جانى مەن قانى عانا ەمەس، ارى مەن بارى قازاق بولعان وسى جىگىتتەردىڭ ەرىك-جىگەرىنە، ەڭبەگىنە باس يۋگە ءتيىسپىز. ءبىز دە «Abai.kz» سايتىنىڭ بەسجىلدىق مەرەيلى تويىنا قاراتا، وسى تاعىلىمدى جوبانى جاساپ وتىرعان ازاماتتارعا ىقىلاسىمىزدى جەتكىزگىمىز كەلدى. ۇلى ابايدىڭ اتىنا ەگەلىك ەتىپ، سايت اشۋ، جوبا جاساۋ ءبىر قاراعاندا ابىروي-اتاقتى، وڭاي-وسپاق ءىس كورىنەر. بىراق وسى جاۋاپكەرشىلىكتىڭ ۇدەسىنەن شىعۋ، البەتتە، قيامەت-قايىم ءىس ەدى. جىگىتتەر قامشى سالدىرعان جوق. ولار ءوز قىزمەتتەرىنە قۇداي مەن حالىقتان كەيىنگى سۇيەنىشىمىزدىڭ ۇلى وسيەتى مەن تاعىلىمىن تارازى قىلدى. ۇلتىمىزدىڭ ارمان-مۇراتىن ۇكىلەگەن، جوعىن تۇگەندەگەن قازاق ينتەرنەتىنىڭ العاشقى قارلىعاشتارىنا اينالدى. بەس جىل بوپتى، ولار ابايدىڭ الدىنداعى – الاشتىڭ الدىنداعى پارىزعا ادالدىق تانىتۋمەن كەلەدى. ايدوس سارىم مارقۇم التىنبەك ۇستازدىڭ تاربيەسىن كورگەن بىزدەردىڭ، ءىزباسارلارىنىڭ ىشىندەگى ۇزدىگى بولعانىن بىرەۋ بىلسە، بىرەۋ بىلمەس. قاي ۋاقىتتا دا ادالدىعى مەن ازاماتتىعىنا كىر جۇقتىرمايتىن، قازاقتىڭ قاراشا ءۇيىنىڭ توبەسىنەن قۇس ۇشىرمايتىن وسى ءبىر اياۋلى جاننىڭ قادىرىن بيلىك باعالاماي، قوعام بىلمەي جاتسا دا، ءبىز ونى ساقتاۋىمىز، باعالاۋىمىز كەرەك-اق. داۋرەن قۋات 90-جىلدارى قوعامدىق، رۋحاني ومىرگە قادام باسقان جۇلدىزدى شوعىردىڭ كوشباسشىسى، سوڭعى ون جىل اۋقىمىنداعى جۋرناليستيكاعا كەلگەن بۋىننىڭ تالىمگەرى، تىلەكشىسى بوپ كەلەدى. ومىرگە دە، ونەرگە دە دەگدار تالعاممەن، كاسىبي بىلىكپەن قارايتىن داۋرەننىڭ مول تاجىريبەسى، زور ءىلىمى بۇگىن ءۇشىن تاپتىرمايدى، ەرتەڭ ءۇشىن اۋاداي قاجەت ەكەنى انىق. ءومىرجان ابدىحالىقتى ءبىر كورگەننەن-اق جاقسى كورىپ، باۋىرعا تارتپاۋ مۇمكىن ەمەس. ءومىرجان وسى قارا شاڭىراقتىڭ تابالدىرىعىنان اتتاعاننان-اق ءوز تاڭداۋىن جاساعان ادام. ونىڭ بايسالدى شىعارماشىلىعى، تابيعي قالپى سايتتاعى ىشكى رۋحاني دەڭگەيدىڭ، پاراسات، پايىم كەڭىستىگىنىڭ اۋقىمىنان حابار بەرەتىندەي. «ابايدى» قازىر ءومىرجانسىز ەلەستەتۋ مۇمكىن ەمەس. ۇشەۋى دە – ازاماتتىڭ سويىنان. ءتىپتى، جالىندى، جاستىق جىلدارىن ەكىنىڭ ءبىرى توزدىرعان كوپ كرەسلودا وتكىزەم دەسە دە بۇلاردىڭ ەركى ەدى. بىراق ولار وسى جولدى – اباي جولىن تاڭدادى. جانى مەن بارى قازاق بولعان ابايلىقتارعا ار مەن ادالدىق جولىنان، اباي جولىنان تايماڭدار دەگىمىز كەلەدى!

تالعات ەشەنۇلى

Abai.kz