بەيسەنبى, 28 ناۋرىز 2024
قوعام 5090 0 پىكىر 22 قاڭتار, 2015 ساعات 22:37

احمەتبەكوۆكە ءھام استانا اكىمشىلىگىنە ارنالعان اقىل

«بومجدار ءبىزدىڭ قوعامنىڭ اۋرۋىنا اينالدى! ولار استانامىزدىڭ كەلبەتىن بۇزىپ جاتىر! جاقىندا ەكسپو-2017 وتەدى، وعان شەتەلدىك تۋريستەر كەلەدى. سوندا ءبىزدىڭ ۇيسىزدەر قايىر سۇراپ جۇرسە، تۋريستەردىڭ ساناسىندا ءبىزدىڭ گۇلدەنگەن ەل تۋرالى قانداي وي قالىپتاسادى؟ مىنە، مىنالارىڭ ەكسپو وتكىزىپ جاتىر، ال حالقى كەدەيلەنىپ، ءۇيسىز ءجۇر دەمەي مە؟ بۇعان جول بەرۋگە بولمايدى!»

جامبىل احمەتبەكوۆ، ءماجىلىس دەپۋتاتى ءھام حالىقشىل كوممۋنيستەر حاتشىسى 
Abai.kz

ءدال وسى استاناداعى «بومجدار» ماسەلەسىن انا-ا-اۋ جىلى «وبسە» ءسامميتى وتەر كەزدە مەن دە ءبىر جازبامنىڭ ءبىر پۇشپاعىنا قىستىرا كەتكەن ەدىم. سوندا مۇرىنىمدى شۇقىپ وتىرىپ، استانالىق بيشىكەشتەرگە ارناپ جازعان اقىلىمدى تاعى ءبىر قايتالايىن: ءبىزدىڭ اپەرباقان اكىمدەر ءۇشىن بۇل – بۇيىم ەمەس شارۋا. بالكىم، جامبىلدان ساداعا كەتكىر احمەتبەكوۆ تە باسىن قاتتى قاتىرىپ جۇرگەن ماسەلەنى مەنىڭ «نوۋ-حوۋىمدى» قولدانۋ ارقىلى شەشىپ، ءبالام ءبىر تىنىشتالار.
ارينە، «ەرىككەننەن» ەلىرىپ ءجۇرىپ، «بومج» دەگەن الەۋمەتتىن ستاتۋس العان قاڭعىباس قاۋىمعا باسپانا ءبولىپ بەرە المايسىڭ. ولار تۇگىلى، التى بالالى «التىن القالى» انالارعا ءۇي بەرۋ ماسەلەسىن ۇكىمەت ۇيدەي پروبلەما قىلىپ وتىرعاندا، «بومجدى» باۋىرعا باسۋ – قىتايدى قۇدا قىلۋمەن بىردەي قيامەت.
ەندى نە ەتپەك كەرەك؟ احمەتبەكوۆتى «اھ» ۇردىرماي، استاناعا ءتونىپ تۇرعان قاتەردىڭ بەتىن قالاي قايتارامىز؟
مەندە ءبىر يتجەگىر يدەيا بار: جامبەكەڭدەر جاراتسا. 
ول ءۇشىن، ەكسپو باستالاردان ءبىر اپتا بۇرىن استاناداعى «بومجداردى» تۇگىن قالدىرماي جيىپ-تەرىپ، كولىككە تيەپ، قاراعاندىعا اپارىپ تاستاۋ كەرەك (ولار تىم كوپ بولسا، قوستاناي، كوكشەتاۋ، قىزىلجار، كەرەكۋ قالالارىنا بولۋگە بولادى). بىراق و جاقتاعى «بومجدار» مەن بۇ جاقتان اپارىلعاندار اراسىندا مۇددە قاقتىعىسى (پودۆالعا تالاس، قوقىس جاشىگى ءۇشىن شايقاس، ت.ب.) بولماس ءۇشىن، حالىقتىق كوممۋنيستەر قاراعاندى قالاسىندا «قاڭعىباستار قۇرىلتايىن» وتكىزۋى كەرەك.
البەتتە، مۇنداي ماڭىزدى مەملەكەتتىك شارانى وتكىزۋ ءۇشىن، بيۋدجەتتەن از-ماز قارجى ءبولىنۋى ءتيىس. ال قۇرىلتاي وتكىزەتىن ورىنعا «بەسوبادا» قۇرىلىسى بىتپەي قالعان ءبىر ءۇيدىڭ پودۆالىن پايدالانسا بولادى: ءارى – تەگىن، ءارى – كەڭ. تۇسكى ءۇزىلىس كەزىندە «بومج-دەلەگاتتارعا» تاماق بەرىلىپ، كەشكىلىككە ءبىر-ءبىر شولمەك ارزان اراق ۇستاتىپ جىبەرسە بولعانى: زاكۋسكانى وزدەرى تاۋىپ الادى. ەسەسىنە – بوگىپ العان بومەكەڭدەر ارقانىڭ اسپانى استىندا تىرت-تىرت قاسىنىپ، بور-بور ۇيىقتاپ، الاڭسىز جاتا بەرەدى. 
بىراق، بۇل قۇرىلتايدىڭ ءبىر گابى بار: ونى ءۇش اي بويى ءۇزىلىسسىز وتكىزۋ كەرەك. سەبەبى – ەكسپو وسىنشا ۋاقىتقا سوزىلادى. كوسارەۆتىڭ ءوزى كوسەم بوپ، بۇتكىل پارتياسىمەن ءۇش اي قۇرىلتايشىلىپ جۇرسە، وتتەرى جارىلىپ كەتپەيدى: ەسەسىنە احمەتبەكوۆ ايتپاقشى، قاڭعىباستار «استانانىڭ كەلبەتىن بۇزبايدى». 
ال قاراعاندىعا اپارىپ تاستاعان قاڭعىباستاردى قاراۋسىز قالدىرساڭ، ولار ەكى كۇننەن كەيىن اڭىراتىپ وتىرىپ، استاناعا قايتىپ كەلەدى. ولار قايتىپ كەلدى دەگەنشە، استانانىڭ ابىرويى اشىلدى دەي بەر: تۋريستەر تىرىم-تىراقاي قاشادى; ءنان كوكەمىزدىڭ قانى باسىنا تەبەدى; ونىكى تەپتى دەگەنشە، جاقسىبەكوۆتىڭ جۇرەگى جارىلىپ قالدى دەي بەرىڭىز...
مىنە، ەكسپو دەسە، ىشكەن اسىن جەرگە قويىپ، ەڭىرەپ جۇرگەندەر وسى ۇسىنىستى ۇستانسا، استانا دا ايباتتى، قازاقستان دا قايراتتى كورىنەدى. ءبىتتى شارۋا!
قالاي، جامبىل مىرزا؟ ويباي، تويىس، توۆاريشش احمەتبەكوۆ؟!
ەرمۇرات باپي.

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3525