...الماتى قالاسىنىڭ بۇقار جىراۋ بۋلۆارى مەن يسا بايزاقوۆ كوشەلەرىنىڭ قيىلىسىندا ورنالاسقان ۇيلەردىڭ تۇرعىندارى ەكى اپتا بويى ۇيقىسىنان ايرىلدى...

قوس كوشە بۇرىشىنداعى ۇيلەردىڭ اۋلالارى ايرىقشا تازارتىلىپ، سىپىرىلىپ، ۋاقىتشا گۇلدەر وتىرعىزىلىپ، بالالار وينايتىن قوسىمشا ترەنەجەرلار ورناتىلىپ، شارباقتار سىرلاندى. «نا بۋلۆارە»، «اركا» دەيتىن دۇكەندەردىڭ قابىرعالارى مۇنتازداي جۋىلىپ، ءتىپتى، كوكونىس دۇڭگىرشەكتەرى بۇتىندەلدى.

جارتى ايدىڭ شاماسىندا اتالعان قيىلىستاعى كولىك كەپتەلىسى حالقى قۇجىناعان پەكيندى كوزگە ەلەستەتتى. قۇقىق قورعاۋ ورىندارىنىڭ وكىلدەرى ءار اۋلا مەن ەسىكتىڭ الدىن كۇزەتتى. كەرەك دەسەڭىز، داۋىستى ساز تىڭداپ، قاتتى سويلەمەۋگە دە كەڭەس بەرىلدى.

قيىلىستاعى قازاق، ورىس جانە ماتەماتيكا مەكتەپتەرىنىڭ تۇلەكتەرى دە ادەتتەگىدەن «ادەمى» كورىنىپ، ء«تارتىپتى» كۇيگە ەندى. ءبىلىم وشاقتارىنىڭ اۋلالارىنا قوسىمشا گۇلدەر وتىرعىزىلىپ، ماتەماتيكا مەكتەبىنىڭ اۋلالارى تۇگەل سىرلاندى. مەكتەپتىڭ قارسى الدىندا ءبىر-بىرىنە تەرىس قاراعان ەكى گازەل كولىكتەرى 24 ساعات بويى كۇزەت قۇردى. جاقىن اۋلالاردىڭ شاتىرلارىندا مەرگەندەردىڭ قونىستانعانى دا بايقالدى. ءسويتىپ، ەكى جەتى ىشىندە الماتىنىڭ ءبىر بۇرىشى لوندوننىڭ باي-ماناپتارىنىڭ تاپ-تازا، مۇلدەم مامىراجاي ءارى قاۋىپسىز ايدىك اۋدانىنا ۇقساپ قالدى.

ەل داۋرىعىپ كەتتى، وقۋشىلار بۋلىعىپ كەتتى...

ۇزىنقۇلاق: «بۇرىشتاعى ءبىر مەكتەپكە ەلباسى كەلەدى ەكەن» دەدى...

ءدۇيىم جۇرت كۇتكەن دۇيسەنبىدە اتالعان قيىلىستان اتتاپ ءوتۋ ازاپقا ءتۇستى. كولىك تۇگىلى، ادامنىڭ جولى كەسىلىپ، اياعى تۇسالدى. سوعان كۇيىنگەن ءبىر كەيۋانا: «بۇل نە دەگەن ەلىن «سۇيگىش» ەر ەدى?!.» – دەدى.

 نامىسقا جانىپ تۇسكەن قازاق مەكتەبىنىڭ ءبىر وركەنى: «بىزدە ۇلت تا بىرەۋ، ۇلىق تا بىرەۋ. ءوز ەرىن ءوز ەلى قورعاۋى كەرەك!» – دەپ، الگى اجەيدىڭ ءۋاجىن «ورىپ» جىبەردى...

...ءبىر ءسات جەر سىلكىنگەندەي، داۋىل كەلگەندەي، توپان العانداي اپىرىلىس-ساپىرىلىس باستالدى. كۇتىپ تۇرمىز...

سويتسەك، قادىرمەندى قوناعىمىز – ەلباسىمىز نۇرسۇلتان نازارباەۆ ەمەس، رەسپۋبليكالىق فيزيكا-ماتەماتيكا مەكتەبىنىڭ تۇلەگى، قازىرگى ۇكىمەت باسشىسى كارىم ءماسىموۆ ەكەن، ءوزىنىڭ ءبىلىم العان وشاعىنا كەلگەن...

...ەسىمىزگە 1997 جىلى سول كەزدەگى پرەمەر-مينيستر اكەجان قاجىگەلديننىڭ  ايقاي-شۋسىز، الاسۇرگىنسىز، تىپ-تىنىش، قاتارداعى قاراپايىم ادام رەتىندە وقۋ ورىنىنا بارىپ، مەكتەپ ۇجىمىمەن جۇزدەسىپ، شاكىرتتەرمەن اڭگىمەلەسكەنى ءتۇستى...

بارىنەن بۇرىن اجەيدىڭ «اڭگىمەسىنە» قارسى داۋ ايتقان  قازاق مەكتەبى وركەنىنىڭ تۇككە تۇسىنبەي، مەڭ-زەڭ كۇيدە: «ەلباسى بىزدە ەكەۋ مە؟!.» – دەپ قويعان ساۋالىنا جاۋاپ تاپپاي، ءتىلىمىزدى تىستەدىك...

Abai.kz