بەيسەنبى, 28 ناۋرىز 2024
قوعام 6897 0 پىكىر 4 ءساۋىر, 2014 ساعات 18:56

تۇركيا سايلاۋى جانە قىرىم: تۇركىلەر ءۇشىن تاعى ءبىر سىناق

قىرىم ماسەلەسىنە بايلانىستى دەۋگە بولماس، جالپى ءبىزدىڭ ساياسي اقپارات ءوندىرۋ قابىلەتىمىز رەسەيلىك ايامەن شەكەتەلەتىندىكتەن ءتۇبىمىز ءبىر تۇركيادا بولعان جۋىرداعى سايلاۋدىڭ ماڭىزى كوزدەن تاسا ءوتتى.

سوڭعى ۋاقىتتاردا جالپىتۇركىلىك ساياساتتا ءوزىن كورسەتىپ جۇرگەن ەردوعان بيلىگى ىشكى ساياسي قيىنشىلىققا تاپ بولۋدا. وعان جاۋاپتى ءوزى دە تاپقانداي. سىرتقى كۇشتەردىڭ ايتاقتاۋى، ارالاسۋىمەن بولعان جاندايشاپ توپتار ەلگە ىرىتكى سالۋعا تىرىسىپ باقتى. سايلاۋالدى ناۋقان كەزىندە ەردوعان تايىپ مەملەكەتتىك كۇشتىك قۇرىلىمداردى تازارتۋعا ءماجبۇر بولدى.

تۇركياداعى جەرگىلىكتى اكىمدەر سايلاۋىندا نەگىزگى وپپوزيتسيالىق «قوبىزدى» ويناعان دا سىرتقى، دالىرەگى امەريكالىق كۇشكە ارقا سۇيەگەندەر بولعانى جاسىرىن ەمەس. سول سەبەپتى ەردوعان بيلىگى ساياسي پاراديگمانى وزگەرتىپ، اسىرەۇلتشىل سانالاتىن، بىراق سىرتقى ايتاققا ەرىپ كەتۋگە بەيىم باعىتتاعى توپتاردى اۋىزدىقتاۋ ارقىلى باتىستىڭ دەموكراتيالىق قۇندىلىقتارىنان سانالاتىن «تۆيتەر» سەكىلدى الەۋمەتتىك جەلىنى دوعارۋدان دا تايسالمادى. 

بۇل جاعىنان «ساياسي جاھاندانۋ» ەشكىمدى دە ايايتىن ءتۇرى جوق. وسىنداي ارپالىستى سيريا باستان كەشۋدە. ونى جاقتاعان رەسەي ساسقان ۇيرەكتىڭ ارتىمەن سۇڭگىگەن كەبىن كيدى... سىرتقا بىلدىرمەگەنىمەن قىتاي دا ىشتەي الاسۇرۋدا.

 سايىپ كەلگەندە، سوڭعى كەزدەگى ساياسي ءۇردىس تۇركىلەردى ءبىرشاما سىناققا سالۋدا. رەسەيلىك تۇركىلەر نەويمپەرياشىل باعىتتىڭ قۇرساۋىنا تاپ كەلسە، قىرىم تۇركىلەرى وتانسىز قالعانداي كۇي كەشۋدە. عاعاۋىزدار تاۋەلسىزدىك الۋعا تالپىنىپ جاتىر. ءۇش ساياسي ىقپالدى ورتاداعى قازاقستان مەن قىرعىزستاننىڭ جايى ءمالىم. وزبەكستان دا وزىنشە ىشكى وزگەرىستەرگە باس قويدى. وسى كەزەڭدە تۇركيالىق ەردوعانشىلار جەرگىلىكتى بيلىك سايلاۋىندا ايقىن باسىمدىققا جەتتى: سايلاۋ ناتيجەسىندە 80 پايىز ايماقتىق بيلىككە يە بولدى، ەلدەگى  4 ءىرى مەگاپوليستىڭ ۇشەۋى اق پارتيا قولىندا...

وسى سايلاۋدىڭ ناتيجەسىنە ءسۇيسىندى مە، الدە انتيامەريكالىق ۇستانىمعا تارتقىسى كەلدى مە بولماسا قىرىم ماسەلەسىنەن ءوزى دە شوشىدى ما، پۋتين وسى جولى ەردوعاندى سايلاۋ ناتيجەسىمەن قۇتتىقتاعان ەڭ العاشقى مەملەكەت باسشىسى بولىپتى. قالاي بولعاندا دا ەۆرازيادا ايتارلىقتاي دۇربەلەڭ بار... ودان تۇركيالىق سايلاۋ ناتيجەسى دە ورىن العانى راس. وسى سايلاۋ ارقىلى تۇركيا سىرتقى كۇشتەردىڭ ىقپالىنان بەلگىلى ءبىر ۋاقىتقا امان قالدى دەۋگە بولادى.

الداعى كۇندەر تۇركىلەرگە قالاي بولار ەكەن؟..

سىرىم دات.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3522