اتىراۋدا قازاقستان مەن رەسەي اراسىنداعى 11-ءنشى ايماقارالىق فورۋم ءوتىپ جاتىر. فورۋمنىڭ بيىلعى تاقىرىبى: «كومىرسۋتەگى ينوۆاتسيالارى».

فورۋم بارىسىندا ەكى ەل پرەزيدەنتتەرى كەزدەسىپ، قازاقستان مەن رەسەي اراسىنداعى ساۋدا-ەكونوميكالىق قارىم-قاتىناستىڭ ودان ءارى دامۋ بارىسى جانە 10-نشى قازاندا مينسكىدە كەدەندىك وداق اياسىندا وتەتىن جان-جاقتى ءىس-شارالارعا دايىندىق جايىن تالقىلادى.

مەملەكەت باسشىلارىنىڭ كەزدەسۋىنەن بولەك ايماق باسشىلارىنىڭ ءوزارا كەزدەسۋلەرى دە وتۋدە.

فورۋم سوڭىندا قازاقستان مەن رەسەي بىرنەشە كەلىسىم-شارتقا قول قويماق. ونىڭ ىشىندە قازبا بايلىقتاردى بىرلەسە يگەرۋ، بىرلەسىپ اتوم ەلەكتر ستانساسىن سالۋ تۋرالى كەلىسىم دە بار.

ايماقارالىق فورۋم قارساڭىندا اتىراۋ قالاسىندا قاۋىرت دايىندىق بولىپ ەدى. سول دايىندىقتار بارىسى تۋرالى ءبىزدىڭ ءتىلشىمىز بىلاي دەپ حابارلايدى:

شاھارعا ءسان بەرگەن سالتانات سارايى

اتىراۋدا قازاقستان مەن رەسەي ەلدەرى باسشىلارىنىڭ قاتىسۋىمەن وتەتىن ءحى وڭىرارالىق ىنتىماقتاستىق فورۋمىنا دايىندىق قىزۋ جۇرگەن ەدى.  مۇنايلى استانا از عانا ۋاقىتتا كوركەيىپ، گۇلدەنىپ، سانىنە ءسان قوستى.

قالامىزعا ەرەكشە ءسان بەرگەن ساۋلەت ونەرى تۋىندىسىنىڭ ءبىرى – سالتانات سارايى. قازاقستان مەن رەسەيدىڭ ءحى وڭىرارالىق ىنتىماقتاستىق فورۋمى وتەتىن عيمارات قۇرىلىسى از ۋاقىتتا تولىقتاي اياقتالدى. سىرتقى اسەمدەۋ، جارىقتاندىرۋ، كوگالداندىرۋ جۇمىستارى بارىنشا جەدەل تۇردە جۇزەگە استى.

- بيىلعى جىلدىڭ قاڭتارىندا نىساننىڭ قۇجاتتارى جاساقتالىپ، 17 اقپان  كۇنى ناقتى قۇرىلىسى باستالعان ەدى. جۇمىستار جەتى اي بويى توقتاۋسىز جۇرگىزىلدى. 350-گە جۋىق جۇمىسشى تارتىلدى. ىشكى جۇمىستار بويىنشا قۇرىلىس ماتەريالدارى الماتى، اقتوبە، ورال، تاراز قالالارىنان اكەلىندى. جوبالاۋشى – ورال قالاسىنىڭ «قازجوبالاۋ» كومپانياسى. ىشكى جۇمىستاردى الماتىلىق فيرما جاسادى. عيماراتتىڭ ىشكى كورىنىسىن قازىرگى زامانعا ساي تالاپتارعا نەگىزدەۋگە تىرىستىق، - دەيدى مەردىگەر كومپانيا ديرەكتورىنىڭ قۇرىلىس ءوندىرىسى بويىنشا ورىنباسارى جالعاس اپەنوۆ.

سارايدىڭ جالپى اۋماعى – 6 مىڭ شارشى مەتر. وندا 300 ورىندىق مەيرامحانا جۇمىس ىستەيدى. فورۋم وتكەننەن كەيىن عيمارات «نەكە سارايى» رەتىندە حالىق يگىلىگىنە بەرىلمەك.  زاماناۋي جانە ساپالى قۇرىلىس ماتەريالدارى پايدالانعان، جاڭادان بوي كوتەرگەن بۇل نىسان قالا كوركىن ودان ءارى اشا تۇسەتىنى انىق.

ۇيىمداستىرۋشىلاردىڭ مالىمەتىنە سۇيەنسەك، ءحى ايماقارالىق ىنتىماقتاستىق فورۋمىنا دايىندىق جۇمىستارى ءۇشىن وبلىس قازىناسىنان ەداۋىر كولەمدە قارجى بولىنگەن. قوناقتاردى تاسىمالداۋ ءۇشىن جاڭا  14 كولىك ساتىپ الىنىپتى.

اسا ماڭىزدى ساياسي، ەكونوميكالىق ماسەلەلەردى تالقىلايتىن بۇل فورۋمعا وبلىس ورتالىعىنا كەلەتىن ەكى مىڭداي مارتەبەلى مەيمان  قالامىزدا ءۇش كۇن بولادى. سوعان بايلانىستى شاھارداعى قوناق ۇيلەردىڭ  دايىندىعى دا ەرەكشە نازاردا.

كورمە زالىنداعى كەرەمەتتەر

اتىراۋدا ءوزىنىڭ ارحيتەكتۋرالىق سانىمەن سالىنعان اسەم دە ادەمى عيماراتتار از ەمەس. سولاردىڭ ءبىرى - بيىك تە جارىق كورمە زالى. ول بۇگىن ءوزىنىڭ العاشقى مەيماندارىن قابىلدادى. ال، قوناقتار - قازاقستان-رەسەي ءحى وڭىرارالىق ىنتىماقتاستىق فورۋمىنىڭ اسا قۇرمەتتى قاتىسۋشىلارى.

قازىرگى زامانعى اۋديو-ۆيدەو اپپاراتۋرالارمەن، دىبىس كۇشەيتكىش قۇرالدارمەن جابدىقتالىپ، ءتۇرلى ءتۇستى باننەرلەر ىلىنگەن ءزاۋلىم زالدا ەكى ەلدىڭ بەلگىلى وندىرىستىك كومپانيالارىنىڭ اتاۋلارى، ەمبلەمالارى مەن ولار تۋرالى انىقتاما ماتەريالدار ىلىنگەن. ولاردىڭ قاتارىندا «قازمۇنايگاز»، «TATNEFT»، «كونسورتسيۋم EURASIA»، «السترون»، «SONOGRAM»، «ۆنيپي گازدوبىچا»، «سامارسكيە گوريزونتى» جاق، «روسسيسكيە يننوۆاتسيوننىە تەحنولوگي زاششيتى ترۋبوپروۆودوۆ»، «ەنگو ينجينيرينگ» ااق، «MAERSK OIL»، «مير ماسەل» جشس، «راۋان نالكو» جشس، «چەليابينسكي زاۆود تەحنولوگيچەسكوي وسناستكي» جاق، «گازوۆىە سەتي» سۆەردلوۆسكوي وبلاستي» جانە باسقالارى بار.

حالىقارالىق كەزدەسۋلەر مەن ەكونوميكالىق ىسكەرلىك بايلانىس ورنايتىن ءىرى جۇزدەسۋلەردىڭ باسى-قاسىندا جۇرەتىن استانالىق «Success» («ساكتسەسس») مەديا اگەنتتىگىنىڭ قىزمەتكەرى ءلاززات نوعايدىڭ ايتۋىنشا، كورمە زالىنا رەسەي مەن قازاقستان ەلدەرىنىڭ ەڭ تاڭداۋلى دەگەن مۇناي-گاز كومپانيالارى تۋرالى اقپاراتتار بەرىلەدى. ولار جايىندا VIP-ستەندىلەر دايىندالىپ، تەحنولوگيالىق قۇرال-جابدىقتار قويىلادى. ال، ورتاداعى «شوۋ-رۋم» الاڭىندا تاقىرىپتىق سەسسيالار وتەدى.

ءوز ءتىلشىمىز.

اتىراۋ

Abai.kz