9-قازاننان باستاپ قازاق ونكولوگيا جانە راديولوگيا عىلىمي-زەرتتەۋ ينستيتۋتىندا ايەلدەردىڭ دەنساۋلىعىن قورعاۋ ماقساتىندا ءسۇت بەزى قاتەرلى ىسىگىنىڭ الدىن الۋ ءۇشىن ونكۇندىك تەگىن تەكسەرىلۋ شاراسى باستالدى. بۇل شارا بۇكىلالەمدىك ءسۇت بەزى قاتەرلى ىسىگىمەن كۇرەسۋ كۇنىنە وراي ۇيىمداستىرىلدى. نەگىزگى ماقساتى – ونكولوگيالىق اۋرۋلار تۋرالى حالىقتى كەڭىنەن اقپاراتتاندىرۋ، ءاربىر ادامنىڭ ءوز دەنساۋلىعىنا ءوزى جاۋاپتى ەكەنىن ۇعىندىرۋ، «اۋىرىپ ەم ىزدەگەنشە، اۋىرماۋدىڭ جولىن ىزدەۋگە» شاقىرۋ، ياعني، ءسۇت بەزى قاتەرلى ىسىگىنىڭ الدىن الۋدا دەر كەزىندە سكرينينگتىك تەكسەرىلۋدەن ءوتۋدىڭ ماڭىزىن كورسەتۋ.

ءسۇت بەزى قاتەرلى ىسىگىن ايەلدەر ءومىرىن جالمايتىن نەگىزگى اۋرۋ تۇرىنە جاتقىزۋعا بولادى. ماسەلەن، جىل سايىن 1,38 ميلليونعا جۋىق ايەل قاتەرلى ىسىكتىڭ وسى تۇرىنە شالدىقسا، 458 مىڭنان استامى قايتىس بولادى. ال قازاق ونكولوگيا جانە راديولوگيا عىلىمي-زەرتتەۋ ينستيتۋتى بەرگەن مالىمەتكە سۇيەنسەك، ونكولوگيالىق اۋرۋلار ءولىم-ءجىتىم كورسەتكىشى بويىنشا ەكىنشى ورىندا تۇر. جىل سايىن 17 000 ادام قاتەرلى دەرتتىڭ سەبەبىنەن كوز جۇمادى. ال ولاردىڭ  42%-ى – ەڭبەككە جارامدى جاستاعىلار.

قاتەرلى ىسىكپەن كۇرەسۋدە ماماندار ەڭبەگى جەمىسسىز ەمەس. جىل سايىن قاتەرلى ىسىكتى العاشقى ساتىسىندا انىقتاۋ كورسەتكىشى ارتىپ كەلەدى. بۇل دەگەنىمىز – حالىق اۋرۋمەن كۇرەستە بەلسەندىلىك تانىتا باستادى دەگەن ءسوز. قاتەرلى ىسىكتى ءبىرىنشى ساتىسىندا انىقتاۋ ۇلكەن قاۋىپتىڭ الدىن الۋمەن بىردەي. ءدال ۋاقىتىندا ەمدەلىپ، جازىلىپ كەتۋگە مۇمكىندىك مول.

ونكۇندىك كەزىندە قازاقستان ونكولوگتارى ەلىمىزدەگى ايەلدەردىڭ ءبارىن كەز كەلگەن ەمحانادا تەگىن تەكسەرىلۋدەن ءوتىپ، مامانداردان كەڭەس الۋعا شاقىرادى.

شىنار تالاەۆا جاقسىبايقىزى، م.ع.د.، قازاق ونكولوگيا جانە راديولوگيا عىلىمي-زەرتتەۋ ينستيتۋتى ماممولوگيا ورتالىعىنىڭ جەتەكشىسى:

بۇل شارا 2011-2015 جىلدارعا ارنالعان مەملەكەتتىك «سالاماتتى قازاقستان» باعدارلاماسى اياسىندا قر دەنساۋلىق ساقتاۋ مينيسترلىگى سالاۋاتتى ءومىر سالتىن قالىپتاستىرۋ ۇلتتىق ورتالىعىنىڭ مامموگرافيا سالاسىنا قولداۋ كورسەتۋىمەن وتكىزىلىپ وتىر. قازىر ءسۇت بەزى قاتەرلى ىسىگىنە شالدىعۋ قاۋپى ورتاشا ەسەپپەن العاندا 50-59 جاستا باسىم بولادى. بۇل اۋرۋ ۇزاق ۋاقىت بويى ادام اعزاسىندا تىعىلىپ جاتادى. ەڭ قيىنى دا سول. ىسىك جايىلىپ، جان-جاققا تاراي باستاعان كەزدە انىقتاپ جاتامىز كوپ جاعدايدا. ونى ەمدەۋ ءۇشىن ۋاقىت جانە ءدارى-دارمەك كەرەك. ارينە، كەز كەلگەن پروبلەمانى شەشۋدىڭ جولى بار. ول ءۇشىن ايەلدەر ماماندار كەڭەسىنە قۇلاق اسىپ، دەنساۋلىعىنا قاتىستى كىشكەنتاي بولسىن قاۋىپتى بايقاپ قالسا، ۋاقىتىندا سكرينينگتىك مامموگرافيادان ءوتۋى قاجەت. ياعني، دەنساۋلىعىنا جاۋاپكەرشىلىكتى سەزىنە ءبىلۋى ءتيىس. سوندىقتان، بارلىق ايەلدەردى ءوز ايماقتارىنداعى ەمحانادا مىندەتتى تۇردە ماممولوگ تەكسەرۋىنەن وتۋگە شاقىرامىز. كەلەسى جىلى بۇل اكتسياعا ونەر جۇلدىزدارىن قاتىستىرۋدى جوسپارلاپ وتىرمىز. ولار سكرينينگتىك تەكسەرۋدەن ءوتىپ، وزگەلەرگە ۇلگى بولادى.

الما جىلقايداروۆا جالەلقىزى، م.ع.ك.، قازاق ونكولوگيا جانە راديولوگيا عىلىمي-زەرتتەۋ ينستيتۋتى مامانداندىرىلعان كونسۋلتاتيۆتى-دياگنوستيكالىق ءبولىم جەتەكشىسى:

- بيىل جىلى ءبىزدىڭ ينستيتۋت «قازاقستان ونكولوگتارى مەن راديولوگتارى» قوعامدىق بىرلەستىگىمەن بىرگە وسى قازان ايىندا الماتى مەن استانا قالالارىندا جىل سايىن وتەتىن قازاقستان ءسان اپتالىعىنا (KFW-2014) رەسمي سەرىكتەس بولدى. بۇل شارا كەزىندە قازاقستاندىق ديزاينەرلەر العاش رەت قىزعىلت ءتۇستى لەنتالار دايىندادى. ول ءسۇت بەزى قاتەرلى ىسىگىمەن كۇرەستىڭ سيمۆولى بولماق. كورسەتىلىم اياقتالعان سوڭ بۇل توپتاما ساتىلىمعا قويىلادى. ال جينالعان قارجى ونكولوگيالىق دەرتكە شالدىققاندار ەمىنە جۇمسالادى. ءسۇت بەزى قاتەرلى ىسىگى – ايەلدەردىڭ ماڭدايىنا جازىلعان اۋرۋ ەمەس. قانداي جاعداي بولماسىن ايەل ادام ءوز سۇلۋلىعى مەن تارتىمدىلىعىن ساقتاپ قالۋعا ءتيىستى. ءبىز بۇل قادام ارقىلى بارشا ايەلدەر قاۋىمىنا وسى ويدى جەتكىزگىمىز كەلدى.  

«ەرىنشەكتىڭ ەرتەڭى بىتپەس» دەيدى. ءبىزدىڭ ەڭ جامان ادەتىمىز – دەنساۋلىعىمىزعا بەي-جاي قاراپ، دارىگەرگە بارۋدى كۇندە ەرتەڭگە قالدىرا بەرەتىندىگىمىزدە. سول سەبەپتى، تەكسەرىلۋدەن ءوتۋدى ەرتەڭگە نەمەسە كەلەسى جىلعا قالدىرماي، بۇگىن، ءدال قازىر بارىڭىز!

تولىق اقپارات الۋ نەمەسە سۇراقتارىڭىز بولسا، قازاق ونكولوگيا جانە راديولوگيا عزي ءباسپاسوز ورتالىعىنا حابارلاسىڭىزدار:

تەل.: +7701 360 66 63

E-mail onco.congressV@gmail.com

اباي-اقپارات