ۋكراينا شىعىسىندا ارنايى وپەراتسيا باستاۋ تۋرالى پرەزيدەنت مىندەتىن اتقارۋشى الەكساندر تۋرچينوۆ بۇگىن  جارلىق شىعاردى. ازاتتىق راديوسىنىڭ مالىمەتى بويىنشا جارلىق “تەرروريستىك قاۋىپ-قاتەرلەردىڭ الدىن-الۋ جانە ۋكراينانىڭ تەرريتوريالىق تۇتاستىعىن ساقتاۋ جونىندەگى شۇعىل شارالار تۋرالى” دەپ اتالادى. ارنايى وپەراتسيانىڭ ورىندالۋىن باقىلاۋ ۋكراينا ۇلتتىق قاۋىپسىزدىك جانە قورعانىس كەڭەسىنىڭ حاتشىسى اندرەي پارۋبيگە جۇكتەلگەن. تۋرچينوۆ بولسا ارنايى وپەراتسيانى جۇرگىزۋ شتابىن باسقارادى. وپەراتسياعا باسشىلىق جاساۋ ۋكراينا قاۋىپسىزدىك قىزمەتى باسشىسىنىڭ ءبىرىنشى ورىنباسارى ۆاسيلي كرۋتوۆقا تاپسىرىلعان. تۋرچينوۆتىڭ بۇعان دەيىنگى مالىمدەمەسىندە انتيتەرروريستىك وپەراتسيالارعا ۋكراينا قارۋلى كۇشتەرى دە قاتىساتىنى ايتىلعان. 

ءدال قازىرگى ۋاقىتتا ۋكراينانىڭ شىعىسىنداعى كەيبىر قالالاردا جاعداي ۋشىعىپ تۇر. اكىمدىك عيماراتتارىن باسىپ العان رەسەيشىل توپتار بيلىكتىڭ تالابى بويىنشا كەشە، ياعني 14- ساۋىردە قارۋلارىن تاپسىرىپ، ىمىراعا كەلۋى كەرەك بولعان. بىراق ولاي بولمادى. كەرىسىنشە جاعداي كۇردەلەنىپ كەتتى. سلاۆيانسك، لۋگانسك، گولوۆكا، دونەتسك، حاركوۆ قالالارىندا اكىمشىلىك عيماراتتارى مەن پوليتسيا بولىمشەلەرىن باسىپ العان بۇلىكشىلەر ەش بەرىلمەيتىنىن ايتىپ ءمىز باقپاۋدا. ال وسى كۇنگە دەيىن سابىرلىلىق تانىتىپ كەلگەن ۋكراينا بيلىگى ەندى ىسكە كوشەتىن سياقتى.

كەيبىر ساراپشىلار ازاماتتىق سوعىس ءحاۋپى بار ەكەنىن ايتادى. ەلدەگى جاعدايعا الاڭداۋلى ۋكراينانىڭ "باتكيۆششينا" پارتياسىنىڭ ليدەرى، ۋكراينا پرەزيدەنتتىگىنەن ۇمىتكەر  يۋليا تيموشەنكو الەم كوشباسشىلارىنان اسكەري كومەك سۇرادى.

اباي-اقپارات