەركىن دە ازات ەلدىڭ اقجەلەڭ، اسقارالى پەرزەنتتەرىنە اينالادى، دەموكراتيا ارقاشان دا ەلدىڭ ەكونوميكاسىن تىك كوتەرەدى، رەسەي الەمدەگى ەڭ باي ەلگە اينالادى.

ونىڭ سەبەبى، رەسەي - قازىردىڭ وزىندە قاي تابيعي، ەنەرگەتيكالىق رەسۋرس جاعىنان العاندا دا الەمدەگى ەڭ باي ەل، ىشكى مۇمكىندىگى جاعىنان الەمدەگى ەڭ باي ەل. كۇللى الەم جوق بولىپ كەتسە دە رەسەي جالعىز ءوزى ءومىر سۇرە الادى، ال الەم رەسەيسىز ءومىر سۇرە المايدى. قىتاي كۇللى الەمدى (ازيانى، افريكانى، لاتىنامەريكاسىن، ەۋروپانى) سورىپ كۇنەلتىپ وتىر، ال كۇللى الەم، رەسەيدىڭ ءوزىنىڭ ىشىندەگى جەمقورلارىمەن قوسا، رەسەيدى سورىپ كۇنەلتىپ وتىر.

ول ءۇشىن يمپەريالىق پيعىلدان ارىلۋ كەرەك. نەگە كۇللى دۇنيەگە ىقپال ەتىپ وتىرعان ۇلى رەسەيدىڭ قاراپايىم حالقى سولتۇستىگىندەگى كىشكەنە عانا فينليانديادان كەدەي تۇرۋى ءتيىس؟ نەگە رەسەيدى كۇللى الەم جەك كورەدى، نەگە رەسەي، ورىستار كۇللى الەمدى جەك كورەدى؟ نەگە ورىس حالقى مال سياقتى، قۇلدىقتا ءومىر ءسۇرىپ جاتىر، نەگە كىشكەنە عانا ەستونيا حالقى ادامشا ەركىن ءومىر سۇرەدى؟ گرۋزيادان وسەتيا مەن ابحازيانى ءبولىپ تاستاعاندا رەسەيگە نە پايدا كەلدى، قىرىمدى ۋكراينادان ءبولىپ، وزىنە قوسىپ العاندا رەسەيگە نە پايدا كەلدى؟ زياننان باسقا ەشتەڭە كەلگەن جوق. رەسەيگە تەك وسىنداي توڭكەرىستى تىلەيمىن! رەسەيدىڭ حالقىنا فينليانديا مەن ەستونيا حالقىنىڭ جوعارى الەۋمەتتىك تۇرمىسىن تىلەيمىن، نورۆەگيا مەن دانيا حالقىنىڭ ەركىندىگى مەن ازاتتىعىن تىلەيمىن.

كارامزين پوبىۆال ۆو فرانتسي. رۋسسكيە ەميگرانتى سپروسيلي ەگو:
— چتو پرويسحوديت نا رودينە؟
— ۆورۋيۋت، — وتۆەتيل كارامزين…

كارامزينىڭ وسى جاۋابىنا 200 جىلدان اسىپتى. ءدال قازىر دە، "كاك تام ۆ روسسي؟" ءدال سول جاۋاپ: "ۆورۋيۋت". ەگەر دەموكراتيالىق توڭكەرىس بولماسا، 200 جىلدان سوڭ تاعى دا سول جاۋاپ بولادى. جەمقورلىق پەن ەلتوناۋ، جەرتوناۋ، حالىقتىڭ كەدەيلىگى، ءبىر-اق بەرىلەتىن ومىرىندە ادامشا ءومىر سۇرە الماي كەتۋى، ادام قۇقىقتارى مەن بوستاندىقتارىنىڭ كوزگە دە ىلىنبەۋى - تەك قانا توتاليتارلىق قوعامدا بولاتىن دۇنيە. توتاليتارلىق قوعامدا ءومىر سۇرگەن ادام - بار ءومىرىن تۇرمەدە وتكىگەن ادام.

Abai.kz comment http://abai.kz/post/view?id=594