قارجى پولتسياسى اگەنتتىگى پاۆلودار وبلىسىنىڭ بۇرىنعى اكىمى ەرلان ارىننىڭ ءىسىن قاراپ اياقتادى.

ەرلان ارىن اسا ءىرى كولەمدە پارا الىپ، قارجى جىمقىرۋ ءۇشىن وبلىستىق اكىمدىكتە قىزمەت اتقارعان لاۋازىم يەلەرىن پايدالانىپ ۇيىمداسقان قىلمىستىق توپ قۇردى دەپ ايىپتالعان بولاتىن. ءسويتىپ ونىڭ ۇستىنەن  4 ناۋرىزدا  (2014 ج) ءىس قوزعالعان ەدى. ەندى سول ءىس تولىق قارالىپ بىتۋگە تاياسا كەرەك.  ەكس-اكىم «ENRC Kazakhstan» جشس-ىنەن 23 ميلليون تەڭگە كولەمىندە پارا الدى دەپ ايىپتالۋدا. سونداي-اق ول مەملەكەتتىك ساتىپ الۋ كونكۋرستارىنا قاتىسقان قۇرلىس فيرمالارىنان دا پارا الىپ وتىرعان كورىنەدى. ارىنعا دەيىن پاۆلودار وبلىسى اكىمدىگى قۇرلىس باسقارماسىنىڭ باستىعى الىبەك قۇلجانوۆ بيۋدجەتتەن 153 ملن تەڭگە ۇرلادى دەپ ايىپتالعان-دى. باسىندا 1 ملن 400 مىڭ، سوڭىنان 8 ملن 700 مىڭ پارا الدى دەپ ايىپتالعان تولەگەن باستەنوۆ تە (ەرلان ارىننىڭ كەڭەسشىسى) 2013 جىلى تۇتقىندالعان. وسىلايشا اينالاسىنا «جەمقورلاردى» جيىستىرعان ەرلان ارىن سوت ۇكىمىن كۇتىپ تەرگەۋدە جاتىر.

ەرلان ارىن نەگىزىنەن عالىم ادام. ەكونوميكا عىلىمدارىنىڭ دوكتورى، پروفەسسور.  توعىز تومدىق «قازاقتار» جانە «قازاق ادەبيەتى»، «قازاق ءتىلى» اتتى ەنتسيكلوپەديالىق انىقتامالىقتار مەن ءماشحۇر ءجۇسىپ مۇرالارىن جيناقتاپ، قۇراستىرۋشى. 1997 جىلى «جىل ادامى» اتانعان تۇلعا.    پرەزيدەنت جارلىعىمەن اكىمدىك قىزمەتكە تاعايىندالاردان بۇرىن پاۆلودار وبلىستىق ءماسليحاتىنىڭ مۇشەسى، س. تورايعىروۆ اتىنداعى پەداگوگيكالىق ۋنيۆەرسيتەتتىڭ رەكتورى بولدى. رەكتور كەزىندە وڭىردەگى شەتىن ماسەلەلەرمەن شۇعىلدانعان عالىم وبلىس تۇرعىندارىنىڭ ىقىلاسىنا بولەنىپ سول بەتىمەن اكىمدىك قىزمەتىن جالعاستىرعان-دى. 2013 جىلى  31 مامىر كۇنى ساياسي-قۋعىن سۇرگىن قۇرباندارىنا وبلىس ورتالىعىنان مەموريال كەشەنىن اشىپ، سول جىلى ءمىنايى ءبىر سەبەپتەرمەن ول كازكاتاردىڭ اتاماندىعىن دا قابىلداپ جىبەرگەن بولاتىن.

ەرلاننىڭ اكەسى مۇحتار اقساقال قازاقتىڭ دەگدار ادامدارىنىڭ ءبىرى بولدى. مۇحتار ارىننىڭ اقتوبەدە ق. جۇبانوۆ اتىنداعى ۋنيۆەرسيتەتتى باسقارىپ ءجۇرىپ ۇلكەن ىستەر تىندىرعانىن جۇرت اڭىز قىلىپ ايتادى. سونداي ءىرى تۇلعا وبلىس اكىمشىلىگىنە باس سۇعىپ جۇرگەن كۇندەرىنىڭ بىرىندە مەملەكەتتىك قىزمەتكە جاڭا ىلىككەن اسلان ءمۋسيندى كورەدى. جاس جىگىتتىڭ العىرلىعىن ۇناتىپ، وعان قولداۋ جاسايدى. «سىيعا – سىي، سىرعا – بال» دەگەن بار ەمەس پە، كەيىن بيىك مانساپتارعا قول جەتكىزگەن مۋسين مۇحاڭنىڭ بالالارىنا باس-كوز بولىپ، اعالىق تانىتقانعا ۇقسايدى.

اسلان مۋسين پرەزيدەنت اكىمشىلىگىنىڭ جەتەكشىسى بولىپ تۇرعان كەزىندە ەرلان ارىن پاۆلودار وبلىسىنىڭ اكىمدىگىنە تاعايىندالدى. ءمۋسيننىڭ «تابانىنىڭ استىنداعى جەر قوزعالا باستاعان» كۇننەن-اق ارىننىڭ دا دەسى قايتىپ، ارىنى باسىلدى. ەرلان ارىننىڭ ءىستى بولۋىن جۇرت وسىلايشا ءمۋسيننىڭ  ساياسات الاڭىنداعى ويىننان شەتتەتىلۋىمەن بايلانىستىرادى. نەگە دەسەڭىز، قازاقستاندا ماقتاۋلى اكىم-قارالاردىڭ نەمەسە وزگە دە لاۋازىم يەلەرىنىڭ اياق استىنان ء«اي، كاپىر» اتانىپ شىعا كەلۋى اسا قيىن ەمەس. وسىدان ونشاقتى جىل بۇرىن پرەزيدەنتتىڭ «ليۋبيمچيگى» اتانىپ جۇرگەن عالىمجان جاقيانوۆ 500 مىڭ تەڭگە كولەمىندە پارا الدى دەگەن ايىپ تاعىلىپ اباقتىدا 6-7 جىل وتىرىپ شىققان بولاتىن.

Abai.kz