ءار جىلى وقۋ ماۋسىمى اياقتالا سالا ءبىلىم جانە عىلىم مينيسترلىگى «كەلەسى جىلى داۋ بولمايدى، وزگەرىس ەنگىزەمىز، ۇبت-نىڭ فورماتى وزگەرەدى» دەپ، قۇرعاق ۋادە بەرگەنىمەن، بىرىڭعاي تەستتىڭ بىتپەيتىن كەلەڭسىزدىگى تاعى قايتالانادى. بيىل دا ۇبت داۋ-دامايسىز ءوتىپ جاتقان جوق. ءار جەردەن ايعاي شىعىپ، اتا-انالار بازىناسىن ايتىپ جاتىر. ءبىزدىڭ رەداكتسيامىزعا قاراعاندى قالاسىنان وكىمباەۆا جاڭاگۇل سەرىكقىزى ەسىمدى انا حابارلاستى. جاڭاگۇل سەرىكقىزى – 24 جىلدىق قىزمەت ءوتىلى بار مۇعالىم. جاڭاگۇل وكىمباەۆانىڭ قىزى ماجەتاي ەركەناز كارىعۇلقىزى – بيىل مەكتەپ ءبىتىرىپ جاتقان جاس تۇلەك. ول قاراعاندى وبلىسى مۇراگەر مامانداندىرىلعان مەكتەپ ينتەرناتىنىڭ وقۋشىسى. ەركەنازدىڭ اناسىنىڭ ايتۋىنشا،  سىناق كەزىندە كەيبىر وقىتۋشىلار تاراپىنان ەركەنازعا قىسىمدار جاسالىپ، سىناقتى جاقسى تاپسىرۋىنا كەدەرگى كەلتىرگەن:

-         بالاما قىسىم جاسادى، بالام ارقىلى ماعان قىسىم جاسادى. ۇبت-دا وتە ۇلكەن ادىلەتسىزدىك بولدى. بالامدى ءوزىنىڭ سىنىپتاستارىمەن ەمەس، جەكە كابينەتكە ءبولىپ تاستادى. بەيسەنبەك گاۋھار احمەديقىزى دەگەن سىناما تەست الىپ جۇرگەن مۇعالىم ۇبت-دان بۇرىن  «تەست كەزىندە جالعىز وتىرعىزىپ قوياتىنى» تۋرالى  بالاما ەسكەرتىپتى. ءوزىم بىلتىر 20 قىركۇيەكتە وسى مەكتەپتەگى  اششى شىندىقتى ايتامىن دەپ جۇمىستان كەتتىم. 13 مامىر كۇنى استاناعا،  ادام قۇقىقتارى جونىندەگى دەپارتامەنتكە ارىز جازدىم. «نۇر وتان» پارتياسىنا دا جازدىم ولار ءبىز قاراي المايمىز دەيدى. سودان كەيىن قىسىم كۇشەيدى بىزگە. الدە بىرەۋلەر بالاما «ساعان قاۋىپ بار» دەپ تە ەسكەرتىپتى. بالام پسيحولوگيالىق سوققى الدى.  مەكتەپتە كوپ اقشا جينالىپ جاتىر. قاراعاندىداعى ەڭ قىمبات «وريستا» دەگەن رەستوراندا مەكتەپ ءبىتىرۋشى تۇلەكتەردىڭ كەشىن وتكىزبەك. بۇنىڭ ارتىندا ادامي فاكتور بار.

بالام تەستتەن 85 ۇپاي الدى. سىناق تەستتەردە 100 باللدان جوعارى الىپ جۇرەتىن. 4 ماۋسىم  كۇنى تاڭەرتەڭ اپەللياتسياعا بەرۋگە بارساق، مەكتەپتىڭ الدىندا كەشە ءىلىنىپ تۇرعان قاعاز جوق. 20 شاقتى  بالاعا 20-25 باللدان قوسىلىپ جازىلىپ، باسقا كورسەتكىش قاعاز ىلىنگەن. مىناۋ نە دەپ ەم، «كەشە بىزدە تەحنيكالىق قاتەلىك بولدى، استاناعا جىبەردىك، تۇزەتىلىپ وسى قاعاز كەلدى» دەدى. ءبىر قىز بالا ءجۇردى كەشە نەگە كەلمەدىڭىزدەر دەپ، 10 بالل 50 مىڭ تەڭگە، 100 بالل 300 مىڭ تەڭگە دەگەن سياقتى اقشاعا ساتىلىپتى. اتا-انالارمەن سويلەستىم، كەيبىرى ء«بىز الدىن الا تولەپ قويعانبىز، بىزگە مىناداي بالل قويىپ بەرۋى كەرەك» دەپ وتىر.  اپەللياتسيانى كەشكە دەيىن كۇتتىك، بالل قوسپادى. ۇبت ادىلەتسىز ءوتتى. بۇل قوعامدىق ىندەت،  -دەيدى جاڭاگۇل وكىمباەۆا.

بازىنا ايتقان انا بىزگە سىناق بولعان 3 ماۋسىمدا ىلىنگەن كورسەتكىش قاعاز بەن ەرتەسى ىلىنگەن ناتيجە قاعازىنىڭ فوتوسۋرەتىن جىبەردى. جيىرما باللدىق ايىرماشىلىقتار ايعايلاپ-اق كورىنىپ تۇر. ءبىر بالا عانا ەمەس، تۇتاس ءبىر سىنىپتىڭ تەست قاعازىنان قاتەلىك كەتە قويۋى مۇمكىن بە؟ نە دەسەك تە مينيستر اۋىسقىش ءبىلىم سالاسىنىڭ بىلىعى ءالى كوپ ەكەنى انىق.

نۇرعالي نۇرتاي

Abai.kz