ءوزىن، ونەرىن قادىرلەي بىلەتىن قازاققا قايتالاپ جاتۋدىڭ قاجەتى جوق شىعار... سوندا دا ەسكە سالا كەتەيىك، ايتىستىڭ بىرنەشە ءتۇرى بار: سۇرە ايتىس، تۇرە ايتىس، قايىم ايتىس، بادىك ايتىس، جۇمباق ايتىس، تاۋ ايتىس، ت.ب. وسى جولى ەلوردادا ايتىستىڭ تاعى ءبىر ءتۇرى – لاقپا ايتىس جۇرتپەن قاۋىشتى. لاقپا ايتىستىڭ «ۇلگىسىن» «بازار جوق» تەاترىنىڭ ءارتىسى قانات دەيتىن قارا بالا كورسەتتى. قانات ءالجاپپاروۆ – «جۇلدىز».  كوكتەگى ەمەس، ارينە. وسى كۇنى جەردەگى «جۇلدىزداردىڭ» جارىعى كوزدى قارىقتىرىپ تۇر عوي – ويتكەنى ەلىمىزدەگى باق بىتكەن باسقا اڭگىمەنى تيىپ قويىپ «جۇلدىزدارعا» قىزمەت ەتۋگە كىرىسكەن. ەندى، مىنە، ايتىس تا «جۇلدىزداردى» جارنامالاۋعا جالدانىپتى.

... سونىمەن، ەلوردادا كانىگى ايتىسكەرلەرمەن جۇلدىزدار ءسوز دوداسىنا شىقتى. «جۇلدىزدار» ايتىستى. «جۇلدىزداردىڭ» ايتىسى الەۋمەتتىك جەلىلەردە كادىمىگىدەي اڭگىمە بولۋدا. سول اڭگىمەلەردىڭ بىرىندە قوعام بەلسەندىسى ماقسات ءىلياسۇلى: «مىنە وسىنداي ايتىستاردان كەيىن،   ادۋىندى اقىنداردىڭ ارىنىنان، سىنىنان، شىندىعىنان قورققان بيلىك ايتىستى دا «نۇر وتانعا» قول-اياعىن بايلاپ بەردى. قول-اياعى بايلاۋلى، باسىنان باعى، اۋزىنان شىندىعى كەتكەن قازاق ايتىسى شوۋ ايتىسقا، لاقپا ايتىسقا اينالدى» دەسە، ساياساتتانۋشى ايدوس سارىم: «جاڭا فرەندتاسپانى قاراپ وتىرىپ، 20 شاقتى ايتىس تۋرالى سىني يا ونى كەلەكە ەتكەن جازبانى وقىپ شىقتىم.

نەسىنە تاڭ قالاسىزدار؟ بۇل ايتىستان ءمان كەتكەلى قاشششان! كىم نە دەسە، و دەسىن، ايتىس شوۋ ەمەس! ايتىستىڭ باستى كۇشى مەن قۇدىرەتى - يم-پرو-ۆي-زا-تسيا! ياعني، تازا شىعارماشىلىق، سۋىرىپسالمالىق! ۇناسىن-ۇناماسىن، ايتىستان جۇرت اقىندىقتى، شىنايىلىقتى كۇتەدى. جاتتاندى، رەپەتيتسيالانعان، الدىن-الا بەلگىلەنگەن، ايقىندالعان دۇنيەنى ايتىس دەپ اتامايدى، كونتسەرت دەپ اتايدى، اعايىن! 4-5 جىل قاتارىنان كورگەنىمىز ايتىس ەمەس، پارتيالىق-سپونسورلىق كونتسەرتتەر.

ەگەر ايتىس باستالماي جاتىپ، ونىڭ كونتسەپتسياسى جازىلىپ تاستالسا، باستى جەڭىمپازى - كۇنكوسەم مەن "نۇر-پارتيا" دەپ تانىلسا، جۇلدەگەرى - چيپ-چيپ-تومپاق بولىپ بەكىتىلسە، نە قىزىقتى كۇتىپ ەدىڭىزدەر؟

قىسقاسى "نۇر-ايتىستىڭ" جانازاسىن شىعارىپ، جەرلەي بەرۋگە بولادى.

قازاققا كەرەگى باسقا ايتىس. بالاما ايتىستاردى وتكىزۋ كەرەك. مىسالى، ينتەرنەت-ايتىستار.. تاعىسىن تاعى...»، - دەپ جازدى.

ارينە، «جۇلدىزدار» ايتىستى ەكەن دەپ، شىن ايتىستىڭ ءباسى ءتۇسىپ قالمايدى. بىراق، ول ءۇشىن اۋزىنان جالىن توگىلگەن اقىندار عانا ءتىل بەزەپ كوپ الدىنا شىعۋى كەرەك. ال، ولار كورىنبەي بارادى.

Abai.kz