سەيسەنبى, 18 قاڭتار 2022
قوعام 4011 0 پىكىر 17 قاراشا, 2014 ساعات 09:13

ەببوت: پۋتين كەشىرىم سۇراپ، قۇن تولەۋى كەرەك

اۆستراليانىڭ پرەمەر-ءمينيسترى توني ەببوتت (سۋرەتتە) بريسبەندە وتكەن «جيىرمالىقتىڭ» (20 مەملەكەت جانە باقىلاۋشى ەلدەردىڭ وكىلدەرى قاتىساتىن حالىقارالىق جيىن) ءسامميتى قاراساڭىندا رەسەي مەن رف پرەزيدەنتى ءپۋتيندى ايىپتاپ سويلەدى.

«ۆلاديمير پۋتين، - دەدى ول، - ءدارپى جويىلعان بۇرىنعى پاتشا داڭقى مەن سوۆەت وداعىن قايتادان قالپىنا كەلتىرگىسى كەلەدى. رەسەي الەمنىڭ گۇلدەنۋى مەن بەيبىتشىلىك ءۇشىن، بوستاندىق ءۇشىن سۋپەردەرجاۆالىققا ۇمتىلسا، قازىرگىسىنەن الدەقايدا تارتىمدى بولار ەدى».

توني ەببوت ۋكراينانىڭ شىعىسىندا جارىلىپ قۇلاعان جولاۋشىلار ۇشاعىنىڭ اپاتىنا دا رەسەي فەدەراتسياسىن ايىپتى ساناعان ەدى.

«اۆستراليا ازاماتتارى رەسەي جاعى قارۋلاندىرىپ وتىرعان بۇلىكشىلدەردىڭ قولىنان قازا تاپتى. مەن مىنە، وسى جايتتى دا ءپۋتيننىڭ بەتىنە باسىپ ايتقىم كەلەدى»، - دەدى ەببوت.

ۋكراينانىڭ شىعىس ايماعىندا قۇلاعان ۇشاقتىڭ ىشىندە اۆستراليانىڭ 38 ازاماتى بولعان ەدى. ەببوت وسى ازاماتتاردىڭ جازىقسىز ولىمىنە ۋكرايناداعى جىكشىلدەر كىنالى دەپ بىلەدى.

ەببوت پەن پۋتين كەشە كەزدەسىپ سويلەستى. ءپۋتيننىڭ ءباسپاسوز حاتشىسى دميتري پەسكوۆتىڭ سوزىنە قاراعاندا، ەكى ەل باسشىسىنىڭ كەزدەسۋىندە جوعارىداعى جايتتار اسا ءسوز بولا قويماعانعا ۇقسايدى.

- تاراپتار اراسىندا قابات شىتىپ شارپىسقان ءسوز تالاسى بولعان جوق. ولار سيرياداعى، ۋكرايناداعى جانە يرانداعى ماسەلەلەرگە قاتىستى عانا اڭگىمە قوزعادى، - دەيدى پەسكوۆ. ال، باتىس ءباسپاسوزى اۆستارليا پرەمەرىنىڭ اكىمشىلىگىنە سىلتەمە جاساي وتىرىپ، «ەببوت ءپۋتيننىڭ كەشىرىم سۇراپ، اۋەدە جانىپ كەتكەن Boing ۇشاعى مەن كوز جۇمعان ادامداردىڭ قۇنىن تولەۋى كەرەك ەكەندىگىن ايتتى» دەپ جازادى.

كەشىرىم سۇراۋ، قۇن تولەۋ حالىقارالىق سيپات يەلەنگەن توسىن وقيعالار بارىسىندا بولىپ كەلە جاتقان جايت. ەستەرىڭىزگە سالا كەتەيىك، 1988 جىلى اقش كورابلى يراننىڭ جولاۋشىلار ۇشاعىن زىمىرانمەن ابايسىزدا اتىپ تۇسىرگەندىكتەن ۇلكەن كولەمدە قۇن تولەپ، كەشۋ سۇراعان ەدى.

ۋكراينانىڭ شىعىسىندا، دونباس وبلىسىنىڭ اۋماعىندا قۇلاعان ۇشاقتىڭ اۋەدە جانىپ كەتكەنى انىقتالعانىمەن ازىرگە وعان كىمنىڭ (قاي ەلدىڭ) كىنالى ەكەندىگى ناقتىلانا قويعان جوق. ماسەلە ناقتىلانعان جاعدايدىڭ وزىندە دە (مىسالى، ۇشاق رف قارۋىلاندىرىپ تۇرعان بۇلىكشىلدەردىڭ قولىمەن جاسالسا دا), ءپۋتيننىڭ كەشىرىم سۇراپ، وتەماقى تولەۋى ەكىتالاي.

Abai.kz

0 پىكىر