جەكسەنبى, 5 ءساۋىر 2020
COVID-19 قازاقستاندا. جۇقتىرعاندار — 531. جازىلعاندار — 36. قايتىس بولعاندار — 5
قوعام 7320 0 پىكىر 28 مامىر, 2014 ساعات 12:07

جەر داۋى: الماتى وبلىسى اكىمىنە اشىق حات

باسپانا  - قازاقتىڭ جاندى جەرى. اسىرەسە، ءىرى قالالاردىڭ ماڭىنا قونىستانعانداردىڭ جەر ماسەلەسى ءالى كۇنگە كۇرمەۋى قيىن ماسەلە بولىپ تۇر. مىنە، الماتى وبلىسى، قاراساي اۋدانىنا قاراستى كەمەرتوعان ەلدى-مەكەنىندە تاعى دا جەر داۋى شىقتى. بالا-شاعاسىنىڭ اۋزىنان جىرىپ، نەسيە الىپ، الاقانداي جەر تەلىمىنە ءۇي سالعان جۇرت اۋىل ىشىنە تۇسەتىن جولداردىڭ كەسىرىنەن باسپانامىز كۇرەلىپ، جەرىمىزدەن ايىرىلامىز با دەپ جانىن شۇبەرەككە ءتۇيىپ وتىر. الاڭداۋلى. 5-10 سوتتىق جەرىن قورعاۋ ءۇشىن نەگە دە بولسا بارۋعا دايىن.

تومەندە الماتى وبلىسى، قاراساي اۋدانى، كەمەرتوعان اۋىلى، جاڭا قۇرىلىس تۇرعىندارىنىڭ وبلىس اكىمىنە جازعان اشىق حاتىن جاريا ەتىپ وتىرمىز. وبلىس باسشلىعى ماسەلەنى ۋشىقتىرماي شەشەدى دەگەن سەنىمدەمىز.

Abai.kz

 

 

 

الماتى وبلىسىنىڭ اكىمى

ا.ت. مۇساحانوۆ مىرزاعا

الماتى وبلىسى، قاراساي اۋدانى،

كەمەرتوعان اۋىلى

جاڭا قۇرىلىس تۇرعىندارىنان

 

قۇرمەتتى اڭسار تۇرسىنحانۇلى!

ءبىزدىڭ سىزگە وسى حاتتى جازۋداعى باستى ماقساتىمىز – جەر ماسەلەسى! ءبىز جەر تەلىمدەرىن (06, 08, 10 سوتىق (شارۋاشىلىق ماقساتىنداعى) ساتىپ العان ەدىك (باسىپ العان جوقپىز). ءاۋ باستا، ساتىپ الاردا قاراساي اۋدانى «جەر قاتىناستارى ءبولىمى» جانە «ساۋلەت، قۇرىلىس جانە قۇرىلىس ءبولىمى» مەكەمەلەرىنەن انىقتاعاندا العان جەرلەرىمىزدە جوسپار بويىنشا ەشقانداي باسىپ وتەتىن جول تۇسەتىندىگى تۋرالى مالىمەت بولماعان ەدى. ءبىز ونداي كوڭىل الاڭداتارلىق بولماعان سوڭ، اركىم قال-قادىرىمىزشە، شاما-شارقىمىزشا باسىمىزعا پانا سالىپ الدىق (ۇلكەن كوتتەدج ۇيلەر ەمەس، ارينە). كەيبىرەۋلەرىمىز ءۇيدىڭ ىرگەتاسىن قالاپ، جارىم-جارتىسىن عانا بىتىرسەك، ەندى بىرەۋلەرىمىز كىشىگىرىم ءۇي سالىپ، كورپەمىزگە قاراي كوسىلىپ جاتتىق. بىرەۋلەر – جيعان-تەرگەنىنە، بىرەۋلەر – اعايىنعا قاۋعالانىپ قارىزداندىق. ءتىپتى بولماعان سوڭ، بانككە بەلشەدەن باتىپ نەسيە الىپ سالعانىمىز تاعى بار. قىسقاسى، قارا سۋدى قايماق ەتىپ، بالا-شاعانىڭ اۋزىنان جىرىپ، ەندى-ەندى ەتەك-جەڭىمىزدى جيناپ كەلە جاتقان سياقتى ەدىك...

ال ەندى بيىل جاعداي باسقاشا بولىپ تۇر. ماڭايىمىزداعى شارۋاشىلىق ماقساتتاعى جەر تەلىمدەرىنە ءۇي سالىپ العان باسقا دا كورشىلەرىمىزگە جەرلەرىن زاڭداستىرۋعا اۋداندىق جوعارىدا اتالعان مەكەمەلەردەن قۇجاتتارىن رەتتەۋگە رۇقسات بەرىلىپ جاتتى. سول كوپپەن بىرگە، سول جاققا ءبىز دە باردىق. ناتيجەسىندە ءبىزدىڭ جەرلەرىمىزدىڭ ۇستىنەن بولاشاقتا ۇلكەن كوشەلەردى قوساتىن كىشكەنتاي ارالىق جولدار وتەتىن بولىپ شىقتى. بۇل جولدار بولاشاقتا قالادان كەلىپ وتەتىن رىسقۇلوۆ، اقىن سارا كوشەلەرىنە، اينالما جولدارعا ەشقانداي قاتىسى جوق.  بىرەۋلەرىمىزدىڭ سالىپ قويعان ۇيلەرىمىز تولىعىمەن، ەندى ءبىرىمىزدىڭ ۇيلەرىمىز جارتىلاي بۇزىلادى ەكەن. قاراساي اۋدانى «ساۋلەت، قۇرىلىس جانە قۇرىلىس ءبولىمى» ماماندارى جەرىمىزدەن جول وتەتىن (سالعان ۇيلەرىمىز كۇرەسىنگە كەتەدى) كارتانى قولدارىمىزعا ۇستاتتى. بۇل جاعدايدان قاراساي اۋدانى اكىمدىگى دە حاباردار. مۇنداي جايتتى كۇتپەگەن قاراپايىم حالىقتىڭ توبەسىنە جاي تۇسكەندەي اسەر ەتتى. «ەندى نە ىستەيمىز؟» – دەپ جىلاپ وتىرعان ايەل ادامعا، «ساۋلەت، قۇرىلىس جانە قۇرىلىس ءبولىمى» مامانى (7 كابينەتتەگى) داۋرەن ەسىمدى قىزمەتكەردىڭ: «جەرىڭە كارتوپ ەك، الما ەك. ماعان نە دەيسىڭ ەندى؟ سەندەرگە ونداي جەرلەردى الىپ، ءۇي سال دەگەن كىم بار؟!» – دەپ مازاق ەتكەنى جىعىلعان جانعا جۇدىرىق  بولدى. بۇل ءسوزدىڭ ايتىلعانىن باسقالار دا قۋاتتايدى. (وزگەلەرگە دە ايتىلعان). مىنە، حالىق ءۇشىن ەڭبەك ەتىپ وتىرعان مەملەكەتتىك مەكەمە قىزمەتكەرىنىڭ ايتقانى!

 قورىتا ايتقاندا، قاراساي اۋدانىنىڭ باس جوسپارىن قايتا قاراپ، ماسەلەنىڭ وڭ شەشىمىن تابۋعا ىقپال ەتۋىڭىزدى سۇرايمىز! ءۇش-ءتورت ءۇي سايىن سالىناتىن ەنى 15-20 مەترلىك ارالىق جولداردىڭ كىمگە قاجەتى بار؟ اركىمنىڭ  ءوز جەرى، وسى ۋاقىتقا دەيىنگى ءجۇرىپ كەلگەن ءوز جولدارى ساقتالسا دەيمىز! ەلدى ەلەڭدەتىپ، كوڭىلىن كۇپتى ەتكەن وسى ءتۇيىندى جاعدايدى تەز ارادا رەتتەۋىڭىزدى وتىنەمىز!

باتىر بابالارىمىز اق نايزانىڭ ۇشىمەن، اق بىلەكتىڭ كۇشىمەن قورعاپ قالعان، الەم بويىنشا جەر كولەمى جاعىنان 9-شى ورىن الاتىن ءوز جەرىمىزدە وگەيلىك كورمەسەك ەكەن دەگەن اعايىننىڭ ماسەلەسى اياقسىز قالماس دەگەن ويدامىز!

 تومەندە قول قويۋشىلاردىڭ اراسىندا الدى التى بالانىڭ، ازى ءۇش بالانىڭ اتا-اناسى، ۇيىندە قارت اتا-انالارىن قاراپ وتىرعان جاندار مەن بالا تاربيەلەپ وتىرعان جالعىزباستى انالاردىڭ دا بارلىعىن باسا ايتامىز!

حات سوڭىندا جەر يەلەرىنىڭ اتى-ءجونى مەن كاداسترلىق نومىرلەرى قوسا جازىلىپ وتىر.

بارلىعى  47 (قىرىق جەتى) ادام قول قويعان. قول قويۋ ءالى جالعاسۋدا.


0 پىكىر