قازاق ءباسپاسوزىنىڭ «قارا شاڭىراعى» اتالىپ جۇرگەن ەل گازەتى «ەگەمەن قازاقستان» 95 جاستىڭ تورىنە شىعۋدا. «95-ءىڭ قۇتتى بولسىن، «ەگەمەن»، وقىرمانىڭمەن وزات شىعىپ، ۋاقىتتىڭ بەل-بەلەسىنەن تالماي وتە بەر» دەي وتىرىپ، ءبىز  ساۋىتبەك ابدراحمانوۆ مىرزانىڭ «توقسان بەستىڭ تورىندە» اتتى تولعاۋ ماقالاسىن جاريا ەتتىك.

Abai.kz

«راۋانداپ تاڭ اتادى، كۇلىم­سى­رەپ كۇن شىعادى. ەل ۇيقىدان ويانادى. ءدال وسى شاقتا ءار ءۇيدىڭ تەرە­زە­سىنەن تازا اۋا، ەسىگىنەن «ەگەمەن قازاقستان» كىرەدى. گازەت!.. باس گازەتى­مىز!.. تاڭعى اۋاداي تاپ-تازا، جاپ-جاڭا!.. تازا اۋا بويىمىزدى سەرگىت­سە، گازەت ويىمىزدى وربىتەدى. كۇن كوزىنەن ۇيىمىزگە نۇر تاراسا، گا­زەت بەتىنەن سانامىزعا سىر ۇيالايدى».

اكادەميك زەينوللا قابدولوۆ وسىلاي جازعان ەدى. قازاق دالاسىندا ءار ءۇيدىڭ تەرەزەسىنەن ەنگەن تازا اۋامەن بىرگە باس گازەتىمىز كىرە باستاعالى تۇپ-تۋرا 34 699 كۇن بولىپتى. 95 جىلدى 365 كۇنگە كوبەيتىپ، سول كەزەڭنىڭ كىبىسە جىلدارىنداعى 24 كۇندى قوسساڭىز، وسىنداي سان شىعادى.

گازەت قالاي دايىندالادى؟ تاعى ءبىر رەت ەسكە تۇسىرەلىكشى.

اۋەلى وي تۋادى. سوسىن ءسوز شىعادى. جازىلادى. جولدانادى. وقىلادى. باعالانادى. تەكسەرىلەدى. تۇزەتىلەدى. تەرىلەدى. تازارتىلادى. وقىلادى. تاعى تۇزەتىلەدى. تاعى وقىلادى. قول قويىلادى. ءبىر ماقالا دايىن بولدى. ءبىر بەتكە وسىنداي قانشا ماقالا كەرەك! ءبىر نومىرگە وسىنداي قانشا بەت كەرەك! ءنومىر جوسپارلانادى. بەتتەر ماكەتتەلەدى. ماقالالار بەتكە تۇسەدى. كوررەكتور وقيدى. كەزەكشى رەداكتور وقيدى. باسشىلىق وقيدى. تاعى تۇزەتىلەدى. قىسقارتىلادى. تولىقتىرىلادى. بەزەندىرىلەدى. قول قويىلادى. باسپاحاناعا جىبەرىلەدى. رەتتەلەدى. بەتتەلەدى. باسىلادى. تاسىلادى. پوشتاعا بارادى. ءۇيدى-ۇيگە جەتكىزىلەدى. گازەت وقىرماننىڭ قولىنا تيەدى. گازەتتىڭ ءبىر ءنومىرى!

ەرتەڭىنە ءبارى باسىنان قايتادان باستالادى…

("ەگەمەن قازاقستان". كەشە جانە بۇگىن: باس رەداكتورلار)

ال ەندى  الا تاڭنان قولعا الىنىپ، كەلەر تاڭعا ۇلاساتىن وسى شۇباتىلعان شارۋانىڭ 1919 جىل­دىڭ 17 جەلتوقسانى مەن 2014 جىلدىڭ 17 جەلتوقسانى ارالى­عىنداعى 34 699 كۇننىڭ ىشىندە 28 470 رەت اتقارىلعانىن ويشا شامالاپ كورىڭىزشى!.. عاجايىپ جۇمىس، عالامات ەڭبەك!

توقسان بەس جاستىڭ تورىنە كوتە­رىلىپ وتىرعان ەل گازەتى «ەگە­مەن قازاقستاننىڭ» ءجۇرىپ وتكەن جولى بۇل. ۇلى جول. جاڭا ءومىر­دىڭ سونى سۇرلەۋىنە تۇسكەن حالىقتىڭ سوقتىقپالى-سوقپاقتى، تايعاق كەشۋلى جولىنىڭ، جەتپىس جىلدايعى سوتسياليستىك ءداۋىردىڭ، شيرەك عاسىردايعى تاۋەلسىزدىك كەزەڭىنىڭ شەجىرەسى جارقىراپ جاتىر بۇل گازەتتىڭ سارعايعان بەتتەرىندە. ونىڭ تىگىندىلەرىنەن عاسىرعا جۋىق ۋاقىتتىڭ ىشىندە ءسوز العان ءجۇز-ءجۇز مىڭداعان ادامداردىڭ داۋىسى كۇڭگىرلەپ ەستىلىپ تۇرعانداي. باس باسىلىمدى قازاقتىڭ سماعۇل سادۋاقاسوۆ، جۇسىپبەك ايماۋىتوۆ، مۇحتار اۋەزوۆ، بەيىمبەت مايلين، ساكەن سەيفۋللين، تۇرار رىسقۇلوۆ، وراز جاندوسوۆ، عابيت مۇسىرەپوۆ، شەرحان مۇرتازا، ءابىش كەكىلباەۆ سىندى تيتان تۇلعالارى باسقار­عانىنىڭ ءوزى «ەگەمەن قازاق­ستان­نىڭ» قاندايلىق قاسيەت، كيەگە يە ەكەنىن داۋسىز دالەلدەيدى.

بۇل گازەت – ۇلتتىق رۋحتىڭ ۇلى ۇستىندارىنىڭ ءبىرى.

ۇزاق جىلدار بويى پارتيالىق با­سىلىم سانالىپ، «ۇشقىن»، «ەڭ­بەك تۋى»، «ەڭبەكشىل قازاق»، «ەڭبەكشى قازاق»، «سوتسيالدى قازاقستان»، «سوتسياليستىك قازاق­ستان» اتانىپ كەلگەن بۇل گازەت ءار ءسوزدىڭ ساڭلاۋىنان سىعالايتىن  سول تسەنزۋرالى زاماندا دا حالىقتىق سيپاتىن، ەلدىك مىنەزىن ساقتاي ءبىلدى. تاۋەلسىزدىك تاڭى اتقاننان-اق باسىلىمنىڭ باعى جاندى، وي شىدەرى اعىتىلىپ، ءتىل تۇساۋى شە­شىلدى. «ەگەمەن قازاقستان» اتانىپ، شىن مانىندە ەركىن ەلدىڭ جالپى­ۇلتتىق گازەتىنە، ناعىز حالىقتىق مىنبەرگە اينالدى.

("ەگەمەن قازاقستاننىڭ" ناعىز ەل گازەتىنە اينالعان تۇسى. ۇجىم. ورتادا ايگىلى باس رەداكتور، حالىق جازۋشىسى - شەرحان مۇرتازا)

ەگەمەندىكتىڭ ەلەڭ-الاڭىنداعى ەلدىڭ ەسىن كەتىرگەن قيىندىقتار تۇسىندا تارالىمى كۇرت ءتۇسىپ كەتكەن باسىلىمنىڭ بەدەلى سوڭعى ون-ون بەس جىلدا ۇدايى بيىكتەۋمەن بولدى. 2000 جىلعى 38 مىڭدىق تارالىمنان 2014 جىلى 201 مىڭدىق تارالىمعا جەتۋ، ياعني بەس ەسەدەن استام ءوسۋ ءار ماقالانىڭ، ءار سۇح­باتتىڭ جولىندا جانىن جەپ، جىلت ەتكەن جاقسىلىقتى جۇرتقا جەتكىزگەنشە جانتالاسقان رەداكتسيا جۋرناليستەرىنىڭ جۇيەلى جۇمىسىنىڭ جەمىسى بولۋمەن قاتار، بىزگە ورنىقتى ويعا قۇرىلعان، سال­ماقتى سوزبەن ورىلگەن ماتەريال­دارىن جولداپ وتىرعان ارداق­تى اۆتورلارىمىزدىڭ دا ارقاسى ەكەنىن اتاپ ايتىپ، توي تۇسىندا ەل گازەتىنىڭ دەڭگەيىن كوتەرۋگە اتسا­لىسقان ازاماتتاردىڭ بارىنە، گازەتكە جازىلۋعا جىلدا جۇمىلىپ، ەلدىك قاسيەت، ازاماتتىق بەلسەندىلىك، مەم­لەكەتتىك تىلگە جاناشىرلىق تانىتۋدان تانباعان قالىڭ وقىرمان قاۋىمعا العىسىمىزدى بىلدىرەمىز.

ەرەكشە العىسىمىز گازەت جۇ­مىسىن ءاردايىم نازارىندا ۇس­تاپ، ۇجىمعا ناقتى قامقورلىق كورسە­تۋمەن كەلە جاتقان، توقسانعا تولار تويىمىزدىڭ تۇسىندا رەداكتسياعا سەگىز قاباتتىق ءساندى عيمارات سالدىرتىپ، ونى ءوزى كەلىپ اشىپ بەرگەن، جۋرناليستەردى، ارداگەرلەردى شىن ىقىلاسپەن قۇتتىقتاعان، باسى­لىمدى «وتانىمىزدىڭ باس گازە­تى» دەپ اتاعان ەلباسىنا – قازاق­ستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىشۇلى نازارباەۆقا ارنالادى. ەلباسى سەنىمىنە الداعى كەزدە دە ساي بولۋ جولىندا ەگەمەنقازاقستاندىقتار ءبىلىمىن دە، بىلىگىن  دە، قاجىرىن دا، قايراتىن دا ايامايدى دەپ ۇجىمدى 2000 جىلدان بەرى باسقارىپ وتىرعان تاجىريبەلى ادام رەتىندە  انىق ايتا الامىن. قازاق­تىڭ ءسوزىن ۇستاعان نەبىر جاقسى مەن جايساڭنىڭ قاسيەتتى جولىن جالعاستىرۋ باقىتى بۇيىر­عان تاعدىرىما تاۋبە دەيمىن، حالقى­مىزدىڭ باس گازەتىنىڭ تىزگىنىن تاپ­سىرعان ەلباسىنا شەكسىز رازى­لىعىمدى بىلدىرەمىن.

ەلدىكتىڭ ءسوزىن سويلەۋ – ءبىزدىڭ قاسيەتتى پارىزىمىز.

ەل گازەتى اتانعان «ەگەمەن قازاق­ستان» قاي كەزدە دە پارىزعا ادال­دىعىنان اينىمايدى.

ەل گازەتىنىڭ توقسان بەستىڭ تورى­نە كوتەرىلگەن تويى – ەلدىڭ دە تويى.

تويىمىز قۇتتى بولسىن، قادىر­مەندى وقىرمان!

جازار جاقسىلىق، جەتكىزەر جاڭالىق كوپ بولسىن!

ساۋىتبەك ابدراحمانوۆ،

«ەگەمەن قازاقستان»  رەسپۋبليكالىق  گازەتى» اكتسيونەرلىك قوعامىنىڭ پرەزيدەنتى.

(سۋرەتتەر "ەگەمەن قازاقستان" گازەتىنىڭ سايتىنان الىندى)