تۇركيانىڭ ترت حابار ارناسى تاراتقان اقپاراتقا ساي              ەنەرگەتيكا ءمينيسترى تانەر يىلدىز سوماداعى كەن ورنىندا بولعان جارىلىس سالدارىنان قايتىس بولعانداردىڭ سانى 201-گە جەتتى دەپ حابارلادى. ونىڭ جۋرناليستەرگە بەرگەن مالىمدەمەسى بويىنشا جارىلىس كەزىندەگى العاشقى قۇتقارۋشىلار اراسىندا دا ىس تيگەن  جانە جارالانعان ادامدار بولۋى مۇمكىن. جاعدايدىڭ اۋىر ەكەنىن بايانداعان مينيستر: «قايعىلى حاباردى زورلانا جەتكىزەمىن، اپات سەبەبىنەن ءومىرى قيىلعاندار سانى 201گە جەتتى. جارالىلار سانى 80 كىسى. ءالى دە شاحتا استىندا قالىپ قويعاندار بار. قۇرباندار سانى تاعى دا ارتا ءتۇسۋى مۇمكىن»، - دەدى. بۇگىن اپات بولعان وڭىرگە البانياعا جاساعان ساپارىن كەيىنگە قالدىرىپ، ۇكىمەت باسشىسى ەرەجەپ تايىپ ەردوعان   كەلگەن. كەشە 13 مامىردا اپات بولعان كومىر كەنىشى ەگەي تەڭىزى جاعالاۋىنداعى يزمير قالاسىنان سولتۇستىك-شىعىسقا قاراي 120 كيلومەتر قاشىقتىقتا ورنالاسقان. اپات بولعان كەنىشتە  800 گە تاياۋ جۇمىسشى بولعان.

اباي-اقپارات