سۋرەتتە تۇسىرگەن: سارسەنبەك قىزايبەكۇلى

قر ونەر قايراتكەرى، دومبىرانىڭ قۇلاعىندا وينايتىن شەبەر ورىنداۋشى، ارداقتى ۇستاز سانەن ساميعۇللاقىزىن «الماتى اۋەندەرى» كونتسەرتتىك بىرلەستىگىنىڭ ديرەكتورى باعدات تىلەگەنوۆ، «سازگەن سازى» فولكلورلىق-ەتنوگرافيالىق ءانسامبلدىڭ ديريجەرى ىقىلاس نۇرعاليەۆ، الماتى قالاسى اۋەزوۆ اۋداندىق مادەنيەت ءبولىمىنىڭ باسشىسى ميراس نىساناليەۆ پەن شاكىرتتەرى ارنايى قۇتتىقتاپ، ۇيىنە باردى.

سانەن اجيەۆا اڭگىمەسىن باستاماس بۇرىن، كەلگەن قوناقتارعا الدىمەن دومبىرادا كۇي تارتىپ بەردى. قولىنان دومبىراسىن ەشقاشان تاستاماعان سانەن اپا روزا باعلانوۆا، جۇسىپبەك ەلەبەكوۆ، شارا جيەنقۇلوۆالارمەن بىرگە ءجۇرىپ، دومبىراشى رەتىندە ساحناعا شىققان. ماسكەۋدەگى قازاقستان مادەنيەتىنىڭ ونكۇندىگىنە (1949) قازاقستان دەلەگاتسياسىنىڭ قۇرامىمەن بىرگە بارىپ قايتقان. سول كۇندەردەن ەستەلىك ايتىپ بەرگەن سانەن ساميعۇللاقىزى «ماسكەۋدە «سارىارقا» كۇيىن ەستىگەن جۇرت كۇيدىڭ اۆتورى ءتىرى مە؟» دەپ سۇراعانىن كۇلىپ ەسىنە الدى.

سانەن اپانىڭ بويىنا دومبىرا تارتۋ ونەرى اكەسى ساميعۇللا اندارباەۆتان دارىعان ەكەن. دومبىراشىلار وتباسىنان شىققاندىقتان سانەن ساميعۇللاقىزىنىڭ ونەرگە بارۋىنا ەش قارسىلىق بولماعان. نەبارى ون التى جاسىندا قۇرمانعازى اتىنداعى ۇلت اسپاپتارى وركەسترىنە جۇمىسقا قابىلدانادى. سونىمەن قاتار، ۇيىمداستىرۋشىلىق قابىلەتى دە ەرتە بايقالعان. 25 جاسىندا شىمكەنت مۋزىكا ۋچيليششەسىن قۇرىپ، ونى 26 جىل باسقارعان.

«ۇستازى جاقسىنىڭ ۇستامى جاقسى» دەگەن حالىق دانالىعى. سانەن ساميعۇللاقىزىنىڭ شاكىرتتەرى كىل تالانتتىلار. ولار سەيدوللا بايتەرەكوۆ، لاكي كەسوگلۋ، جالعاسبەك بەگەندىكوۆ، نۇرلان بايگوزوۆ، نۇرجامال ۇسەمباەۆالار. ءتىپتى ونىڭ شاكىرتتەرى تەك قازاقستاندا ەمەس، وزگە ەلدەردە دە بار. گرەكياداعى شاكىرتتەرى سانەن اپانى ء«بىزدىڭ ونەردەگى انامىز» دەپ اتايدى ەكەن. ال «سازگەن سازى» ءانسامبلىنىڭ ديريجەرى ىقىلاس نۇرعاليەۆ: «مەن سانەن اپادان تۇركمەنستاننان ارنايى كەلىپ، ءدارىس الدىم. مەن كەلگەن سوڭ ارتىمنان وزگە تۋىستارىم دا كەلىپ، وسى ۋچيليششەدە ءبىلىم الدى. تۇركمەنستاننان، وزبەكستاننان، قاراقالپاقستاننان جاستار اعىلىپ كەلىپ جاتتى. اپامىز باسقارعان شىمكەنت مۋزىكالىق ۋچيليششەسى رەسپۋبليكادا اتاقتى وقۋ ورنى بوپ ەسەپتەلەدى. سەبەبى، بۇل جەرگە ءار جەردەن، ءتىپتى شەتەلدەردەن شاقىرتىلعان بىلىكتى ماماندار ساباق بەردى»، - دەيدى.

قازاق ونەرى تۋرالى اڭگىمە بارىسىندا سانەن اپا بۇگىنگى قازاق ەستراداسىنا قاتىستى پىكىرىن ءبىلدىردى. «بۇرىن كوركەمدىك كەڭەس دەگەن بولۋشى ەدى. قازىر ول جوق. ساحنا دەگەن كيەلى عوي. قازىر كوپشىلىك ءانشى ساحنانى سىيلاۋدان قالىپ بارادى. نە بولسا سونى ءان عىپ ايتادى، قالاي بولسا، سولاي كيىنىپ شىعادى. ساحنا دەگەن تاربيە قۇرالى بولۋى كەرەك»، - دەيدى ارداقتى ۇستاز.

الماتى قالاسى اۋەزوۆ اۋدانى اكىمدىگىنىڭ اتىنان كەلگەن مادەنيەت ءبولىمىنىڭ باستىعى ميراس نىساناليەۆ سانەن اجيەۆاعا العىس حات تاپسىردى. ءوزىن ارنايى قۇتتىقتاپ كەلگەندەرگە سانەن اپا العىسىن ءبىلدىرىپ، اق باتاسىن بەردى.

انىقتاما

اجيەۆا سانەن ساميعۇللاقىزى 1929 جىلى قىركۇيەكتىڭ ون بەسىندە ماڭعىستاۋ وبلىسى، بەينەۋ اۋدانىندا ومىرگە كەلگەن. قر مادەنيەتىنە ەڭبەك سىڭىرگەن قايراتكەر 1946-1955 جىلدارى قۇرمانعازى اتىنداعى ۇلت اسپاپتار وركەسترىندە ورىنداۋشى، ال 1951-1953 جىلدارى چايكوۆسكي اتىنداعى ۋچيليششەدە مۇعالىم، بۇدان سوڭ 1955-1958 جىلدارى  شىمكەنتتەگى №1 مەكتەبىنىڭ، كەيىننەن 1958-1984 جىلدارى شىمكەنت مۋزىكا ۋچيليششەسى ديرەكتورى بولىپ قىزمەت اتقاردى. ماسكەۋدە وتكەن قازاقستاننىڭ ونكۇندىگىندە (1949) دەلەگاتسيا قۇرامىندا بولعان. قىتاي حالىق رەسپۋبليكاسىنىڭ ءبىر جىلدىق مەرەكەسىنە (1950), سونىمەن قاتار، بۋحارەستتە وتكەن ستۋدەنتتەر مەن جاستار فەستيۆالىنە (1953) قاتىسقان. مادەنيەت سالاسىندا قوسقان ەڭبەگى ۇشان-تەڭىز. قازاق ۇلت اسپاپتارىنىڭ دومبىرا سىنىبى ءۇشىن باعدارلاما جازدى. 1974 جىلى «ەڭبەكتەگى ەرلىگى ءۇشىن» مەدالىمەن، 1982 جىلى كسرو «ورتا ءبىلىم بەرۋ ءىسىنىڭ ۇزدىگى» بەلگىسىمەن ماراپاتتالدى. جانە 1984 جىلى قازاق سسر-ءى ەڭبەك سىڭىرگەن قىزمەتكەرى دەگەن قۇرمەتتى اتاق بەرىلدى.

اباي-اقپارات